#مطبخ_مروة يقدم: نجرسكو بالجبنة

كتب بواسطة: مروة فرجانى في . القسم مطبخ مروة

 


عايزة تعملى حاجة جديدة و سريعة  ..

طب عايزة سفرتك تبقى مميزة و فى 10 دقائق ..

معايا أن شاء الله ده حيحصل ..

 

انا مروة ... أم لحبيبى ياسين ... انا خريجة السن انجليزى و شغلى مالوش علاقة خالص بحبى للمطبخ، بس بحب اكل البيت جدا و بحب اجرب اكلات المطاعم فى البيت، بس المهم تكون بسيطة، وبالتالى معنديش مشكلة انى أسأل شيف أى مطعم على الطريقة وأضيف انا التاتش بتاعى بعدها.

 

رمضان يومه بيجرى بسرعة و بنكون عايزين نعمل الفطار فى اقل وقت و بأقل مجهود عشان كدة بحب اعمل الاكلات ال 2 ×1 عشان بتوفر وقت.

سبق و عملنا صينية الفراخ أو اللحمة بالخضار و جنبها رز و كدة ... يعنى وجبة متكاملة.

النهارده هنعمل نجرسكو بالجبنة، و هى مكرونة بالفراخ و الخضار و الجبنة، يعنى هى لوحدها وجبة متكاملة و فى صينية واحدة. وجنبها طبق سلطة أو سمبوسة تكون فطار لذيذ و سهل و سريع.

المكونات :
- كيس مكرونة قلم
- أى نوع جبنة بتسيح
- فلفل رومى مقطع و زتون شرايح
-كيس باشميل و عليه كوب لبن أو نعمل الباشميل من الأول .سبق و عملناه فى وصفة المكرونة الباشميل
- فراخ مسلوقة و مقطعة شرايح
- ملح و فلفل

الطريقة :
- نسلق كيس المكرونة فى حلة فيها مية بتغلى و عليها ملح و ملعقتين زيت، عشان المكرونة متلزقشى فى بعض.

- فى نفس الوقت نقطع الفلفل و الزيتون عشان تكون جاهزة.

- الفراخ ممكن تكون بواقى فراخ من فطار امبارح عشان مانرميش حاجة .. و نقطعها، يعنى مش لازم نسلق مخصوص للنجرسكو ... لو مافيش، نسلق 3 صدور فراخ.

- المكرونة بدأت تستوى، نطلعها و تحت الحنفية نشطفها كويس عشان هى حتكمل سوا فى الفرن فمش عايزنها تعجن.

- الباشميل نكون عملناه و طريقته فى مقالة المكرونة الباشميل.

- نجيب صينية و نحط المكرونة و نملحها بالملح و الفلفل.

- نضيف الفراخ و الخضار المقطع و نقلبها سوا و نضيف ربع كمية الباشميل و نقلب مع المكرونة عشان كله ياخد باشميل.

- نساوى الصينية و نحط الجبنة و بعدين بقية الباشميل و حبة جبنة تانى. الجبنة ممكن موتزريلا، رومى، شيدر أو أى نوع على مزاجكو و ندخلها الفرن لحد ما الوش ياخد اللون الجميل.

يجعله عامر وبالف هنا وشفا .. وفى مطبخ مروة متجمع كلنا

مروة الفرجانى