#مطبخ_مروة يقدم: مراكب البطاطس

كتب بواسطة: مروة فرجانى في . القسم مطبخ مروة

 


عايزة تعملى حاجة جديدة و سريعة  ..

طب عايزة سفرتك تبقى مميزة و فى 10 دقائق ..

معايا أن شاء الله ده حيحصل ..

 

انا مروة ... أم لحبيبى ياسين ... انا خريجة السن انجليزى و شغلى مالوش علاقة خالص بحبى للمطبخ، بس بحب اكل البيت جدا و بحب اجرب اكلات المطاعم فى البيت، بس المهم تكون بسيطة، وبالتالى معنديش مشكلة انى أسأل شيف أى مطعم على الطريقة وأضيف انا التاتش بتاعى بعدها.

 

مين مش بيحب البطاطس بكل صورها، مقلية و مسلوقة و مشوية و صينية و محشية و مكعبات و سلطة. أظن ما فيش عشان كدة المطاعم بتبدع فى عمل أشكال مختلفة من البطاطس لانها مطلوبة سواء طبق رئيسى أو جانبى.

جربت نوع جديد عجبني اوى اسمها potato boat , مراكب البطاطس. سهلة اوى و لذيذة و ممكن نغير الحشو.

المكونات :
*بطاطس طويلة مش مدورة.
* معلقة زيت
* فلفل رومى ألوان و زتون و جبنة مبشورة و بصل
ممكن بسطرمة أو توتة أو لحمة مفرومة كحشوة.
* ملح و فلفل و ببريكا
* جبنة موتزريلا أو أى نوع جبنة بيسيح

الطريقة:

- نجيب بطاطس طويلة و نقشرها و نقسمها نصين بالطول زى الصورة و نخلى ناحية منهم مستقيمة عشان تقف ثابتة فى الصينية.

- بمعلقة أو طرف سكينة نفضى جزء فى نص البطاطس و اللى حيطلع حنحوطه فى الصينية برضو مش حيترمى.

- تدهن البطاطس بخليط من مع الزيت و التوابل و الملح و الفلفل و البابريكا.

- نجيب أى صينية عندنا و نحط فيها ورقة زبدة أو ممكن من غيرها عادى. ورق زبدة فى صينية تيفال أو بيركس أو الامونيوم اللى موجود. و نرص وحدات البطاطس.

- تملأى البطاطس الحشوة اللى على مزاجك. انا عملت حشوتى من البصل و الفلفل الرومى المقطع و عليه حبة ملح و جبنة مبشورة.

- بعد كدة نغطى الحشوة بأى نوع جبنة بتسيح و ندخلها الفرن على نار هادية عشان البطاطس تستوى.

- نوزع القلب اللى طلعناه من البطاطس فى الصينية و يستوى معاهم زى البطاطس المشوية.

- بس كدة و بالف هنا

يجعله عامر وبالف هنا وشفا .. وفى مطبخ مروة متجمع كلنا

 

مروة الفرجانى