#مطبخ_مروة: الكبدة حديد

كتب بواسطة: مروة فرجانى في . القسم مطبخ مروة

 


عايزة تعملى حاجة جديدة و سريعة  ..

طب عايزة سفرتك تبقى مميزة و فى 10 دقائق ..

معايا أن شاء الله ده حيحصل ..

 

انا مروة ... أم لحبيبى ياسين ... انا خريجة السن انجليزى و شغلى مالوش علاقة خالص بحبى للمطبخ، بس بحب اكل البيت جدا و بحب اجرب اكلات المطاعم فى البيت، بس المهم تكون بسيطة، وبالتالى معنديش مشكلة انى أسأل شيف أى مطعم على الطريقة وأضيف انا التاتش بتاعى بعدها.

الحديد ثم الحديد.

عنصر مهم جدا جدا ... و احنا مع الأكل بتاع اليومين دول ولا بناخد بالنا من حديد و لا فيتامينات و لا الهوا.

وطبعا مصدر اساسى للحديد هى الكبدة.

الكبدة ناكلها مقلية بردة و اسكندرانى و مشوى ... وطبعا بيتى عشان تضمن أنها كبدة مش اى عضو آخر. و طبعا المعنى فى بطن كل من أكل كبدة من العربية . واخدلى بالك !!

ما علينا ... يالا بينا نعملها النهاردة مشوية .. صحية جدا و قليلة الدهون و خفيفة و تحفة مع بطاطس مقلية و مكرونة محمرة.

المكونات:
- كيلو كبدة صافى متقطع شرائح وسط
- توابلك و هى توم مفروم و ملح و شطة و كمون و لمون و معلقة زيت عشان لما تتشوى، تفضل طرية.


الطريقة :
* ملحى الكبدة بالتوابل دى قبل الشوى بساعتين.

* سخنى الشواية و ادهنينها زيت و حطى الكبدة .بتستوى بسرعة جدا .مافيش 5 دقائق لكل جهة.

* متشويهاش جامد عشان مش تنشف و تفقد فوائدها. يعنى خليها مستوية و دمها نشف من غير متزودى سواها.

* إقلى بطاطس جنبها و سلطة طحينة و حبة مكرونة.

و لو بتشربى شاى بعد الأكل عشان تحبسى :) ، استنى ساعة عشان تستفيدى بالحديد لأن الشاى بيكسر الحديد .

بس كدة ... والتكة هى الزيت مع التتبيلة.

يجعله عامر وبالف هنا وشفا .. وفى مطبخ مروة متجمعين كلنا

 

 مروة فرجانى