#مطبخ_مروة يقدم: أهلا رمضان

كتب بواسطة: مروة فرجانى في . القسم مطبخ مروة

 

النهاردة حتكلم على تجهيزات رمضان و الترتيبات الى ممكن تخلى عمل الفطار فى الصيام أسهل شوية ووقفة المطبخ تقل.

ماتحمليش هم خالص ... رتبى يومك و ساعدى نفسك بحبة تجهيزات قبلها و حترتاحى جدا.

 

أولا: المرقة

حضرى قوالب المرقة البيتى، وحتلاقيها فى وصفاتى هنا. عملتها بكل تفاصيلها نضيفة و سهلة و مضمونة. دى تستخدميها فى الشوربات وتسبيكة الخضار.

وكل ما تخليها اتقل على النار ، كل ما تبقى مركزة.مش لازم تتحط فى قوالب. ممكن فى كيس و تكسرى انتى بالسكينة إلى حتة إلى محتاجها.

دى حتفيدك جدااا

 

ثانيا: العصاير

حضرى العصاير وشيليها فى أكياس فى الفريزر ... وأسهل عصير طبعا الكركديه وده بيتعمل كالتالى:

- هاتى من العطار نص كيلو كركديه حيكفيكى الشهر كله ..

- فى حلة غويطة حطى 5 كوبيات مية من المقاس بتاعنا المعروف، اللى حطيت صورته فى المقالة الأولى، وعليهم 1 كوباية مليانة كركدية

- على النار سيبيها تغلى نص ساعة بس

- ضيفى السكر حسب ذوقك وقلبى و دوقى.

- سيبيه يبرد وصفى بالمصفاة فى زجاجات و أكياس وشيليها.

 

ثالثا: شربات الحلويات الشرقية

- ده عبارة عن كيلو سكر فى حلة مع 2 كوب مية

- قلبى و سيبيها على نار هادية تغلى كويس

- أول ما يبدأ يتقل ولونه يغمق اقفلى عليها

- ضيفى ربع معلقة صغيرة ملح ولمون و ربع ملعقة صغيرة فانيليا و قلبى.

- سيبيه يبرد و حطيها فى زجاجة من الزجاج.

بكده تقدرى تستخدمي الشربات مع القطايف والكنافة و البقلاوة.

 

رابعا: البصل المفروم

- هاتى 5 كيلو بصل و افرميهم و قسميهم فى أكياس. لأن بشر البصل لوحده كله عياط و صداع و مع الصيام بيبقى شئ فظيع جدا.

- دى تنفعك فى الطبيخ كله لأن البصل لا غنى عنه.بس حوطى كيس جوة كيس عشان ريحة البصل متملاش الفريزر.

 

خامسا : الصلصة

- هاتى طماطم و صلصيها بالطريقة المعتادة على النار مع رشد سكر عشان تكون زى المادة الحافظة و تعيش اكتر.

خودى جزء منها و سبيكها للمكرونات و معاها البصل إلى فرمنا و جاهز و حطى كل التوابل و انا بضيف عليها فلفل رومى و مشروم و لحمة مفرومة معصجة.

- تبقى جاهزة و فى برطمان أو كيس و على الفريزر.

سهلة جدا و حتوفرلك مجهود فظيع

 

ويجعله عامر وبالف هنا وشفا .. وف مطبخ مروة متجمعين كلنا

مروة فرجانى