دى بعض الجمل اللى بتتقال كل ماتحصل مصيبة فى البلد سببها الإنفلات الامنى، واللى فى نظرى هى نوع من انواع السخف والاستهبال من(بعض) الناس ... وقلة ضمير من( بعض) رجال الشرطة.

اللى بيقولوا ضيعتوا هيبة الدولة بقولهم: هى إية حكاية هيبة الدولة دى، اللى من ساعة ماقامت الثورة متمرمطة مابين مبارك والشرطة؟ مع إن الاتنين اسوأ من بعض.

إزاى تختذلوا هيبة الدوله فى شخص فرد او مؤسسة ؟
ثم إن هيبة الدولة لا تسقط بإسقاط الساقطين اساسا.
ثم ليه ماقلتوش ان هيبة الدولة سقطت لما بناتنا إتعروا مرتين ... مرة عشان نتأكد من عذريتهم ومرة واحنا بنسحلهم. مع إننا دولة اسلامية ومسيحية صعيدية ... عارفين قيمة الشرف والعرض وعارفين انه لما بيضيع بيضيع هيبة الشنبات اللى وراه.

وبالنسبة لأمن الدولة ... أمن دولة ايه اللى اتفكك ؟
ماهو هو هو تحت مسمى الامن الوطنى. ومن المفترض انه بيمارس وظيفته العادية، ولا هو مايعرفشى يمارسها غير لما تكون مغلفة بوسائل التعذيب عشان الظابط يحس انه فى جو نفسى لطيف ويقدر يشتغل !!
مايشوف هو كان بيحصل على المعلومة ازاى قبل الثورة وبيحصل عليها دلوقتى ازاى، مش أمن الدولة شغلته يحافظ على النظام ؟ ولا هو بيحمى الانظمة الفاسدة بس ؟

وكل شوية واحد يطلع يقول مش انتوا اللى بهدلتوا الشرطة !! ... عشان كده الامن المركزى مش بيتدخل فى الأحداث (زى احداث بورسعيد( ... اصله لو اتدخل هاتقولوا الشرطة بتضرب !!

افندم ؟ ... ليه ؟ ... هو احنا قاعدين فى حوش ام تيتى ولا واقفين فى خناقة ؟ والامن المركزى خايف يتدخل تحت بند ماينوب المخلص الا تقطيع هدومه.
دى دولة وفيها قوانين يا سادة، والمفروض انه يكون الامن المركزى مدرب على تأمين الماتشات ويكون عارف يعمل ايه فى الظروف اللى زى دى مهما حصل حتى لو على حساب حياته ... هو مش احسن من اللى راحوا.

ثم هو مش شايل حياته على كفه ؟ازاى بيقف بمنتهى الجبن يتفرج ؟ ولا واخد اوامر انه يتفرج؟

واية حكاية كسرتوا نفس الشرطه ؟ ... الظباط اللى نفسيتهم تعبانة يتعالجوا نفسيا.
ولو الامن المركزى غير مؤهل نفسيا ... نأهله.
ولو فيه لواءات فعلا بينفذوا اوامر العادلى لحد دلوقتى ... يتحاكموا
لو الداخلية كلها مش عايزة تشتغل ... خلاص تمشى ونخرج من كلية الشرطه على نضيف.

انما الوضع الامنى البشع ده مستحيل يستمر. و ان احنا نوصل لمرحلة انه ممكن اى حد ينضرب عليه رصاص فى الشارع وكأننا فى شيكاغو فدى كارثة بكل المقايييس .. ولما نشتكى الناس تقول مش انتوا اللى كسرتوا نفس الشرطه ؟ !!!!

انا عارفه ان الشرطة والشعب، الاتنين، ضحية نظام فاسد ركب دول فوق دول عن طريق التطبيقات الخاطئه للقوانين. والشرطة دلوقتى بتجنى ثمار اللى عملته وبتدفع تمنه من انتقام الشعب منها وفش غل السنين فيها.

انا عارفه انه صعب ان الواحد يشتغل فى ظل الظروف دى، وعارفه ان الشعب ماعندوش وسط ... يا اما يرضى ينضرب على قفاه من غير سبب يا اما يضرب الظابط على قفاه من غير سبب.
ولكن ياحضرة الظابط اتقى الله فى عملك ومتعاقبشى الشعب عشان هو اتهان منك كتير ... اتقى الله فى عملك ومهنتك لانها مهنة انسانية. فتوفير الامن للناس ثوابه كبير عند ربنا، ولكن المساهمة فى ترويع الامنين بشكل او بأخر اكيد عقابه شديد.

وتذكر ان اللى بتعاقبهم دول مش من كوكب تانى، هما قرايبك واخواتك وجيرانك واصحابك وممكن حد فيهم يموت ضحية إهمال أوسلبية أوتواطىء ظابط ماعندوش ضمير ..

طب ده دمه بقى فى رقبة مين ؟؟؟

وفاء شلبى