#مطبخ_مروة يقدم: شيش طاووقى ماوردش عند حد

كتب بواسطة: مروة فرجانى في . القسم مطبخ مروة

 

 

أنا مروة ام لحبيبى ياسين (سينو) و بحب اخلى الصعب سهل ... يعنى لو شرحت حاجة صعبة اعرف ابسطها و توصل سهلة ... و هو ده مبدئى فى مطبخ مروة ... الأكلة الصعبة أبسطها و أضيف عليها من عندى عشان تكون سهلة و سريعة و فى نفس الوقت لذيذة و شهية ... و الأكلة الجديدة اجربها، و بدل ما اشتريها غالية و مش عارفة نضافتها ازاى ، اعملها انا بنفسى و تبقى مضمونة و ارخص من المحلات بكتير.

وكتير بسأل الشيف فى الفنادق عن مكونات اى اكلة تعجبنى ... اصله مش عيب يعنى ... بس العيب انى ادفع كتير و اكل ابنى أكل مش مضمون عشان مسألشى.

معاكو بقدم حلو و حادق شرقى و غربى بخطوات سهلة و سريعة و يارب تعجبكوا.

بصوا بقى ... انا بحب الشيش طاووق جدا، بس انا بعمله من الصدور ... انا عارفة أن المطاعم بتعمله من وراك الفراخ، بس انا بحبه اكتر من الصدور لانى بحسها بتشرب التتبيلة اكتر.

المهم بقى أنها لما تتشوى تطلع مستوية و طرية، مش ناشفة من الشوى ... و هنا بقى سر التتبيلة.

 

المكونات :

- نص كيلو فراخ مقطعة مكعبات.
- فلفل رومى ألوان مقطع مكعبات و بصل مقطع و ممكن طماطم بس انا مش بحب الطماطم تتشوى.
- التتبيلة :
كوب زبادى
3 ملعقة كبيرة مسطردة
3 ملعقة كبيرة كاتشب
3 ملعقة زيت ذرة
ملح ، فلفل ، بهارات
حبهان مطحون، سوماء، ورق لورا مطحون
بصل مفروم
توم مهروس
لمون

الكميات للتوابل حسب الذوق و الطعم

الطريقة :

- وضع كل مكونات التتبيلة و نقلبها جيدا و نضيف الفراخ و ندعكها فى التتبيلة كويس نسيبها ليلة فى التتبيلة دى.
- تانى يوم ، نجيب الأسياخ الخشب و نبلها مية الأول عشان مش تحترق على الشواية.
- نرص فى السيخ وحدة بصل و وحدة فلفل رومى و وحدة فراخ و هكذا نكرر العملية دى لحد ما كل الفراخ تخلص.

- نبدأ فى الشوى و نقلبها لحد ما تستوى.

دوقى أحلى شيش طاووق زى بتاع المطاعم بالظبط و جنبها ممكن حبة بطاطس مقلى أو رز بالكارى و تبقى اكلة تحفة.

و بيطلع مستوى و طرى من الزيت إلى فى التتبيلة كمان حاجة كدة اوستيك شغل فنادق.

 ويجعله عامر وبالف هنا وشفا .. وفى مطبخ مروة متجمعين كلنا

 

 مروة فرجانى