يا جماعة بالراحة وصلوا ع النبى كده .. مجد سيدك يا عم ... صلى على اللى يشفع فيك ... الراجل ده عشرة عمر وعضمة كبيرة ومايصحش كده .. خلاص خلاص .. ماعدش يعمل كده تانى فى اى دولة، استنى انت فى شرم كده ياعم الحج وان شاء الله خير ولا يكون عندك فكرة.

قعدنا كل جمعة نقول جااااااى ... انتم بتعملوا ايه ؟؟؟ احنا عايزين الحق والمستحق ومش عايزين لبط وتسويف ... احنا مخنوقين ودمنا حر ومايستهلناش الا كل عفيف وشريف.

عايزين من الآخر "حق روئة" ... وروئة دى ابنى وبنتك واخويا واختك وليها حقوق ولازم ناخدها، اصل السكوت كان وقت طويل ياما وماينفعش نسكت اكتر من كده.

وإذ بنا نفوجأ بعد كل الهرى ده ..

وبعد ما راح اللى راح من عفش البيت واتشققت جدران ومرضت عيال وماتت عيال، ومع كل ده ابتدينا نشم نسمة هوا نضيف كان قبل كده شمه محال ... لقينا اخونا العترة الشديد الحقانى بيتعامل مع الموضوع وكأنها قضية خلع ... تدفعوا كام ونخلع وقال ايه ده الحل القانونى ؟!!

ندفع كااام ؟؟؟ يعنى ايه ؟؟

يعنى تسيبولنا شوية منقولات كده ومميزات وحقوق رؤية ونهل من الخير اللى "بيجمع بينا" ..

نعم يا خويا ؟؟؟ خير مين يابو خير، ده انت لحم وعضم كتافك من خيرنا وياريت فيه فتفوتة خير بتنوبنا ... ندفع ايه ؟؟؟ لأ ... لأ ... لأ ..

قوووم ايه، يطلع علينا دعوى نشوز ... قاااال ايه احنا شعب ناشز ومالناش اى حق فى اننا نقول بم، وننضرب كده ويندبح عيالنا ونفضل سكتم بكتم !!!

طبعا لما لقينا الطبع الردى من جواه حط ... احنا بعيالنا انشالنا وحلفنا ما ننحط .. غير على دماغ طليقنا واللى يتشدد له، ومدعوكه دى عيشة لو بمرار وكرابيجج وسلاسل تقيد حريتنا وتمنعنا عن أخد كل حقوقنا ..

دخل بيننا شوية عاملين انهم منا .. وقال اييييه : احنا اسفين يا معلمى، والله ما تستاهل كل ده ده انت سيدنا وتاج راسنا، دوس ولا يهمك دول شوية ولايا مالهمش فى ديك النعمة ...

ياخى جتكم اسفين لما تقعدوا عليه يا بعدا ... ديك ام دى نعمة، انتم ناسيين اللى جرى ولا عقولكم وضمائركم ماتت يا بعدا.

وآخرة الجراير لما نزلنا مع العيال نفك على نفسنا شوية ونتفرج على ماتش كورة ... وبالمرة نجيب شوية شامبو ومناطيل وبلايز مع باكوين شوكلاتة للعيال م المنطقة الحرة ... قوووم ايه الراجل الشايب العايب ابن المفترية، يخللى كلابه تنهش فينا واحنا داخلين لا بينا ولا علينا ...

عضوا الواد ياكبدى لحد ما بقى بيفرفر فى ايديا ..

بيقوللى الحقينى ياما انا بموت وانا لسه مالحقتش ادخل دنيا ..

ياقلبى عليك يا حبيبى ... الحقونى يا ناس .. الحقنى ياخويا ياللى اتولدت لجل ما تحمى الصغار والولايا ... الواد بيروح منى ولسه على فطامه بدرى ... الواد ياقلبى مشتاق للفرحة أكلت الكلاب من على وشه البسمة ..

الحقنى ياخويا ياللى بتقول انك مش بتفارق سجادة الصلاة، وانت ياللى مستنى الإذن من العمة السودا او البيضا ... هتتحركوا امتى بقى ... انا والعيال بنضيع والنعمة.

يامرارك يا مصر ..

هتفضلى قد ايه صابرة ومستحملة ... خلاص وصلوكى انك بقيتى تقولى:
غطونى وصوتوا ياباقى ولادى .. اخواتكم بيروحوا من حضنى، مش قادرة اشوف دم تانى ... وقفوا ولاد المفترية دول وارموهم فى اى مزبلة، هاتولى حق سعيد ومينا ومريم وعبلة ..

وانت يا خويا ياللى كنت فاكراك منى مش عليا ... الله يلعن البطن اللى جابتك ... دى مش ممكن تكون بطن بشرية، دى بطن شيطانى طرحت فى جهنم مش فى ارض طيبة.

ودينى وما اعبد ما هتتهنوا يوم ولا ساعة فى بيتى ياولاد الأفعى ..

دى ثورة على كل خاين وفاسد مش وجهة نظر تحتمل ايوة أو لأ ..

تلبسوا ميرى تلبسوا مدنى هيعلقكم من رقابيكم ولادى ...

فات زمن السماح وانتظار الصلاح ...

عيالى الأصليين هيجيبوا حقى اللى جاى واللى راح ..

وهنعمر البيت والغيط والفسحة والسطح ..

والغلط هندوسه برجلينا و من هنا ورايح مش هيصح الا الصح.

فادى رمزى