#مطبخ_مروة: من الفتافيت ... تخرج كرات الكيك (2)

كتب بواسطة: مروة فرجانى في . القسم مطبخ مروة

 


عايزة تعملى حاجة جديدة و سريعة  ..

طب عايزة سفرتك تبقى مميزة و فى 10 دقائق ..

معايا أن شاء الله ده حيحصل ..

 

انا مروة ... أم لحبيبى ياسين ... انا خريجة السن انجليزى و شغلى مالوش علاقة خالص بحبى للمطبخ، بس بحب اكل البيت جدا و بحب اجرب اكلات المطاعم فى البيت، بس المهم تكون بسيطة، وبالتالى معنديش مشكلة انى أسأل شيف أى مطعم على الطريقة وأضيف انا التاتش بتاعى بعدها.

 

طبعا كلنا بنعمل كيك و بيكون فيه فتافيت و احنا بنقطع و بيتبقى قطع و مش بتتاكل.

طب نرميهم؟ ... طبعا لا ... ممكن نعملهم إعادة استخدام تانى فى كرات الكيك و بتكون لذيذة و شكلها حلو اوى.

زى التسالى كدة بدل اللب و السودانى؛ حاجة مغذية و موجودة فى البيت و سهلة التنفيذ .

المكونات :

- بواقى أى نوع كيك فى البيت
- ربع كوب لبن
- شيكولاتة سايحة أو صوص كراميل.
- مكسرات أو قطع شيكولاته
- كاكاو

الطريقة :
- نجيب بواقى الكيك دى و نضيف عليها اللبن و الكراميل أو الشيكولاتة السايحة. نمزجها كويس بالشوكة عشان تمسك فى بعض و تكون كتل و نضيف المكسرات .

- بالايد نكور الكيك بالحجم إلى عايزينه و يفضل صغير عشان تكون سهلة على الأطفال فى الأكل و كمان شكلها بيكون حلو اوى.

- ندحرج الكرة فى طبق مليان كاكاو عشان تتغطى كلها و ممكن نزينها بشيكولاته أو لا.

انا شخصيا عجبتني بالكاكاو بس من برة كدة من غير حاجة تانية و بس كدة.

- نحطها فى التلاجة ساعتين و تتقدم كصنف حلو مخدش 5 دقائق فى التحضير ... و من كيك موجود فعلا و مش حيتاكل.

ممكن تحطيه فى طبق بس أو تدخلى فى كل كرة ستيك الشيش طاووق عشان الشكل.

التقديم على ذوقك بقى.

 يجعله عامر وبالف هنا وشفا .. وفى مطبخ مروة متجمعين كلنا

مروة الفرجانى