#مطبخ_مروة: القلقاس لأحسن ناس

كتب بواسطة: مروة فرجانى في . القسم مطبخ مروة

 


عايزة تعملى حاجة جديدة و سريعة  ..

طب عايزة سفرتك تبقى مميزة و فى 10 دقائق ..

معايا أن شاء الله ده حيحصل ..

 

انا مروة ... أم لحبيبى ياسين ... انا خريجة السن انجليزى و شغلى مالوش علاقة خالص بحبى للمطبخ، بس بحب اكل البيت جدا و بحب اجرب اكلات المطاعم فى البيت، بس المهم تكون بسيطة، وبالتالى معنديش مشكلة انى أسأل شيف أى مطعم على الطريقة وأضيف انا التاتش بتاعى بعدها.

 

فترة الأعياد بدأت لإخواتنا المسيحيين ... كل سنة و انتوا طيبين و باللحمة مبسوطين و بالقلقاس متدفيين ..


و عشان كدة انهاردة حنعمل القلقاس و هو معروف انه اكلة السقعة لأنه بيدفى جدا، وكمان هو الوجبة المعروفة فى عيد الغطاس اللى هييجى كمان يومين.

المكونات :

حزمة سلق
حزمتين كسبرة خضراء
راس ثوم
مرقة لحم
ملح و فلفل اسود حسب المذاق
2 رأس قلقاس كبيرة

 

الطريقة :

- نقطع القلقاس مكعبات و نحطه في ماء يغلي غلوتين على النار

- اول ما يطلع نحطه في مصفاه و نفتح عليه الحنفيه لحد ما السائل اللزج اللي فيه ينزل خالص.

- نغسل الكسبرة و السلق كويس و نحطهم في الكبة مع الثوم لحد ما ينعموا.

- بعدين نجيب مصفى نحط فيها الكسبرة و السلق و الثوم و نعصر بايدينا... ومهم ما نرميش المية اللي تنزل منهم خليها على جنب.

- نضع القلقاس في مرقة اللحمة يستوي شوية و قبل ما يكمل سواه نضيفله الماء اللي عصرناه من السلق و الكسبرة مع الملح و الفلفل.

- في طاسة حطى شوية زيت ذرة مع السلق و الكسبرة اللي عصرناهم، و نقلبهم على النار لحد ما يتقلوا كويس و يقرمشوا

- بعدين تطشيهم على القلقاس بعد ما يستوي و يغلي غلوة و اطفي النار عشان القلقاس مايتهريش.

 

 يجعله عامر وبالف هنا وشفا .. وفى مطبخ مروة متجمعين كلنا

مروة الفرجانى