#مطبخ_مروة: البروانيز السخنة

كتب بواسطة: مروة فرجانى في . القسم مطبخ مروة

 


عايزة تعملى حاجة جديدة و سريعة  ..

طب عايزة سفرتك تبقى مميزة و فى 10 دقائق ..

معايا أن شاء الله ده حيحصل ..

 

انا مروة ... أم لحبيبى ياسين ... انا خريجة السن انجليزى و شغلى مالوش علاقة خالص بحبى للمطبخ، بس بحب اكل البيت جدا و بحب اجرب اكلات المطاعم فى البيت، بس المهم تكون بسيطة، وبالتالى معنديش مشكلة انى أسأل شيف أى مطعم على الطريقة وأضيف انا التاتش بتاعى بعدها.

 

أنا مدمنة حلويات و شيكولاتة ... و مش قادرة أبطل ... و بصراحة مش عايزة ابطل.

وياسلام بقى لو الحلويات سخنة من الفرن ،و يا حبذا لو عليها صوص كراميل او شيكولاته ... و يا خراشى لو كمان ايس كريم. يا عينى يا عينى.

يالا بينا نعمل البراونيز و معاها صوص شيكولاتة بيتى، و التكلفة للاتنين ماتجيش تمن زجاجة الصوص من السوبرماركت، و لا تيجى تمن قطعة واحدة منها لو فى أى كافيه. لا و ايه طازة و سخنة و مضمونة و عمايل ايدك.

المقادير :

* 2 بيضة
* 1 كوب سكر بودرة
* 1 كوب زيت
* رشة ملح
* رشة فانيليا
* 1 ملعقة كبيرة بيكنج باودر
* نص كوب كاكاو
* نص كوب لبن
* 1 كوب كاكاو

marwa cup
الكوب هو نفس الكوب نستخدمه فى تحضير كل المكونات و المقدار ...  لو عايزه كمية أكبر ، ضاعفى المقادير

 الطريقة :

- نضرب بمضرب البيض السكر البودرة مع اللبن كويس

- بعدين نضيف الزيت و الكاكاو و نضرب تانى كويس و ده هيبقى الصوص . طبعا عايزة تعملى كمية أكبر و تشيليها فى التلاجة، براحتك طبعا بس انا بحب اعمل طازة بطازة.

- شيلى من الكمية دى نص كوباية عشان تحطيها على البراوني، و باقى المقدار حيدخل مع الخليط.

- نضيف بقية المكونات كلها من فانيليا و بيكينج باودر و الدقيق و البيض و نضرب كويس جداااا.

- نجيب صينية وسط و ندهنها سمنة كويس أو زيت و نحط الخليط كله على درجة حرارة فى الفرن 180 درجة لمدة 20 دقيقة.

- بعد كدة ننزل الحرارة ل 150 لمدة 25 دقيقة من غير ما نفتح الفرن.

- شوفى استوت بعدها بطرف السكينة و لو كدة طلعيها و قطعيها مربعات وسط زى براونيز الكافية.

- لما تبرد حبة حطى الصوص عليها و بتكون لذيذة جداااا و لو ايس كريم بتكون جبارة.


انا أكلت نص الصينية و هى دافية بصراحة .

 

 يجعله عامر وبالف هنا وشفا .. وفى مطبخ مروة متجمعين كلنا

مروة الفرجانى