#مطبخ_مروة: البنجر سلطة

كتب بواسطة: مروة فرجانى في . القسم مطبخ مروة

 


عايزة تعملى حاجة جديدة و سريعة  ..

طب عايزة سفرتك تبقى مميزة و فى 10 دقائق ..

معايا أن شاء الله ده حيحصل ..

 

انا مروة ... أم لحبيبى ياسين ... انا خريجة السن انجليزى و شغلى مالوش علاقة خالص بحبى للمطبخ، بس بحب اكل البيت جدا و بحب اجرب اكلات المطاعم فى البيت، بس المهم تكون بسيطة، وبالتالى معنديش مشكلة انى أسأل شيف أى مطعم على الطريقة وأضيف انا التاتش بتاعى بعدها.

سبحان الله ، ربنا جاعل لنا لكل مرض علاج فى الأكل ..

يعنى تلاقى اللى عنده نقص حديد، لو يأكل كبدة و طماطم مثلا يكون عالج نفسه طبيعى بدون أدوية. 

واللى مناعتها قليلة لو أكلت جرجير و بروكلى و فجل و بنجر بيرفعوا المناعة. و كله طبيعى و موجود فى السوق و سعره كويس.

وممكن كل دول يتطبخوا أو يتاكلوا فى السلطة أو يتخللوا كنوع من التغيير .... بس المهم دخول العنصر الجسم  ... سبحان الله.

النهارده حنعمل سلطة البنجر ... خفيفة و طعمة جدا و طبعا مفيدة بطريقة مش طبيعية. أنا شوفت ناس مرة عملت منها عصير بنجر و كيكة بنجر من كتر ماهى مهمة.

المكونات :
* كيلو بنجر مغسول كويس و بقشره
* ثوم مهروس
* ليمون و كمون و ملح و سكر
*معلقة زيت و خل و مية

الطريقة :
- نغسل البنجر كويس و نحطه بقشره فى حلة و مية و يتسلق كويس لحد ما يستوى.

- استوى خلاص، نبرده تحت المية و نقشره و هو دافى عشان يبقى سهل التقشير و نقطعه مكعبات.

- فى علبة زجاج  نحط معلقة كبيرة توم مهروس ، معلقة كبيرة عصير ليمون ، معلقة صغيرة زيت و خل و مية.

- رشة ملح و رشة سكر و كمون دا حسب الطعم.

- نقلب الخليط كويس.

- نضيف مكعبات البنجر و تكون دافية على التتبيلة دى و نقلب حلو و نغطيها. و يفضل تتساب فى التلاجة قبل الأكل كام ساعة عشان طعمها يكون أحلى.

- قدميها فى طبق حلو مع رشة كمون و حتعجبك جدا .

يجعله عامر وبالف هنا وشفا .. وفى مطبخ مروة متجمعين كلنا

 

 مروة فرجانى