#هند_يوسف: 5 طرق للتعامل مع "مالك؟ .. مفيش"

كتب بواسطة: هند يوسف في . القسم انسانيات

 


كلمة مالك اكيد بتريح بس بالنسبة لناس تانيه دى كلمه تقيله اوى !!!

طيب مين اللى قال ان الزن وإن الواحد يفضل يسأل اللى قدامه "مالك" وهو مش عايز يقول ... رغم انها يمكن حاجة سخيفة بس اوقات كتير بتكون حاجة حلوة وجدا كمان ..

انا مقتنعة إن كل حاجة فى الدنيا ممكن تتحس وتتفهم بأكتر من طريقة على حسب برضه الطريقة !!!

- مالك؟
= مفيش
- طيب براحتك ماتيجى معايا مشوار كده عايزك فى مصلحة

النتيجة: لا تعليق ... واحد متأكد ان اللى قدامه فيه حاجه بس طز ياعم المهم ييجى معايا مشوارى ونخلص المصلحة، لسه هنقعد نرغى مالك ويقولى مفيش !!!!!!!!!! والله العظيم الناس دى موجودة وفيه منهم كتير كمان ..

 

حوار تانى:

- مالك
= مفيش
- لأ فيه
= مفيش بس زهقان شويه
- عادى ما ده الطبيعى بتاعك

النتيجة: طبعا واحد متضايق وقرفان وزهقان اكتر واكتر !!!!!!!!

 

حوار تالت

- مالك؟
= مفيش
- لأ فيه
= لأ مفيش
- طيب اهدى كده وكله بيعدى (مع شوية طبطبة وحضن كبير)
و بعد يومين تلاته كده
- انا سيبتك تهدى اهو احكيلى بقى مالك

النتيجة: بقى احسن وكمل يومه عادى وهو كويس بس هو شخصيته كده بيحب يهدى شويه وبعدين يتكلم

 

حوار رابع

- مالك
= مفيش
- لأ فيه .. انت هتخبى عليا طيب ممكن تعمل كده مع كل الناس لكن انا بافهمك من شكل وشك ومن غير حتى ما تتكلم
= عادى زهقان شوية وعندى شويه مشاكل
- طيب هسيبك شوية تهدى وبعدين نتكلم علشان تبقى احسن
= اوك خلاص و الرد اللى فى سره "لأ متسبنيش"

 

حوار خامس

نفس الحوار الرابع مع شوية زن اكتر انك هتقول مالك وفيه ايه
وبعد شويه زن حلوين كانت النتيجة ساعتين فضفضة خرجوا كل المستخبى
= فيه ............. وفيه ............. وفيه ..............وفيه .............. وحصل ............... وحصل ............

يااااااه شكرا ارتحت لما اتكلمت وخلصت الحكاية ..

 

الطريقة بس هى اللى بتفرق، فيه ناس بتعرف تخلى اللى قدامها يطلع اللى جواه وبكل سهولة كمان لمجرد انهم حاولوا شوية زيادة وعملوا مجهود انهم يعرفوا مفتاح الشخص ده وفيه ناس لأ ..


كتير بنقول لنفسنا اننا بنرتاح اكتر لما نكتم جوانا ونخبى بس ده بيكون الظاهر لكن اللى جوانا غير كده ، اكيد اللى بيفضفض بيرتاح بس المهم انه يكون مع الانسان اللى يخليك تهدى مش تتضايق اكتر !!!


#الفضفضة_مفيدة_للصحة
#فضفضوا_تسعدوا

 هند يوسف