#مطبخ_مروة: قدرتك معاكى، باجورك شغال ... هتاكلى فول تمام

كتب بواسطة: مروة فرجانى في . القسم مطبخ مروة

 


عايزة تعملى حاجة جديدة و سريعة  ..

طب عايزة سفرتك تبقى مميزة و فى 10 دقائق ..

معايا أن شاء الله ده حيحصل ..

 

انا مروة ... أم لحبيبى ياسين ... انا خريجة السن انجليزى و شغلى مالوش علاقة خالص بحبى للمطبخ، بس بحب اكل البيت جدا و بحب اجرب اكلات المطاعم فى البيت، بس المهم تكون بسيطة، وبالتالى معنديش مشكلة انى أسأل شيف أى مطعم على الطريقة وأضيف انا التاتش بتاعى بعدها.

الفول المدمس اكلة شعبية مصرية لجميع الأعمار و الفئات. حتلاقى بسيط وميسور الحال بيضربوه يوميا وبيبقى فى رمضان اساسى فى السحور.

بيتقال عليه مسمار المعدة و ده حقيقى لأنه بيدى شعور بالشبع لساعات طويلة ..

يتاكل فى البيت و من على العربية ، ميقولشى لأ.

بس بصراحة فى رأيى مافيش أحلى من الفول المدمس فى البيت.

اتعودت من ماما انها تدمسه الخميس و ريحته تملى البيت و دا إعلان عن إجازة الجمعة و السبت، عشان دايما نفطر الصبح فى الاجازة بيه و نتلم على احلى فطار فى الدنيا.

ربنا يخليكى يا امى والله، أحلى طبق فول متبل فى العالم كله.

بس للأسف أغلب الناس بتكسل تعمله فى البيت مع أنه سهل جدا. دلوقتى حنعرف نعمله ازاى ... وانا مصورة القدرة و الباجور عشان تقولوا لفول الشارع no more.

المكونات :
- نص كيلو فول مغسول و منقوع فى المية من 6 ل 8 ساعات و الكمية طبعا حسب حجم القدرة بتاعك.
- 1 طماطم .س كدة.

الطريقة :

- خودى الفول إللى نقتيه كويس من الحصا وانقعيه 8 ساعات فى الميه.

- حطي الفول فى القدرة و امليها مية لحد تلات ارباعها. و حوطيه على النار على البوتجاز عشان تغلى.

- شغلى الباجور يسخن عقبال ما الفول يغلى على البوتاجاز.

- حطى في القول حبة الطماطم و غطيه و حوطويه على الباجور.

- مافيش أسهل من كده لأن دورك خلص خلاص .. سيبيه يستوى على الباجور من 5 ل 7 ساعات حسب نوع الفول و دوقيه.

- اول ما القشرة تستوى اعصرى لمونة و سيبى القشرة جوة و غطيه كويس بالمية عشان مش يسود منك.

- حوطى الفول فى طبق بالتتبيلة اللى تعجبك ... زيت ذرة و ملح و كمون و فلفل و لمون أو زيت زتون براحتك

و كلى أحلى فول طازة بيتى نضيف على كيفك.

يجعله عامر وبالف هنا وشفا .. وفى مطبخ مروة متجمعين كلنا

 

 مروة فرجانى