مكالمة بين السيسى وامه من امريكا

كتب بواسطة: أحمد السيسى في . القسم منوعات

 

سافرت بره مصر فى مهمة عمل تستغرق عدة شهور ... وطبعا امى محلفانى ان كل يوم اكلمها واطمنها ... وده جزء من مكالمه مع ماما النهارده.

- الو ازيك يا مامتي

- ازيك يا حبيبي

- الله يسلمك

- عامل ايه يا حماده

- الحمد لله ياحبيبتي زي الفل وحشتيني يا قمر

- انت اللي وحشتني ووحشتنا كلنا والله

- انت مكلمتنيش امبارح باليل ليه؟

- معلش يا حبيبتي اتشغلت شويه

- اوعى تكون بتروح تسهر في النوادي اليليه بتاعتهم دي .

- ههههههههههه نوادي ليليه ايه يا ماما هو انا بتاع الحاجات دي ما انتي عارفاني ... انا بتاع نايت كلابس بس

- (ما اخدتش بالها وكملت) واوعي تكون مش بتصلي ربنا يحفظك وييسر امرك

- الحمد لله بصلي

- انت فطرت ولا لسه ؟

- اه الحمد لله

- بالله عليك فطرت؟؟

- اه بجد (مكنتش لسه فطرت طبعا)

- كل كويس يا حبيبي بالله عليك

- حاضر يا ماما

- صليت الصبح ؟

- أه طبعا ( كنت لسه مصليتش)

- أخبار الشغل ايه وهاترجع أمتي؟؟ انت وحشتنا اوي .. تعالي كفايه كده ما الفلوس موجوده الحمد لله

- حاضر يا ماما هاظبط شويه شغل وارجع إن شاء الله

- اوعي تكون كلمت البنت الخوجايه اللي قولتلي عليها تاني

- لاء طبعا يا ماما والله ما حصلش ( فعلا محصلش )

- اوعى يا حبيبي

- ياستي خلاص مش بكلمها

- ولا تكلم غيرها

- انا اصلا قطعت لساني

- بعد الشر عليك ان شاء الله هي مش انت . هههههههههه

- هاتتغدي ايه النهارده ؟

- لسه هاشوف لما أنزل

- طيب كل كويس ومتبخلش علي نفسك

- حاضر يا حبيبتي

- بتلبس الكلاسين اللى جبتهالك من قطونيل؟

- ايوة يا ماما (طبعا لا)

- انت بتاكل ايه هناك ؟!

- بأكل بيتزا

- بالهنا والشفا يا حبيبي .. اوعى تكون بتشرب من الحنفية انا بشوف الناس عندك في ايدها ازايز مياه معدنية ؟!

- لاء يا ماما حنفية ايه انا بشتري مياه ايفيان

- ايه ايفيان دي ؟؟!

- إيفيان يا ماما مش عارفاها

- لاء يا حبيبي انا أخري كان الزير بتاع ابويا

- دي مياه اللتر ب 2.5 دولار يا ماما

- 2.5 دولار اللتر يعني 50 جنيه!!

- اه يا ماما علشان مياه نضيفه

- طيب يا حبيبي عيش حياتك ... الله يرحم ... أمك كانت بتشرب من الترعة

- ههههه

طب بقولك ايه

- قولي يا ماما

- الرئيس جاي امريكا قريب عايزاك تروح تستقبله

- رئيس مين دا ؟

- السيسي

- ياااااااه يا ماما هو انتي لسه متوبتيش؟ كفايه كدا بقي يا ماما سيسي مين دا اللي استقبله

- عيب كده يا قليل الأدب

- حرام عليكي بقي يا حاجه مش كفايه اللي البلد وصلتله والعيش اللي الناس مش لاقيينه والأسعار اللي ولعت نار

- اه كلام الخرفان بقي.

- يا ماما خرفان وجديان ايه يعني انت مش شايفة اللي بيحصل ؟!

- شايفة بس دي مرحله وهاتعدي إن شاء الله والبلد هاتتظبط

- اه طيب يا ماما

- بقولك انت لازم تروح تستقبله مع الناس في المطار

- يا ماما دا في واشنطن وانا في كاليفورنيا

- مش انت اشتريت عربيه؟!

- اه

- روح بيها بس بالله عليك سوق علي مهلك

- يا ماما دا مشوار طويل جدا

- هايجي ايه يعني في الصياعه والسفر اللي كنت بتسافره في مصر

- لا يا ماما دا أبعد بكتير

- خلاص خد طيارة ( مصره اني اروح )

- هو أحمد موسي جاي معاه ؟؟

- اه اكيد

- لا كده بقي لازم اروح استقبلهم ( روحها ردت وفرحت )

- يعني هاتروح ؟

- اه طبعا

- طب ابقي خد معاك علم مصر وافتخر ببلدك وبرئيسك

- لا انا مش رايح افتخر انا رايح علشان أرزع أحمد موسي قفا وشلوط 

- يا قليل الأدب 

- ههههههههههه ... يا ماما كفاية كده بقي دول خربو البلد 

- لو حد تاني اللي بتقول كده غيرك مكنتش كلمته بس مقدرش ازعل منك

- هقول لبابا علي فكره ( أصل بابا بيكره السيسي جدا )

- يلا يا*؛"،؛،*' .... المهم خلي بالك من نفسك وكل كويس ومتبخلش علي نفسك واتغطي باليل حتي لو الجو حر وصلي العشاء وطمني عليك باليل

- حاضر يا حبيبتي

قفلت وانا متخيل لو روحت واشنطن وعملت اللى نفسى فيه الجرايد هتكتب ايه: "السيسى يضرب موسى بالشلوت" ... ضحكت فى سرى ودخلت افطر واصلى ... الواحد ما ينفعش يكسر كلام امه ابدا.

أحمد السيسى (ايوة ده اسمى)