المقالات الخميس, 23 - فبراير - 2012 أرشيف الأعداد السابقة   (النسخة القديمة)

27 يناير, 2012

بتواجهوا اللى ضدكم بالقرآن؟ ده مبارك ماعملهاش ياخوان !!

 فـي منوعات كتابة فادي رمزي

"اللى بيحصل ده لازم يقف حالا ... ابن التيت اللى عندكم اللى عمل كده لازم يوقف القرآن دلوقتى، الناس رافعة الجذم وبتشتم وبتطلع تخلع سماعاتكم علشان توقف القرآن".

ده كان جزء بسيط من حوارى الصارخ مع صديقى الإخوانى ... اشرح فيه كيف تعامل القائمون على منصة الإخوان بمنتهى الفاشية والديكتاتورية مع المسيرة القادمة من الجيزة ما ان دخلت التحرير ..

المنصة الإخوانية، اللى بتستفز الناس من يوم الأربعاء بكتابة "عيد الثورة" واتخاذها منهج احتفالى، كانت بتشغل اغانى شادية ووردة وخطب واشعار والدنيا ماشية مدنية ان ما كانتش كمان ليبرالية ... واذ فجأة وما ان دخلت المسيرة المذكورة هاتفة: "دى ثورة ... مش حفلة" و"بيع بيع بيع .. الثورة يا بديع" و"اتنين مالهمش آمان المجلس والاخوان" ... حتى اختفت شادية وذبلت وردة وانبثق صوت القرآن الكريم !!



وظلت الهتافات صارخة والأحذية مرتفعة امام المنصة، ومطالبة كل من عليها بالنزول ولم الليلة الإحتفالية ... كل هذا وصوت القرآن خارج من كل السماعات المحيطة بالمنصة ... ولكن المتظاهرين لم يصمتوا، حتى عندما قال لهم شخص سمج من الإخوان: "يا جماعة اسكتوا واحترموا القرآن" ... الناس ردت عليه وقالت: احترمه انت ... اشمعنى شغلتوه دلوقتى ... "مش هنمشى، الإخوان تمشى"

العدد كان كبيرا كما يظهر فى الصور، والهتاف كان عاليا ويتداخل مع صوت القرآن الكريم ..

قلت لصديفى الإخوانى: "بقى اللى يهتف ضدكم تشغلوله قرآن ؟؟؟ ده مبارك ماعملهش لما هتفنا ضده ... هو ده اللعب بالدين اللى على اصوله. هو احنا فى مسجد هنا ولا فى عزاء علشان تشغلوا القرآن .. واشمعنى فى اللحظة دى بالذات يعنى ؟؟"

صديقى اتفق معى فى رايى، اصله من شباب الإخوان المعترضين ولكن لسه للعشرة صاينين، وقال انه سيحاول ان يتحدث مع المسئولين عن المنصة ... وانهيت المكالمة وانا اقول له: "حاجتين بس هيهدوا الناس، ان كلمة عيد تتشال وان حد يطلع يعتذر للناس عن انهم واجهوا هتافهم بالقرآن" ..

بعدها الإخوان طلعوا الدعاة بتوعهم يهدوا الناس، والناس ولا همها وظلت على هتافاتها التى تدين ممارسات الإخوان الإحتفالية و"الثورية" ... فراح الإخوان مطلعين عبد المنعم الصاوى وحاتم عزام من حزب الحضارة، اللى معاهم فى الإئتلاف، وبرضه الناس لم تقبل كلامهم .. لأنهم كانوا بيتكلموا عن الإنقسام والفتنة والشهدا .. بينما المنصة اللى واقفين عليها فى نظر الهاتفين هى السبب فى الإنقسام والفتنة واهانت بإحتفالها حق الشهدا، وهى والمجلس فى جبهة واحدة.

وطلع شيخ ازهرى واقسم انه مش اخوانى ولا سلفى ... برضه مافيش حياة لمن تنادى ... فجابوا أحمد ماهر من 6 ابريل، وانا مش فاهم ازاى يقبل يطلع، وبرضه استمرت الهتافات لأن الناس استفزت من تشغيل القرآن لأن هذا اكد لها ان اللعب بالدين هو سلاح الإخوان.



وحتى عندما قام الإخوان بتغطية كلمة عيد ظل الهتاف كما هو ... لأن ببساطة لو انت شايف ان كلمة عيد هى الصح، وانت بتاع الحق زى ما بتقول، يبقى بتغطيها ليه ... ولو هى غلط، ما تقول انا غلطان انى حطيتها وتعتذر عن كده .. انما "بتماين" مع الناس يعنى ولا ايه الفكرة ؟؟

ثم عندما نضبت كل الحيل ... وحان وقت آذان المغرب، اذاعت المنصة الآذان كأعلى ما يكون ... لإسكات الأصوات الهاتفة، مع ان من يوم الأربعاء لم تذع المنصة صوت الآذان ابداً ... حبك بقى دلوقتى؟؟؟

الجميل ان الناس سكتت وقت الآذان، وصلت المغرب ... وما ان قالوا "السلام عليكم ورحمة الله وبركات" حتى قاموا هاتفين "بيع بيع بيع ... الثورة يا بديع" ... "اتنين مالهمش آمان .. المجلس والإخوان".

اللى غاظنى بقى ان بعض من اصدقائى الإخوان وضعوا ستاتس يشير الى ان "البعض استفز الإخوان فى التحرير ولكن الإخوان التزموا ضبط النفس وصابرين، وان الديموقراطية تعنى احترام راى الشعب والأغلبية" ..

فكرنى اللى حط الستاتس ده بصفوت الشريف وهو بيقول "دول قلة مندسة ... والشعب ده بتاعنا وناخده فى حضننا وبيأيدنا واحنا اللى بنمثله" ..

أنا مش فاهم "اغلبية" ايه اللى الإخوان بيقولوا عليها ؟؟؟ دول واخدين 47% من المجلس ... يعنى اكتر من نص المجلس مش اخوان ... و حوالى نص اللى نزلوا انتخبوا لم يختاروهم، يبقى اغلبية ايه بقى اللى تخليهم بهذه العنجهية، ولا هما حطوا خلاص السلفيين فى جيبهم وبقوا بيعتبروهم من نصيبهم ؟؟

إن ما حدث يوم 27 يناير هو اثبات آخر على ان الإخوان يتجهون نحو التحول الى حزب وطنى .. وكمان مش ديموقراطى ... وقد كان اول المؤشرات هو غلاف جريدتهم ثانى يوم احداث محمد محمود، عندما اطلقت على من فى الشارع لقب "بلطجية" فى صفاقة اهرامية تعبيرية لا مثيل لها ..



ثم جاءت رغبتهم فى احتكار رئاسة 15 لجان مجلس الشعب، وحين اعرب احد اعضاء النواب عن حزب الوفد عن اعتراضه، قائلا ان رئاسة اللجان تكون بالكفاءة، وبالتأكيد يوجد فى المجلس من هم على كفاءة عالية من غير الإخوان ... انبرى رئيس كتلة الحرية والعدالة صائحا: "ماتقولش اكفأ ... احنا عندنا كفاءات، وهو ده اللى بتحتمه الأغلبية" ... ساعتها افتكرت كمال الشاذلى، الله يرحمه على قد نيته، عندما استخدم نفس الحجة امام نواب الإخوان المعترضين على احتكار الوطنى للجان مجلس 2005 ... يااااه الأيام دول فعلاً.

طب يا اخوان خدوا 47% من رئاسات اللجان على قد نسبتكم، او اظهروا "توافقكم" المزعوم واتفقوا مع كفاءات المجلس ونظموا الموضوع ... انما ازااااى ... ده طعم السلطة حلو جوى جوى جوى يا بوووووى.

طبعا من المعروف ان عصام العريان وبعض كبار الإخوان قد قاموا بزيارة القطاعات الحكومية المدرة للدخل العالى، مثل المصرية للإتصالات، وذلك قبل إنتخابات مجلس الشعب، حتى يشوفوا ايه اخبار "الغلة" ... فى مشهد يذكرنى باسماعيل ياسين لما زار المطافى فى فيلم العتبة الخضرا.

من الآخر:
يا تلموا نفسكم يا تحصلوا اللى قبلكم .. والناس اللى اختارتكم بتجربكم، مش باعت عقولها لكم.

فادى رمزى

صور 27 يناير 2012 - ميدان التحرير


 

تقييم 

 


التعليقات

اضف تعليق جديد
    •     وهبه
    • 28 - يناير - 2012
      02:59
    هذه ليست المره الاولي ولن تكن الاخيره
    هناك الكثير من المسجلات التصيريه التى توضح المعارك التى كانت فى اكثر من موقع الواحد نسي لان التخبيط كل جمعه ولمدة سنه وكان
    هناك فى الخلفيه صوت القرأن ولا ادري هل يتوقع اى مواطن اى شيئ مختلف وبالمثل فى فيلم hurt locker كانت العبوات تنسف والقتلي
    تبعثر اشلائهم والقرآن يدوى والآذان يسمع وساعتها طننت ان الفيلم متعصب ولكنها حقيقه تعاد وتعاد وتعاد الفيلم فعلا غير متعصب
    ومتأمرك نسبه الى امريكا

    سيكتشف الكثير إن الإختيار السياسي للأحزاب الاسلاميه كان إختيارهم والملايين تستحق ما إختاروه حوالي 70% برلمان اسلامي فكيف
    تكون الصوره مختلفه؟

    ولكننى اتعشم واقول إن الاحزاب الجديده لن تكون أكثر فسادا واكثر طغيان واكثر سرقه عن ما كان واعلم ايضا وبدون مبالغه إن هناك
    الكثير من النساء المسيحيات بدأن فى التحجيب او لبس ايشارب تجنبا للتحرش
    ولكن هل التدين المعلن والمجهر سوف ينقذ البلد من الافلاس مصر مفلسه اقتصاديا ومهنيا وهى بلد استهلاكيه مشاكلها استهلاكيه مثل رغيف
    الخبز وانبوبه بوتوجاز !!!! ثوره شامله قامت وبعد كام شهر يقولوا مافيش بنزين لاء مافيش انابيب و مافيش حاجات كتيره
    كان الله فى عون الشعب
    •     حنان بدوي
    • 28 - يناير - 2012
      11:22
    للاسف أسوأ شيئ في الدنيا أن يستغل الدين من أجل الحصول على سلطة و هذا ما حدث في مصر الاخوان استغلو عقول الشعب المسكين الجاهل و
    ضعف الاحزاب المتصارعة و الائتلافات المشتتة و لعبو على الارت الرابح الا و هو الدين و طبعا اكتسحو فادي دي مش اول مرة عادي دايما الي
    بيلعب بالكارت ده يوصل بسرعة لاننا شعب بيتمسك بقيمه الدينية سواء مسلم او مسيحي وده شيئ صعب تغييره لكن ممكن علاجه بالتوعية و
    الاصلاح و التعليم لكن لسه قدامنا كتير لكن احقر شيئ ممكن كنت اتصوره انهم يستغلو القرآن الكريم من اجل اسكات صوت معارض امال لما حد
    هيعارض في البرلمان هيعملو فيه ايه هيقيمو عليه الحد؟؟؟يا خوفي لينفردو بالسلطة و حزب وطني راح و حزب اخواني جه مصر محتاجة نهضة
    كبيرة اوي احنا حالتنا صعبة يا فادي و الاخوان لو تقاعصو عن اصلاح حال الشعب الي جعان صدقني مش هيعمر في المجلس الناس خلاص
    مستبيعة و معدش خوف فلنترك الايام القادمة تثبت صدق نيتهم لربما يفعلون شيئ من اجل الملايين الي نزلو و ادوهم اصوات و الله المستعان على
    ما تصفون
اضف تعليق جديد

مين اللى كان نفسك انه يرشح نفسه للرئاسة ؟

 

نتائج | استفتاءات اخري



اخر التعليقات