#مطبخ_مروة: ال "ستيك" بطريقة اوستيك

كتب بواسطة: مروة فرجانى في . القسم مطبخ مروة

 


عايزة تعملى حاجة جديدة و سريعة  ..

طب عايزة سفرتك تبقى مميزة و فى 10 دقائق ..

معايا أن شاء الله ده حيحصل ..

 

انا مروة ... أم لحبيبى ياسين ... انا خريجة السن انجليزى و شغلى مالوش علاقة خالص بحبى للمطبخ، بس بحب اكل البيت جدا و بحب اجرب اكلات المطاعم فى البيت، بس المهم تكون بسيطة، وبالتالى معنديش مشكلة انى أسأل شيف أى مطعم على الطريقة وأضيف انا التاتش بتاعى بعدها.

 

اللحمة دى أشكال واسماء و كل جزء ينفع لاكلة معينة. و انا بصراحة بحب جدا ان اللحوم تتاكل من البيت، خصوصا بعد اللى بنسمعه بيحصل فى أغلى المطاعم من انعدام الرقابة وغياب الضمير.

ده غير السعر ... يعنى كيلو الاستيك بـ 85 جنية و الكيلو بخيره ... إنما المطاعم بتضرب السعر دا فى مرتين و نص. حتى وصلت فى محل معروف كيلو الأستيك ب 240 جنيه !! ليه بقى أن شاء الله.

سألت الجزار ، أحلى حتة ايه للأستيك و قالى الانتركوت أو الفيليه من الفلتو أو شرائح من وش الفخدة. انا خدت شرائح فيليه من الفلتو و قطعهالى شرائح طويلة.

يالا نعمل بخطوات بسيطة الأستيك المشوى ... و التحضير و التتبيلة أهم حاجة عشان يطلع زى المطاعم.

المكونات :

1- شرائح الفيليه من العرق الفلتو.
2- شاكوش الأكل عشان ندق اللحمة.
3- التوابل ( بصل،ملح، فلفل،ليمون،زيت،بهارات،زعتر،كارى،سوماء)


الطريقة :
* نجيب اللحمة و نصفها و نغسلها كويس ... اللى بيحبها ملبسة يسيب الدهون اللى حواليها أو تشيلها ... براحتك.

* ندق كل حتة بالشاكوش عشان نرفعها، و كمان النسيج يفك و تستوى بسرعة على الشواية.

* نجيب طبق و نحط كل التوابل، و تغطى اللحمة تماما بيها. و الليمون حيخلى النسيج برضه يساوى بسرعة و الزيت حيخليها طرية و متنشفشى من الشوى.

* سيبيها فى التمليحة دى قبلها بالليل و اشويها تانى يوم ... عشان تكون شربت كل الطعم و تطلع أحلى من اى مطعم مشويات.

* قدميها مع مكرونة و بطاطس مقلية و سلطة طحينة أو ممكن رز كبسة و مخلل ... اى أكل جنبها حتكون جميلة و اكلة متكلفة.

 

يجعله عامر وبالف هنا وشفا .. وفى مطبخ مروة متجمعين كلنا

 

 مروة فرجانى