#فادى_رمزى يكتب: حوارات ليالى أعياد

كتب بواسطة: فادى رمزى في . القسم منوعات

 

 

فى إحدى ليالى عيد الميلاد المجيد قبل 2011 بالتحديد:

- بس يا عيال خلونا ناكل من غير دوشة

- ياااااه .. ده الواحد كان نسى طعم اللحمة

- لأ خف شوية فى الخل والتوم ع الفتة، معدتك مش واخدة على كده

- مش متخيل اللى فى الكاتدرائية دول مستحملين ازاى، ده لو القداس طول عن كده انا كنت هقع م الجوع

- قلت لك تاكل تصبيرة قبل الكنيسة

- لا يمكن .. فول تاااانى .. انا خلاص بطنى نشفت

- ايوة ناولينى الملبسة اللى هناك دى

- الواحد بيمضغ يا جماعة الأكل الصيامى بلع بس، مافيش حاجة تقطمها

- بس الصيام ده ارحم ع الأقل فيه سمك ... الصيام الكبير ده بيبقى صعب اوى

- بس بس .. هنجيب سيرة الصيام الكبير من دلوقتى

- هتقضوا العيد عند حماتك برضه

- ايوة يا امى خلصنا بقى من الحوار ده ... ماتيجوا معانا

- ماينفعش، وخيلانك اللى جايين نقول لهم بلاش تيجوا

- هنعدى عليكم زى كل سنة يا طنط

- تأنسوا وتشرفوا يا بنتى، بس تعالوا بدرى

- ايوة عشان نلحق ورق العنب وشوية من البيتى فور

- مالك ؟؟ .... بالراحة بالراحة .... هاتى مية بسرعة لأبوكى

- خلاص خلاص .... حطيلى معلقتين فتة بالعدد وحتة لحمة صغيرة

- محمرة ولا مسلوقة

- واحدة وواحدة

- ماتنساش الديسفلاتيل بعد الأكل، مش عايزين عكننة بكرة انا عايزاك تدوق الرقاق

- هو فيه رقاق بكرة يا تيتة

- ايوة يا حبيبتى، بس بيبقى ع الغدا ... انتم بس لو تستنوا وتتغدوا معانا تدوقوه

- طب حطيلى حتة جبنة احدق بيها

- المرة الجاية اعملى صينية رقاق زيادة لليلة العيد علشان العيال يدوقوه

- عينيا .... وبكرة لما تيجوا هطلع لكم ف الخباثة كده حتة بالجبنة وحتة باللحمة

- بس يا جماعة مش طايق اسمع سيرة اكل تانى

- يااااااه بقى ده طعم البيض بقى اللى كان الواحد بيسمع عنه ... ادينى بيضتين احبس بيهم

 

-----

 

 ليلة عيد الميلاد 2014

- بس بقى مش عايزين كلام فى السياسة دى ليلة العيد

- ياااااه .. ده الواحد كان نسى طعم اللحمة

- الأسعار بقت نار اليومين دول حاجة مش معقولة

- بالهنا والشفا ما تعكننوش علينا ليلة العيد، ربنا يسهلها ونعدى من الهم ده بسرعة

- البركة فى الجيش هو اللى هيظبط كل حاجة ، خف شوية فى الخل والتوم

- يا اونكل مش كل حاجة نرميها ع الجيش

- بس يا مينا ... كل وانت ساكت

- ما تسدش نفسنا بقى بكلامكوا ده خربتوا الدنيا وطلعتوا ما بتفهموش حاجة والجيش هو اللى لم البلد فى الآخر.

- هى كده ملموة !! ... طب لو ..

- بس بقى هتسدوا نفس الواحد، ده انا على لحم بطنى من بعد الفطار

- - قلت لك تاكل تصبيرة قبل الكنيسة

- لا يمكن .. فول تاااانى .. انا خلاص بطنى نشفت

- خدلك طيب الملبسة دى من ايديا

- عندكوا هينزلوا فى الاستفتا طبعا

- ماحدش مش هينزل، واكيد أبونا هينبه الحد الجاى

- شفتم اللى حصل الجمعة اللى فاتت ... مافيش لحمة محمرة ولا ايه؟

- أهيه عندك، ناولى ويصا يا تريز ...  

- الله يحرقهم مش فاهم ليه سايبينهم يعملوا كل ده

- ويتشطروا بس على مظاهرات الـ ..

- ميييينا .... انا منبهه عليك من الصبح، يا اما تاخد طبقك وتاكل فى اوضتك

- كح كح كح .... كككككككح كح كح

- مالك يا حنا ... كوباية ميه لأبوكى يا مارينا

- خلاص خلاص ... حتة لحمة وقفت فى زورى، الواحد متعود يمضغ يا جماعة الأكل الصيامى بلع بس، مافيش حاجة تقطمها

- الله يسامحك يا مينا زوورت أبوك ...

- أنا اتكلمت خالص !! ... انتم اللى فتحتم موضوع الإستفتاء

- بس بس .. هنجيب سيرة الاستفتا من دلوقتى

- ها ... هتقضوا العيد عندنا السنة دى بجد .. انا مش مصدقة

- ماهى مامى سافرت كندا عند اخويا ... صمم تقضى العيد معاه السنة الدى.

- هى ماصدقت ... وضع البلد بقى صعب قوى الصراحة حاجة تقرف

- السيسى هينزل يقش كل ده قريب ان شاء الله وينيم الكل فى الجحور

- هو السيسى ضامنينه يعنى قوى كده ازاى؟

- مييينا

- سيبيهولى معلهش يا انجيل ... ناولنى رقاق من عندك وقولى مين اللى ينفع يمسك البلد دلوفى

- ماينفعش حد جيش ماحنا جربناهم قبل كده يا اونكل، باللحمة ولا بالجبنة؟

- واحد وواحد ...

- حوشوا شوية لجوستينا وكيرو ... انا عاملاهالهم مخصوص.

- بص يا مينا احنا اكبر منك وشفنا كتير فى البلد دى، هى ما تتحكمش غير بالجيش وعايزه ايد جامدة تلمها. وده راي الناس كلها على فكرة مش انا بس.

- طب ما تلمتش قبل كده ليه ؟؟؟ ماهى الطريقة دى جابت لنا الثورة

- مينا ... والمسيح الحى لخليك تدخل اوضتك

- مش اونكل قالك سيبيه ... وبعدين ماحطتيش لحمة محمرة ليا ... حاطاها بعيد ليه

- بلا ثورة بقى بلا كلام فارغ ... خلونا نعيش بقى بسلام ونستريح من الهم ده

- يااااااه بقى ده طعم البيض بقى اللى كان الواحد بيسمع عنه ... لا كفاية بيض بقى لحد كده.

---

ليلة عيد الميلاد 2017

- ياااااه .. ده الواحد كان نسى طعم اللحمة

- كويس اننا عرفنا نتحصل عليها ... من بعد الدولار الاسعار بقت نار

- بالهنا والشفا ما تعكننوش علينا ليلة العيد، ربنا يسهلها ونعدى من البلوى ده بسرعة

- واسم الله على حس مينا .. هو ماعرفش ينزل ع العيد؟

- لا ما عرفش لسه ماعداش عليه سنة فى شغله هناك، ربنا يعينه ... مش قادره اتعود على غيبته

- كان زمانه بيناقر فينا اول ما تقولى الاسعار بقت نار

- هو يا عينى بطل يتكلم معانا خالص ... وبقى على الفيس بوك يسكت يسكت بعدين يتكلم كلام جامد اوى

- لاااا .. قوليله يهدا بس ليستقصدوه ولا يعملوا فيه حاجة لما ييجى نازل.

- ما تسدوش نفسنا بقى بكلامكوا ده ... ربنا يرجعه بالسلامة ويسترها معانا

- اه ... اهو حالنا احسن من بلاد تانية كتير ..

- بس بقى .. انا على لحم بطنى من بعد الفطار وعايز اكل بمزاج.

- - قلت لك تاكل تصبيرة قبل الكنيسة

- لا يمكن .. فول تاااانى .. انا خلاص بطنى نشفت

- خدلك طيب الملبسة دى من ايديا

- انتوا عديتوا ع الكنيسة قبل ما تيجوا؟

- لا لقيناها زحمة اوى ومانعين الركنة من حواليها ويصا قال خلاص بقى بدل ما نتاخر عليكم

- عندهم حق ... ربنا يعدى الليلة دى على خير

- ابونا صمويل قال الكنيسة بتحميها الملايكة دايما ماحدش يقدر يمسها ... مافيش لحمة محمرة ولا ايه؟

- أأأ .... لاااا .. ماعملتش السنة دى بقى قلت ماحدش بياكل غير مينا حبيبى .. مش تقولى يا تريز ان ويصا بيحبها

- لا ده بيسال بس .. الدكتور مانعه من الحاجات دى ما تشغليش بالك اهو الأكل كتير اهوه .. خد بيضة تانية يا ويصا

- انا من يوم البطرسية وانا مش حاسس بطعم اللقمة .. ذنبهم ايه بس

- دول فى حضن المسيح والملايكة .. شفت ام البنات اللى راحوا يا عينى بتقول ايه

- اه شفت بس ماقدرتش اكمل .. انا هتجنن والله عمرنا ما شفنا كده

- كح كح كح .... كككككككح كح كح

- مالك يا حنا ... كوباية ميه لأبوكى يا مارينا

- خلاص خلاص ... حتة لحمة وقفت فى زورى، الواحد متعود يمضغ يا جماعة الأكل الصيامى بلع بس، مافيش حاجة تقطمها

- كفاية بقى كلام يوقف اللقمة فى الزور

- علشان ما تبقيش تلومى مينا بقى يا ماما اهوا بابا زور لوحده

- بت يا مارينا .. بقولك ايه ما تعمليش زى اخوكى لتاكلى فى اوضتك

- لا انا هخليه يقدم لى على مدرسة هناك واحصله

- هتسيبينى انا وابوكى يا مارينا؟

- يعنى عايزنى اقعد ومافتحش بقى ... ميصحش كده

- يا مارينا بلاش كلام من ده ابوس ايدك ... مش فاضل لنا غيره هنتريق عليه كمان ... خدى بيضة واتلمى

- والله السيسى ده معذور يعمل ايه فى بلد خربانة

- هى البلد مالهاش قومة طول ما فيها الاخوان والسلفيين والافكار المتطرفة دى .. شفت اللى اندبح امبارح فى اسكندرية

- برررضه بتقولوا اخوان

- مارينا وبعدين معاكى؟

- يا بنتى انتى لسه صغيرة ومش فاهمة حاجة .. الجهل ده معشش فى دماغهم ... هاتيلى بس مغرفة فتة كمان

- مش عايز لحمة؟

- لا كفاية خليها لجوستينا وكيرو ... حبايب قلبى اول مرة تسهروا معانا .. عوضتم غياب مينا والله

- هو صحيح مين احمد ده اللى مينا بقاله يومين بيتكلم عنه وبيقول مظلوم وكده

- ده واحد صاحبه يا طنط اتقبض عليه فى مظاهرات تيران وصنافير

- وهو ماله بالاشكال دى؟؟ ... لا خلوه بعيد عنهم لحسن يستقصدوه زى ما ويصا قال

- ربنا يحمينا كلنا ... بس والله العيال دى صعبانه عليا وانا مابقتش فاهمة حاجة

- خلونا فى حالنا ... كل شوية يطلع موضوع يعمل فرقعة كده .. البلد لازم تهدا شوية

- هتهدا لما يبيعوها كلها يا اونكل

- بت يا مارينا ... ادخلى اوضتك خلاص كفاية اكل سديتى نفسنا

- انا داخله اهو هفتح سكايب مع مينا ... هريحكم خالص

- ...

- ...

- يااااااه بقى ده طعم البيض بقى اللى كان الواحد بيسمع عنه ... لا كفاية بيض بقى لحد كده.

 

 ----

كل سنة وكل المصريين طيبيين وربنا يسترها معانا ومع بلدنا اجمعين.

فادى رمزى