#مطبخ_مروة يقدم: خديها منى نصيحة (3)

كتب بواسطة: مروة فرجانى في . القسم مطبخ مروة

 


عايزة تعملى حاجة جديدة و سريعة  ..

طب عايزة سفرتك تبقى مميزة و فى 10 دقائق ..

معايا أن شاء الله ده حيحصل ..

 

انا مروة ... أم لحبيبى ياسين ... انا خريجة السن انجليزى و شغلى مالوش علاقة خالص بحبى للمطبخ، بس بحب اكل البيت جدا و بحب اجرب اكلات المطاعم فى البيت، بس المهم تكون بسيطة، وبالتالى معنديش مشكلة انى أسأل شيف أى مطعم على الطريقة وأضيف انا التاتش بتاعى بعدها.

تكملة لموضوع نصائح المطبخ، اللى ابتديناها المقال السابق، أحب اشارك معاكوا حاجات جديدة جربتها و انبسطت منها جدا و أن شاء الله تعجبكوا برضه.

وإللى عنده نصائح مجربها ، يبعتهالى و نستفيد كلنا.

10- عايزة تحتفظى بالخضار أطول فترة طازة، حطى ورق كلينكس بتاع المطبخ تحت الخضار و هو فى الدرج عشان يمتص الرطوبة.

11- لو عملتى كيكة و لزقت فى الصينية و مش راضية تنزل ، هاتى فوطة و بليها مية سخنة و اعصريها و حوطيها تحت الصينية و سيبيها 10 دقائق.
جربى بقى تنزلى الكيكة من الصينية و أن شاء الله حتنزل زى الفل عشان البخار بتاع الفوطة حيتكثف و يفك الكيكة.

12 - أغلبنا بيستخدم معالق خشب و احنا بنطبخ فى حلل تيفال و سيراميك و مع الوقت بتغمق و ريحتها بتتغير، خديها و انقعيها فى مية بتغلى ربع ساعة و بعدين سيبيها تنشف فى الهوا حتلاقيها رجعت فاتحة و من غير ريحة زى الجديدة و ادعيلى.

استنونى مع نصائح جديدة من مطبخ مروة.

يجعله عامر وبالف هنا وشفا .. وفى مطبخ مروة متجمعين كلنا

 

 مروة فرجانى