#مطبخ_مروة يقدم: الفطيرة التركى

كتب بواسطة: مروة فرجانى في . القسم مطبخ مروة

 

عايزة حاجة جديدة للغدا ومعاها بطاطس مقلية و سلطة خضراء مثلا و تنفع للعشاء كمان؟ و معندكيش غير كمية لحمة مفرومة قليلة ، ربع كيلو مثلا ، او فراخ ؟؟

الحل الفطيرة التركى ...

جديدة و خفيفة و فعلا طعمها حلو جدا جدا و على ضمانتى.

المكونات :

- ربع كيلو لحمة مفرومة

- ٣ فلفل رومى اخضر او الوان

- ٢ بصلة كبيرة

- زيتون شرائح

- ٢ كوب دقيق

- ١ كوب زبادي

- ١ ملعقة كبيرة سكر

- ١ ملغقة صغيرة ملح

- ٢ ملعقة كبيرة زيت

- ربع كوب لبن

- ربع كوب مية

- كيس خميرة فورية

- بهارات و سمسم و حبة بركة

- اى نوع جبن بتسيح متاح

- ١ بيضة لدهن الوش

 

الطريقة:

* نعصج اللحمة المفرومة فى حلة على النار و معاها مية و مضاف عليها ٢ بصلة مفرومة و ٣ فلفل رومى مقطع مربعات وسط و عليها ملح و فلفل و بهارات لحد ما تستوى و تشرب المية.لحد كمية اللحمة المفرومة الصغيرة اتضاعفت.

* نعمل العجينة، نضيف كله سوا ماعدا المية. نعجن الاول و نزود مية حبة حبة لحد ما العجينة تلم كويس و الطبق ينضف بس هى العجينة طبيعى تبقى بتلزق.

* نغطيها بفوطة و نسيبها لما تخمر من ساعة لساعتين عشان تعلى فى مكان دافى.

* خمرت ، نقسمها ٢ و نفرد كل نص لوحده.فى صينية فيها ورقة زبدة مدهونة زيت بسيط ، نفرد الجزء الاول من العجين حلو و بشوكة نعمل فتحات بسيطة فيها.

* نحط اللحمة المعصجة فى النص و نضيف زتون اسود او اخضر و اى نوع جبن متاح عشان تسيح و نبعد عن الاطراف.

* نحط الجزء التانى من العجين الى فردناه و نغطى كله و نقغل الاطراف ما بين العجين الى تحت و الى فوق.

* نخرم بالشوكة برضو الطبقة الى فوق عشان نضمن ان جوة يكون مستوى لما يدخل الفرن.

* ندهن الوش بالبيضة و نرش السمسم و حبة البركة و على بركة الله ندخلها الفرن تستوى على درجة حرارة ١٦٠ لمدة نص ساعة . تحمر من فوق و من تحت.

* نقطعه مثلثات و استمتعى باحلى طعم فطيرة تركى .ممكن مكان اللحمة فراخ و ممكن خضار بس من غير اى لحوم. لذيذة جداا و هشة و مشبعة بطريقة مش طبيعية.

وبالهنا والشفا وفى مطبخ مروة متجمعين كلنا

مروة فرجانى