#مطبخ_مروة: شوربة عدس ... يم يم

كتب بواسطة: مروة فرجانى في . القسم مطبخ مروة

 


عايزة تعملى حاجة جديدة و سريعة  ..

طب عايزة سفرتك تبقى مميزة و فى 10 دقائق ..

معايا أن شاء الله ده حيحصل ..

 

انا مروة ... أم لحبيبى ياسين ... انا خريجة السن انجليزى و شغلى مالوش علاقة خالص بحبى للمطبخ، بس بحب اكل البيت جدا و بحب اجرب اكلات المطاعم فى البيت، بس المهم تكون بسيطة، وبالتالى معنديش مشكلة انى أسأل شيف أى مطعم على الطريقة وأضيف انا التاتش بتاعى بعدها.

الشتا وصل و شكله حيشد علينا شدة بضمير .. و طبعا مافيش أحلى من طبق شوربة عدس فى السقعة دى. بيضفى فى الصميم

 

المكونات :
- 2 كوب عدس من المعيار بتاعنا.
- 2 حبة طماطم
- 2 حبة بطاطس
- 2 حبة بصل
- 4 فصوص توم
- 4 جزرات
- ملح و كمون
- نص كوب شعرية متحمرة و مستوية زى طريقة الرز
- عيش محمص سخن .

الطريقة :

- نجيب كل المكونات اللى فوق دى ما عدا الشعرية و نقشرها و نقطعها و نحطها سوا فى حلة كبيرة و نغطيهم بالمية مع إضافة التوابل ملح و كمون .

- تسببها على النار تستوى مع بعضها و مافيش أسهل من كدة.

- استوت بقى ... لو عندك المالتى كويك، اضربى كل المكونات دى فى الحلة زى ما هى كدة و بعدين ضيفى عليها الشعرية إلى مستوية دى و رجعيها على النار تاخد غلوة.

- طب مافيش مالتى كويك، نضربوا فى الخلاط أو الصفاية اليدوى، كل شغال لأنها مستوية و مش حتاخد اى مجهود.

- ملحيها بالملح و الكمون و هى غلوة واحدة بس اول ما تحوطى الشعرية و قدميها مع العيش المحمص السخن و ادعيلى.

اكلة تحفة و مش حتكلم على فوائد لأن كلها خضار.

يجعله عامر وبالف هنا وشفا .. وفى مطبخ مروة متجمعين كلنا

 

 مروة فرجانى