#مطبخ_مروة: البيتزا البيتى ولا حوجة للدليفرى

كتب بواسطة: مروة فرجانى في . القسم مطبخ مروة

 


عايزة تعملى حاجة جديدة و سريعة  ..

طب عايزة سفرتك تبقى مميزة و فى 10 دقائق ..

معايا أن شاء الله ده حيحصل ..

 

انا مروة ... أم لحبيبى ياسين ... انا خريجة السن انجليزى و شغلى مالوش علاقة خالص بحبى للمطبخ، بس بحب اكل البيت جدا و بحب اجرب اكلات المطاعم فى البيت، بس المهم تكون بسيطة، وبالتالى معنديش مشكلة انى أسأل شيف أى مطعم على الطريقة وأضيف انا التاتش بتاعى بعدها.

مين مش بيحب البيتزا ؟؟

الإجابة مافيش ... كلنا تقريبا بنحبها ... و كل واحد و ذوقه فى الحشو بقى و سمكها.

انا بحبها سميكة و مليانة حشو كدة و متكلفة.

دلوقتى حقولقوا طريقة عمل العجينة و الصلصة و الحشوة المفضلة بتاعتى. طبعا تنفع اى حشوة على مزاجكوا بقى و ابدعوا.

نبدأ بالعجينة و مكوناتها :

- نص كيلو دقيق
- ملعقة كبيرة خميره فوريه
- ملعقة كبيرة سكر
- 3 ملاعق كبيرة زيت ذره او( زيت الزيتون)
- كوب لبن للعجن

الطريقة :
- نضيف السكر مع الخميرة الفورية و حبة مية لحد ما الخميرة تشتغل.

- بعدين نضيف بقية المكونات و نعجن كويس لحد ما تتماسك و ينضف الطبق من كل المكونات.

- نسيبه متغطى فى مكان دافىء ساعة حتى يخمر و ترتفع العجينة.

- نجيب صينية و ندهنها زيت و نفرد جزء من العجينة كويس بالشوكة.

- نخرج العجينة كويس عشان ماترتفعش أثناء السوا.

- ندهنها بالصلصة بتاعة البيتزا و دى طريقتها.

طريقة عمل صلصة البيتزا :

- بصلة كبيرة مفرومة و 3 فصوص توم مهروس فى طاسة و زيت على نار

- تتحمر شوية و بعدين نضيف ملعقة خل و نص كوب ماء و 4 ملاعق كبيرة صلصة و 2 ملعقة كبيرة كاتشب.

- ملح و فلفل و زعتر حسب المذاق و نسيبها تستوى و تتقل.

ممكن تعملى كمية صلصة أكبر و تشيليها فى برطمان فى الفريزر و تستخدميها فى أى وقت تانى و تكون جاهزة.

 

نرجع بقى للعجينة ؛ ندهنها بالصلصة دى كويس و تبدأ فى توزيع الحشوة و دى ليها أنواع كتيرة جدا .

* مثلا المرجريتا ( زيتون حلقات و فلفل رومى مقطع و بصل و مشروم و طماطم و فى الآخر على الوش الجبنة الموتزريلا )

* الميكس تشيز ( زيتون و فلفل رومى و جبنة شيدر و جبنة رومى و جبنة روكفور و جبنة موتزريلا )

* التونة ( زيتون و فلفل رومى و بصل و تونة و جبنة موتزريلا)

اختيارات كتيرة جدا و كل واحد و اللى يحب يضيفه ... سواء فراخ ولا بسطرمة و لا لحمة مفروم ... المهم تكون متكلفة و مخدومة حلو.

 

- أخيراً إضغطى على البيتزا بعد وضع الموتزريلا عشان المكونات تمسك فيها، و حطيها فى الفرن لحد ما تستوى و الف هنا.

 

  يجعله عامر وبالف هنا وشفا .. وفى مطبخ مروة متجمعين كلنا

مروة الفرجانى