#مطبخ_مروة يقدم: مكرونة بالباشاميل

كتب بواسطة: مروة فرجانى في . القسم مطبخ مروة

 


عايزة تعملى حاجة جديدة و سريعة  ..

طب عايزة سفرتك تبقى مميزة و فى 10 دقائق ..

معايا أن شاء الله ده حيحصل ..

 

انا مروة ... أم لحبيبى ياسين ... انا خريجة السن انجليزى و شغلى مالوش علاقة خالص بحبى للمطبخ، بس بحب اكل البيت جدا و بحب اجرب اكلات المطاعم فى البيت، بس المهم تكون بسيطة، وبالتالى معنديش مشكلة انى أسأل شيف أى مطعم على الطريقة وأضيف انا التاتش بتاعى بعدها.

 

طبعا مافيش عزومة فخمة و متكلفة إلا لما تلاقى صينية مكرونة بالباشميل متينة منورة السفرة. أصل ليها احترامها كدة و بريستيج غير بقية الاكلات و ده بسبب صعوبتها ... وبالتالى اللى بتعملها حلو بتاخد الأيزو  على طول :).

وطبعا رمضان قرب يعنى عزايم و لازم مرة يكون فيها مكرونة بالبشاميل ... هى خطواتها كتير شوية بس أن شاء الله تطلع تحفة.

المكونات :
* كيس مكرونة قلم.
* لحمة مفرومة معصجة مع ملعقتين صلصلة.
* 1 كوب لبن
* 2 ملعقة كبيرة دقيق
* 1 ملعقة كبيرة سمنة
* 1 بيضة

الطريقة :
* نجيب حلة فيها مية و عليها حبة زيت و ملح و نسيبها تغلى على النار. ننزل المكرونة و نقلبها تقلبتين عشان مش تلزق.

* أول ما تستوى، ننزلها فى صفاية و نشطفها بمية بردة.

* نرجعها تانى الحلة و نملحها تانى و نحط عليها اللحمة المفروم المعصجة بالصلصة و نقلب عشان كل وحدة مكرونة تاخد لون الصلصلة و نرصها فى الصينية.

*نيجى للباشميل بقى . هاتى حلة و حطى ملعقة السمنة على نار و الدقيق و قلبى كويس عشان الدقيق يستوي. لون ابتدى يغير كدة على بيج ننزل باللبن حبة حبة و نقلب بالسلكة بسرعة عشان الدقيق يدوب و مش يكلكع.

* تقليب كتير و سريع مع ملح و فلفل قليل و نضيف البيضة عشان هى الى تخلى هش و خفيف و نقلب لحد ما يتقل و يكون قوامه سميك عن الكريب.

* كدة تمام نسيبه يهدى بعيد عن النار 5 دقائق و نزله على صينية المكرونة و نساويها عشان الوش كله يتغطى.

* ندخلها الفرن لحد ما الوش يستوى و يتحمر كدة و تكون جاهزة للتقديم.

و بالهنا و الشفا ..

 يجعله عامر وبالف هنا وشفا .. وفى مطبخ مروة متجمعين كلنا

مروة الفرجانى