#مطبخ_مروة: كيكه صيامى ولما البيض يكون غالى

كتب بواسطة: مروة فرجانى في . القسم مطبخ مروة

 


عايزة تعملى حاجة جديدة و سريعة  ..

طب عايزة سفرتك تبقى مميزة و فى 10 دقائق ..

معايا أن شاء الله ده حيحصل ..

 

انا مروة ... أم لحبيبى ياسين ... انا خريجة السن انجليزى و شغلى مالوش علاقة خالص بحبى للمطبخ، بس بحب اكل البيت جدا و بحب اجرب اكلات المطاعم فى البيت، بس المهم تكون بسيطة، وبالتالى معنديش مشكلة انى أسأل شيف أى مطعم على الطريقة وأضيف انا التاتش بتاعى بعدها.

 

جالى سؤال عن ازاى نعمل كيك صيامى ... يعنى من غير لين و بيض، و برضه ينفع لو حد عنده حساسية من البيض و اللبن ... وهل حيكون هاشش كدة زى العادى اللى فيه بيض و لا لأ؟

فعلا البيض هو اللى بيخلى الكيكة هشة و منفوشة، بس له بديل ... هو الخل و البيكينج صودا. و وقت ما البيض بيكون غالى و لا فى اى مشكلة  ... يعنى مانكولشى كيك مثلا ... ابدا ☺ نستبدل البيض بيهم و بيطلعوا نفس النتيجة.

المكونات:

- كوب ونصف دقيق
- كوب سكر
- ثلاثة ارباع كوب زيت
- كوب مية و هو هو نفس الكوب اللى بنستخدمه معيار.
- ملعقة صغيرة بيكنج بودر
- ملعقة صغيرة بايكنج صودا
- ملعقة صغيرة فانبليا
- ملعقة كبيرة خل أو عصير برتقال


الطريقة :

1- حمي الفرن على حرارة 180 درجة ثم ادهني قالب كيك بالزبدة أو زيت.

2- في طبق غويط، حطى الدقيق، السكر، البايكنغ باودر والبايكنغ صودا ( المواد الجافة ) ثم اخلطي المكونات .

3- أخلطي في طبق تانى كل من الماء، الزيت، الخل والفانيليا ( المواد السائلة ).

4- ضيفي بقى كل المكونات سوا فى طبق واحد و اخلطى كتير حتى تحصلي على مزيج متجانس.

5- نزلى المزيج في القالب و دخليه الفرن محمى مسبقاً على حرارة 180 درجة مئوية.

6- سيبى القالب في الفرن لحوالى 45دقيقة حتى من غير ما تفتحى الفرن خالص، و قللى الحرارة بعد كده ل 150 و تابعى سوا الكيك بطرف السكينة لحد ما تستوى.

7- خرجي الكيك من الفرن، و سيبيه يبرد ثم قطعيه وقدميه.
.
 

  يجعله عامر وبالف هنا وشفا .. وفى مطبخ مروة متجمعين كلنا

مروة الفرجانى