#مطبخ_مروة يقدم: أكلة 2×1

كتب بواسطة: مروة فرجانى في . القسم مطبخ مروة

 


عايزة تعملى حاجة جديدة و سريعة  ..

طب عايزة سفرتك تبقى مميزة و فى 10 دقائق ..

معايا أن شاء الله ده حيحصل ..

 

انا مروة ... أم لحبيبى ياسين ... انا خريجة السن انجليزى و شغلى مالوش علاقة خالص بحبى للمطبخ، بس بحب اكل البيت جدا و بحب اجرب اكلات المطاعم فى البيت، بس المهم تكون بسيطة، وبالتالى معنديش مشكلة انى أسأل شيف أى مطعم على الطريقة وأضيف انا التاتش بتاعى بعدها.

 

رمضان جاى و المجهود بيقل و الوقت بيجرى ... فعايزين نوفر مجهودنا ووقتنا أننا نعمل صوانى أقل فيكون فيه مواعين أقل و وقت أقل و مجهود أقل بس تكون وجبة متكاملة.

انا جربت مع اللحمة و الفراخ بانى اعملها صينية مع الخضار و جنبها رز ابيض بس و سلطة. و فعلا مخدتش وقت و كانت وجبة متكاملة فى صينية و حلة بس و تنفع كمان إلى عامل دايت .يعتبره سوتيه و يأكل الخضار مع اللحمة أو الفراخ.

خاصة أن الخضار بعد لما بيستوى بيكون طعمه تحفة عشان شارب كل الشوربة و التوابل إلى بتنزل من اللحمة أو الفراخ.

المكونات :
- اللحمة أو الفراخ مقطعة.
- بسلة و جزر و كوسة و مشروم و فلفل رومى الوان و بصل كله مقطع قطع وسط.
- توابل و بهارات و حبهان.

الطريقة :
- لو عملناها باللحمة ، تكون اللحمة مكعبات وسط أو شرايح زى الستيك. لو فراخ، قطعيها 8 أجزاء عشان كل القطع تاخد طعم التوابل و الخضار.

- نبشر 2 بصلة كبيرة فى صينية و معاها معلقتين زيت و نشوحهم.

- نضيف الخضار بالترتيب دا و كله صنف نشوحه 5 دقائق و نضيف النوع التانى و هكذا. نبدأ بالجزر ثم البسلة و نقلب و بعدين المشروم و الفلفل الرومى و الكوسة.

- نضيف صنف البروتين إلى حنستخدمه لحمة أو فراخ و نقلب كله سوا و نضيف مية تغطى لنص الخضار مش نغطيها مية عشان مش تستوى زيادة.

- نضيف التوابل بتاعتنا و نسيبها على النار تستوى و تشرب المية.و تدخلها بعد كدة الفرن عشان تتحمر شوية و تاخد لون.

بس كدة و نكون عملين الرز و بالهنا و الشفا اكله مفيدة و خفيفة و مستخدمناش غير معلقتين زيت بس.مافيش أى عنصر دهون تانى.الدهن إلى بينزل من اللحمة كفاية جداا

 يجعله عامر وبالف هنا وشفا .. وفى مطبخ مروة متجمعين كلنا

مروة الفرجانى