#مطبخ_مروة: البطاطس المشوية بالجبنة

كتب بواسطة: مروة فرجانى في . القسم مطبخ مروة

 


عايزة تعملى حاجة جديدة و سريعة  ..

طب عايزة سفرتك تبقى مميزة و فى 10 دقائق ..

معايا أن شاء الله ده حيحصل ..

 

انا مروة ... أم لحبيبى ياسين ... انا خريجة السن انجليزى و شغلى مالوش علاقة خالص بحبى للمطبخ، بس بحب اكل البيت جدا و بحب اجرب اكلات المطاعم فى البيت، بس المهم تكون بسيطة، وبالتالى معنديش مشكلة انى أسأل شيف أى مطعم على الطريقة وأضيف انا التاتش بتاعى بعدها.

مين مش بيحب البطاطس ؟! يورينى نفسه كدة ..

البطاطس دى سبحان الله، الكل بيحبها ... و بتتاكل مسلوق و مقلى و مطبوخ و كمان مشوى.

وممكن نعملها اكلة أساسية أو طبق جانبى سلطة أو مقبلات.

عملنا منها قبل كده طبقين سلطة ؛ السلطة بالمايونيز و كمان بالتوم والكمون ... هتلاقوها فى وصفات قبل كدة.

النهاردة بقى حنشوي البطاطس ... أن أن آآآآآآآآن !!!!!

اه والله حنشويها ... و تكون زى المقبلات اللى فى الفنادق ... وبطريقة مش صعبة يعنى وحنطلع شغل فنادق 

المكونات : 

* 4 حبات بطاطس وسط
* فلفل رومى مقطع صغير
* زتون اسود مخلى مقطع صغير
* كاتشب
* جبنة موتزريلا.

 

الطريقة :
- تغسلى البطاطس كويس و تسبيها بقشرها، و تيجى عند اى جهة و تقطعيها بحيث تكون مستوية و تقف من غير ما تميل.

- بعد كده تقطعيها شرائح بس مش للآخر. يعنى البطاطس من القاع ماسكة نفسها ومن فوق تعملى فتحات بين كل شريحة زى ما هو واضح فى الصورة.

- تجيبى فويل أو ورق زبدة و تدهنيها زيت و تحطى البطاطس فيها، و تملى الفتحات دى كاتشب وبعدين تحشيها ب الفلفل الرومى و الزيتون و عليها الجبنة الموتزاريلا من فوق. (ممكن كمان الحشو يبقى جبنة بس و ممكن مثلا فلفل رومى و بسطرمة. اى حشوة على مزاجك)

- تلفيها كويس بالفويل أو ورق الزبدة و ترصيهم فى صينية و تدخليها الفرن على نار هادية 45 دقيقة لساعة.

- تطلعيها و تسببها تبرد و رصيها فى طبق و جنبها صوص الباربكيو أو صوص المايونيز مع الكاتشب.

تحفة و لذيذة جدا و بتكون ظريفة على السفرة.

يجعله عامر وبالف هنا وشفا .. وفى مطبخ مروة متجمعين كلنا

 

 مروة فرجانى