#مطبخ_مروة يقدم: كفتة الحاتى فى رمضان

كتب بواسطة: مروة فرجانى في . القسم مطبخ مروة

 


عايزة تعملى حاجة جديدة و سريعة  ..

طب عايزة سفرتك تبقى مميزة و فى 10 دقائق ..

معايا أن شاء الله ده حيحصل ..

 

انا مروة ... أم لحبيبى ياسين ... انا خريجة السن انجليزى و شغلى مالوش علاقة خالص بحبى للمطبخ، بس بحب اكل البيت جدا و بحب اجرب اكلات المطاعم فى البيت، بس المهم تكون بسيطة، وبالتالى معنديش مشكلة انى أسأل شيف أى مطعم على الطريقة وأضيف انا التاتش بتاعى بعدها.

 

رمضان يعنى اللمة الحلوة و العزومات و أصناف من كل لون ... وفيه تجهيزات ممكن نعملها قبلها بليلة و توفر مجهودنا تانى يوم.

1- يعنى مثلا العصير و الشوربة. يتعملوا قبلها بيوم مش لازم يومها فى الزحمة.

2- صينية المكرونة الباشميل، عملناها سوا فى مطبخ مروة ، حضرى الصينية فيها المكرونة المسلوقة و عليها اللحمة المعصجة و لفيها بستريتش الأكل لتانى يوم. يادوب تعملى الباشميل و تحوطيه فوق الوش و جهزت.

3-الفراخ تبليها اول ما تجيبيها و شيليها متبلة فى الفريزر عشان تسحبى منها و تكون يا دوب على الشوى أو القلى.

4 - الكفتة و دى مافيش عزومة بتخلى منها و دى موضوع طبختنا النهارده ... حتكون طعمها احلى و متماسكة . وحنعمل كفتة مشوية زى بتاعة الحاتى والسر فى المكونات.


( نحضرها قبل الفطار بساعة )

المكونات :
- نص كيلو لحمة مفرومة
- ربع كيلو بصل مفروم
- 4 ملاعق كبيرة باربيكيو صوص.
- 2 ملعقة كبيرة بقسماط
-2 ملعقة كاتشب
- 2 ملعقة زيت
- ملح و فلفل و بهارات و القليل من السوماء و وورق اللورى المطحون.
- فحمة و فويل للتقديم

الطريقة :
* نجيب اللحمة المفرومة و نحوط عليها كل المكونات دى ماعد الزيت و البقسماط.

* نخلط كويس جدا جدا عشان كل المكونات تتوزع كويس و لما دا يحصل نضيف البقسماط و الزيت و تخلط كويس تانى.

* صوص الباربكيو و السوماء هما إلى حيدوا طعم التدخين فى الكفتة و البقسماط حيخليها متماسكة لما نصبعها.

الزيت الهدف منه انها تكون بتلمع و كمان متلزقشى فى الشواية.

*نصبعها و نرصها فى الشواية و نقلب على طول عشان كلو ياخود سوا و لون واحد .

* نكون جايبين فحمة صغيرة و سايبنها على النار شوية و دى آخر سر بقى حيخلى الكفتة مش طعم بس زى الحاتى، لا و كمان الريحة.

* الكفتة استوت ؟ نحوطها فى بايركس عشان حنقدم الكفتة فيها للفطار، و نجيب فويل نعمله زى طبق غويط كدة و نحوطه وسط الصينية و يكون جنبنا غطا محكم للصينية و معلقة سمنه. نحوط الفحمة فى طبق الفيل دا و عليها معلقة السمنه و شمى ريحة الشوى الفظيعة.

* غطيها بسرعة و اضغطى كويس عشان تحتفظى بريحة الشوى دا على اد ما تقدرى و قدميها كدة و شيلى الغطا و دوقى أحلى كفتة زى بتاعة الحاتى.

يجعله عامر وبالف هنا وشفا .. وفى مطبخ مروة متجمعين كلنا

مروة الفرجانى