#أبلة_تفيدة: حكاية مصاريف المدرسة

كتب بواسطة: أبلة تفيدة في . القسم منوعات

 

 

رجعنا مع حكايات المدارس و نكمل سلسلة التغييرات الخزعبلية للمدرسة المهلبية ..

اتكلمنا قبل كده عن عدد الولاد فى الفصل وتسلسل ضياع الوعود ... وبعدها اذ فجاة، الفصل مش بس عدد الولاد فيه زاد لا و كمان بقي مدرسة فصل واحدة بس !!

كان الاول مدرسة اساسية و واحدة مساعدة و عدد ٢٦ ... رؤيتهم اللولبية خلتهم زودوا العدد و نقصوا مدرسة كانت بتساعد الولاد وخلوا بس المدرسة الاساسية.

اصبح الوضع طبعا مذري، و ا الولاد بتفهم و لا سامعة و المدرسة غلبانة مش عارفة تركز مع ده و لا تسيطر علي ده ..

كل ده احنا في مدرسة خاصة بمصاريف جهنمية.

يا نهار الوان ، اومال لو مكناش كاعيين دم قلبنا ، كان ايه الي حصل ؟!!!

و اودام دا كله المصاريف زادت !!

اوباااااا ، دي زادت و غطت ..

ولي الامر الغلبان راح سأل فى الإدارة :ليه المصاريف زادت ؟

الإدارة المهلبية ردت : عشان الدولار زاذ و اتعملنا اعادة تقييم.

ولى الأمر : انا مالي و مال الدولار !!

المهلبية :ما احنا عندنا كتب بنجيبها من برة ... (هههههههه و يارتنا خدناها)

ولى الأمر : طب اعادة تقييم ده للمدارس كل ٥ سنين ، انتوا لسة مكملتوش ٣ !!

المهلبية : لا بقت كل ٣ سنين !!!

ولى الأمر: طب زادت كام ؟

المهلبية : ٣٠ % (يا موررك يا مهجة)

ولى الأمر : طب فين الموافقة من الوزارة ؟ طب فين الورقة اللي رسميا كل مدرسة لازم تعلقها بمصاريفها ؟؟؟ طب فين حباية الضغط ؟!!

طب موقع الوزارة الالكتروني قاري فيه ان لسه مصاريفكوا بالزيادة القانونية بتاعة الوزارة ... فين ما يثبت الزيادة ؟؟؟

كلها تساؤلات بدون إجابة من اي حد مسؤول في المدرسة.

كفاية كدة انهاردة ، و نكمل حكايتنا مع ابلة تفيدة مرة تانية

دمتم بخير .. استنونى لسه حنحكى كتير.

ابلة تفيدة