#مطبخ_مروة يقدم: التشيكن ناجتس

كتب بواسطة: مروة فرجانى في . القسم مطبخ مروة

 


عايزة تعملى حاجة جديدة و سريعة  ..

طب عايزة سفرتك تبقى مميزة و فى 10 دقائق ..

معايا أن شاء الله ده حيحصل ..

 

انا مروة ... أم لحبيبى ياسين ... انا خريجة السن انجليزى و شغلى مالوش علاقة خالص بحبى للمطبخ، بس بحب اكل البيت جدا و بحب اجرب اكلات المطاعم فى البيت، بس المهم تكون بسيطة، وبالتالى معنديش مشكلة انى أسأل شيف أى مطعم على الطريقة وأضيف انا التاتش بتاعى بعدها.

 أغلب الاطفال و لو مكنش كلهم بيحبوا الشيكن ناجتس لأنها خفيفة و تتعمل أشكال جميلة. وهى ممكن تتاخد فى المدرسة فى اللانش بوكس عشان يأكل حاجة جديدة و مفيدة.

تتشكل زى البسكوت بالقطاعات عادى و الاولاد ممكن يساعدوا كمان و يعملوا الشكل إلى يعجبهم. طريقته سهلة تعمل فى البيت عشان يكون تضيف ومضمون بعد إلى بنسمعه دلوقتى.

المكونات:

- كيلو صدور منضف و مفروم ناعم
- 3 ملعقة بودرة بصل أو ممكن بصلة مفرومة ناعم
- 1 معلقة صغيرة بودرة توم أو توم مفروم
- نص كوب بقسماط
- 2 ملعقة كبيرة كاتشب
- 2 ملعقة كبيرة مستردة
- 1 بيضة
- ملح
- فلفل
- ورق لورا مطحون
- حبهان مطحون
- بهارات
- 2 ملعقة زيت

الطريقة :
- اخلطى كل المكونات دى سوا كويس جدا لحد ما تبقى زى العجينة و شكلى براحتك.
- ممكن تفريدها بالنشابة و تقطعى بأشكال البسكوت.
- ممكن تعمليها كور مبططة زى بتاعة المحلات. براحتك بقى

- بضريها فى البيض و البقسماط كويس زى ما بتعملى الفراخ الباني و سيبها فى الفريزر كام ساعة قبل القلى عشان تمسك كويس .
بس خلي سمكها وسط عشان تستوى.يعنى لو تخينة مش حتستوى من جوة و لو رفيعة حتنشف فى القلى. خلى سمكها اد نص عقلة الصباع.

- قدميها لأولاد فى سندوتشات و معاها بطاطس. وجبة ممتازة للمدرسة و للبيت كمان و عليها جبنة و دخليها الفرن تسبح شوية.

- أعملى كمية و شيليها فى الفريزر عشان توفرى وقت لو حبوا ياكلوا فى أى وقت و ختكونى مطمنة لأنها عمايل ايدك.

 يجعله عامر وبالف هنا وشفا .. وفى مطبخ مروة متجمعين كلنا

مروة الفرجانى