#فادى_رمزى يكتب: لو عايز تعيط

كتب بواسطة: فادى رمزى في . القسم سياسة

 

 


فيه واحدة فى جنوب سينا وهى بتولد كانت هتموت لان مفيش دكتور نسا فى المستشفى اللى مصروف عليها 20 مليون ونقلوها لاقرب مستشفى على بعد ساعتين والبيبى نصه طالع منها وطبعا البيبى مات وهى مش هتحمل تانى ... عيطت ولا لسه؟

وفيه بيبى عنده 7 شهور فى شلاتين جاله جفاف ونتيجة لعدم وجود محلول معاجلة جفاف ولا رعاية صحية فى المستشفى اللى مصروف عليها 100 مليون جنية هناك جاله شلل نصفى ومستقبله راح ... عيطت ولا لسه؟

وفى شلاتين الناس بتشرب مياة غير صالحة للاستخدام الادمى بموجب نتائج تحاليل من معامل وزارة الصحة ... عيطت ولا لسه؟

وفى سيوة فيه اطفال كتير فقدوا حاسة السمع تقريبا لان مفيش جهاز تنظيف للاذن فى المستشفى اللى مصروف عليها ملايين على السيراميك والرخام ... عيطت ولا لسه؟

وفيه منطقة اسمها راس بناس فى البحر الأحمر الناس عايشة فيها فى اكواخ على البحر مع بيوت قليلة من الخرسانة يحتموا بيها وقت العواصف ... يفصلهم عن الطريق حقل الغام ومسموح لعدد محدود منهم يطلع يجيب خضار مرتين فى الاسبوع وبيجيلهم مياة مرة فى الاسبوع ولو خلصت بيقضوها من مية البحر .. مش فاهمين يعنى ايه دوا وعلاج اساسا ... عيطت ولا لسه؟

وفى نصر النوبة ونجع العرب فى اسوان اطفال وكبار اول مرة يشوفوا دكتور اسنان، اللى ضرسه بيسوس منهم بيسافر اسوان يخلعه لان بيوصل لمرحلة ان مفيش منه رجا مع ان فيه عيادة اسنان فى الوحدة الصحية مصروف عليها مئات الالاف من الجنيهات بس مفيش دكتور سنان .. وما قولكش على نسب فيروس سى والاصابة بالسكر هناك بدون توافر اى دوا او علاج ... عيطت ولا لسه؟

فيه اطفال بتموت بسبب نقص الادوية الاساسية .. ومنها المحاليل .. فى نفس الوقت اللى جهات حكومية بتعدم المحاليل اللى عندها لانها مش بتستخدمها ... عيطت ولا لسه؟

سيبك من الصحة ... 

فيه شاب فى كفر الشيخ اتخرج من هندسة وقدر يعمل نموذج لوحدات طاقة شمسية بسعر مخفض ويوفر كهرباء لقريته .. مباحث الكهربا طاردته وكانت هتقبض عليه وحاليا هو طفشان بره البلد ... عيطت ولا لسه؟

فيه شباب تانيين عملوا مشاريع للتخلص من الالغام فى الصحراء الغربية بتكلفة قليلة .. داخوا على المسئولين ومفيش فايدة .. فى نفس الوقت اللى كل لغم بينفجر فى حد من اهالى المنطقة بيضيع حياته او يسبب له اعاقة دائمة ... عيطت ولا لسه؟

سيبك من الصحة والعلم .. 

فيه ست عجوزه بتلف فى الشارع تشحت عيش ... ايوة عيش مش فلوس .. وبتاخد بواقى الارغفة من على عربيات الفول ... عيطت ولا لسه؟

فيه اطفال بتصارع كلاب الشارع على بواقى الاكل المرمى فى الزبالة ... عيطت ولا لسه؟

سيبك من الصحة والعلم والأكل .. 

 فيه شاب مراهق اتثبت من 3 شباب فى سنه واخدوا منه بس الفلوس ... قالوله احنا عايزين نجيب اكل .. وسابوا معاه الموبايل وكام جنية يروح بيهم ... عيطت ولا لسه؟

فيه مدينة اسمها العريش، عاصمة شمال سيناء بالمناسبة، فيها راجل كبير الناس كانت ببتبارك بيه ... اخده التكفيريين من بيته فى وضح النهار ودبحوه فى الشارع ... الموقف ده اتكرر كتير مع ناس اتهمهم التكفيريين انهم بيساعدوا الامن بطريقة مباشرة او غير مباشرة ... عيطت ولا لسه؟

فيه شوية عيال مراهقين فى نفس المدينة اللى اسمها العريش دى اتقبض عليهم وبعدها بكام شهر حصلت حادثة ارهابية والامن طلع جثثهم مضروبة بالنار وقال ان هم اللى عملوها ... والاهالى مش عارفين يعيطوا ولا يصوتوا ولا يحسبنوا من الظلم والقهر اللى ضيع منهم عيالهم ... ها عيطت ولا لسه؟

فيه عربجى مسكين ظابط شرطة قعد يضرب فيه لحد ما قتله ... الضابط ده اخد اخلاء سبيل من النيابة ... عيطت ولا لسه؟

فيه ناس فى الصعيد، اتهاجمت بيوتهم واتعرت ستاتهم واتحرقت ممتلكاتهم واتمنعوا من اداء صلواتهم ... وفى النهاية الأمن بتاعك وافق على تهجيرهم من اماكنهم بدون تعويضهم ... عيطت ولا لسه؟

ناس زيهم برضه، فى منطقة اسمها رفح، امرت بتهجيرهم من بيوتهم بدون تعويضهم عن الارض او عن المبانى ... والتعويض اتصرف بس للى عنده بيت خرسانة وكان ملاليم لا تسوى .. الناس دول عايشين لاجئين فى منطقة قحط مافيهاش اى خدمات وبيموتوا من فرط الاهمال والحسرة ... عيطت ولا لسه؟

فيه ناس تانيين فى منطقة اسمها النوبة بقالهم عشرات السنين بيترحلوا وبيتهجروا عن بيوتهم ... راح منهم جيلين بسبب قسوة البيئة فى المناطق اللى اتهجروا ليها ... لا عندهم تعليم ولا علاج ولا تنمية بأى صورة ... والارض اللى اتوعدوا بيها علشان يزرعوها ويعيشوا من خيرها اتخصصت لغيرهم ... عيطت ولا لسه؟

سيبك من الصحة والعلم والأكل والفقر والأمن ... 

و انا رايى تسيبك خالص من المسئولية .. وساعتها كلنا هنعيط من الفرحة.

فادى رمزى