#مطبخ_مروة يقدم: خديها منى نصيحة (4)

كتب بواسطة: مروة فرجانى في . القسم مطبخ مروة

 


عايزة تعملى حاجة جديدة و سريعة  ..

طب عايزة سفرتك تبقى مميزة و فى 10 دقائق ..

معايا أن شاء الله ده حيحصل ..

 

انا مروة ... أم لحبيبى ياسين ... انا خريجة السن انجليزى و شغلى مالوش علاقة خالص بحبى للمطبخ، بس بحب اكل البيت جدا و بحب اجرب اكلات المطاعم فى البيت، بس المهم تكون بسيطة، وبالتالى معنديش مشكلة انى أسأل شيف أى مطعم على الطريقة وأضيف انا التاتش بتاعى بعدها.

مقالة جديدة من خوديها منى نصيحة عشان كلنا نستفيد من نصائح متجربة.

13- دايما لو فرمنا لحمة فى المفرمة أو طحنا بهارات، مهما نغسل المفرمة و لا الكبة الريحة بتفضل فيها.

الحل مش استخدام صابون غسيل معطر، الحل فى فرم أو طحن عيش محمص فى الماكينة دى ... حمصى اى عيش قديم عندك نشف و مالوش استخدام و اطحنيه حيمتص الريحة على طول و بعد كدة أرميه.

14- لو حتعملى بطاطس بيوريه و بتسلقيها و عايزة كل البطاطس تستوى سوا واحد، و مش يتفتت فى الحلة أثناء السلق، ضيفى معلقة خل صغيرة مع المية و اسلقى البطاطس.

15- عشان تتخلصى من رائحة توم أو بصل من على cutting board أو من الايد ، استعملى الملح فى الغسيل لأنه بيطير الريحة .

16-  بتيجى فترة الليمون بيكون ناشف و مش بينزل غير نقطة عصير لمون ... الحل انقعى اللمون فى ماء ساخن نص ساعة قبل العصر حتجبلك من الاخر.

17- لسهولة تقشير فصوص التوم، انقعيها فى ماء بارد نص ساعة و بعدين قشريه. القشرة حتطلع بسهولة.

دى كلها أفكار نميسة خبيثة من مطبخ مروة

يجعله عامر وبالف هنا وشفا .. وفى مطبخ مروة متجمعين كلنا

 

 مروة فرجانى