#مطبخ_مروة: الفرنش توست هو الإجابة المطبوخة

كتب بواسطة: مروة فرجانى في . القسم مطبخ مروة

 


عايزة تعملى حاجة جديدة و سريعة  ..

طب عايزة سفرتك تبقى مميزة و فى 10 دقائق ..

معايا أن شاء الله ده حيحصل ..

 

انا مروة ... أم لحبيبى ياسين ... انا خريجة السن انجليزى و شغلى مالوش علاقة خالص بحبى للمطبخ، بس بحب اكل البيت جدا و بحب اجرب اكلات المطاعم فى البيت، بس المهم تكون بسيطة، وبالتالى معنديش مشكلة انى أسأل شيف أى مطعم على الطريقة وأضيف انا التاتش بتاعى بعدها.

 

طبعا احنا الستات معظمنا كل يوم بنسال "جوزك إسماعيل بيه" نفس السؤال الروتينى، حناكل ايه انهاردة ... و دا بيتكرر فى التلات وجبات، و طبعا الرد الوحيد اللى الزوج بيقولهولك "اى حاجة ، اللى موجود عندك".

يا راااااجل، طب و دا بيتعمل ازاى ؟!!

المهم ، انا جربت الفرنش توست للفطار و العشا و طلع ظريف جدا بس انا ضفت عليه خضار و جبنة عشان القيمة الغذائية و يشبع كوجبة لوحده. و ممكن تفيرى فالخضار براحتك عشان تنوعى.

 

المكونات :
- 8 توست
- كوب لبن
- 2 بيضة
- فلفل رومى ألوان
- زتون مخلى
- جبنة حلوم أو موتزريلا أو شيدر

 

الطريقة :

* اضرب البيض مع اللبن و ملح و فلفل حسب المذاق.

* سخنى طاسة تيفال على النار و فيها حبة زيت.

* حطى توستة واحدة فى اللبن بالبيض و قلبيها على الناحيتين بسرعة عشان مش تتطرى و تشرب كتير وحطيه فى الطاسة

* سيبيها تتحمر على الجانبين كويس و حطيها فى صينية فى الفرن و عليها الخضار المقطع الزتون و الفلفل و فى الآخر الجبنة.

* اول ما الجبنة تسيح، طلعيها و بالهنا و الشفا. لذيذة جدا و هى سخنة و بتشبع جدا عشان البيض و اللبن و الخضار فيه كل ما يحتاجه الجسم فى الوجبة .

 

يجعله عامر وبالف هنا وشفا .. وفى مطبخ مروة متجمعين كلنا

مروة الفرجانى