#مطبخ_مروة يقدم: مطبخ ضد الحر فى رمضان

كتب بواسطة: مروة فرجانى في . القسم مطبخ مروة

 


عايزة تعملى حاجة جديدة و سريعة  ..

طب عايزة سفرتك تبقى مميزة و فى 10 دقائق ..

معايا أن شاء الله ده حيحصل ..

 

انا مروة ... أم لحبيبى ياسين ... انا خريجة السن انجليزى و شغلى مالوش علاقة خالص بحبى للمطبخ، بس بحب اكل البيت جدا و بحب اجرب اكلات المطاعم فى البيت، بس المهم تكون بسيطة، وبالتالى معنديش مشكلة انى أسأل شيف أى مطعم على الطريقة وأضيف انا التاتش بتاعى بعدها.

 

كل سنة و انتم طيبين و رمضان كريم.

طبعا كل الستات ، خايفة من الحر و المطبخ مع الصيام ... خصوصا أننا بنتفنن فى رمضان فى عمل أصناف كتير من الأكل و نهلك نفسنا. على الرغم من إن أغلبنا بيكتفى بالشوربة و العصير و المية و بيحس انه شبع.

بلاش نعمل أصناف كتير اوى نملى بس بيهم السفرة و ميتكلش نصهم فى الجو الحر ده، و برضه نوفر مجهودنا بشوية تجهيزات فى أول رمضان:

- مكعبات الشورية البيتى دى اختراع، لا غنى عنها فى الشوربة و الطبيخ و سهلة. سبق و عملناها سوا و طريقتها فى مطبخ مروة.

- العصير، اعملى كميات و شيليها فى الفريزر عشان تسحبى منها و لما تخلص جددى بنوع تانى و خليه تقيل و لما تشربيه زودى مية عشان يخف و يكون جاهز.

- اللحمة المفروم ،عصجى كيلو لحمة مفرومة، نصها بالبصل بس و تنفع فى السمبوسة و الرقاق و الجلاش، ونصها التانى بالبصل و الصلصة و تنفع فى البطاطس والمحشى، وحوطيها فى أكياس أو برطمانات.

- حضرى عسل الحلويات و شيليها فى التلاجة عشان القطايف و الكنافة و عملناه سوا برضو فى مطبخ مروة فى مقال تجهيزات رمضان السنة اللى فاتت.

- اكتر حاجة بتصدعنا البصل، تعالى بليل بعد ما فطرتى خلاص و افرمى كيلو بصل و شيليه فى كيس .حيكفيكى تقريبا أسبوع بدون عياط من البصل و صداعه. و كررى الحكاية دى كل لما البصل يخلص عشان يكون طازة و يوفر تعبك.

تابعى معايا ، حعمل منيو للفطار بدل السؤال اليومى ( حنفطر ايه بكرة ) و جوابه ( أى حاجة) ☺☺.

يجعله عامر وبالف هنا وشفا .. وفى مطبخ مروة متجمعين كلنا

مروة الفرجانى