#مطبخ_مروة: كريب النوتيلا بالفراولة

كتب بواسطة: مروة فرجانى في . القسم مطبخ مروة

 


عايزة تعملى حاجة جديدة و سريعة  ..

طب عايزة سفرتك تبقى مميزة و فى 10 دقائق ..

معايا أن شاء الله ده حيحصل ..

 

انا مروة ... أم لحبيبى ياسين ... انا خريجة السن انجليزى و شغلى مالوش علاقة خالص بحبى للمطبخ، بس بحب اكل البيت جدا و بحب اجرب اكلات المطاعم فى البيت، بس المهم تكون بسيطة، وبالتالى معنديش مشكلة انى أسأل شيف أى مطعم على الطريقة وأضيف انا التاتش بتاعى بعدها.

 

استمرارا لمسلسل الحلويات و النوتيلا ... و ادمانى اللى مش عايزاله علاج، جربت مقادير ممتازة للكريب بعد محاولات لظبطها عشان تبقى زى بتاعة المطاعم.

المقدار ده بيعمل 4 كريب كبيرة و لو عايزة اكتر ... ضاعفى مايهمكيش.

المكونات:

(هى بسيطة جدا و سهلة و مش مكلفة خالص و ينفع تتعمل حادق بالجبن و الفلفل و الزيتون) 

- بيضة
- نص كوب لبن
- كوب إلا ربع دقيق

لو حادق حطى ملح و فلفل و لو حلو حطى فانيليا و سكر بودرة.


الطريقة :

- طاسة تيفال مش مجرحة و ادهنيها نقطة زيت و امسحى الزيادة بالكلينكس

- حطى كبشة واحدة من المقادير اللى فوق بعد ما تخلطيها ببعضها ... و دوريها جوة الطاسة عشان تنفرد على شكل دائرة .

- اقلبيها لما تستوى من الناحية الأولى واول ما الأطراف تشوفيها بتطلع بعيد عن الطاسة عشان ماتتقطعش ... قبل كدة لو حاولت تشيليها حتتقطع.

- بس كدة ... حطى اللى يعجبك فيها ... انا بحط شيكولاتة نوتيلا عليها كلها و برص فراولة أو موز جوة و اقفلها.

- وممكن صوص كراميل معاها بتكون تحفة جداااا ... و معاها كوباية كابتشينو بندق فى السقعة دى.

 

  يجعله عامر وبالف هنا وشفا .. وفى مطبخ مروة متجمعين كلنا

مروة الفرجانى