نقد كتاب: هيبتا

كتب بواسطة: هبه محمد في . القسم نقد كتاب

 كلنا راجعين من فترة امتحانات وضغط وتعب وارهاق، ولو كنت من عشاق القراءة فاكيد هتكون بعدت عن كتبك الفترة دي كلها ... علشان كده كنت حريصة في اختياري لكتاب نرجع بيه لطاقتنا السابقة، واللي تخلينا مانعديش يوم من غير ما نفتح كتاب.

انا شخصيا اول كتاب فتحته اروي بيه عطشي من القراءة كان كتاب "هيبتا" اللى هنتكلم عنه الأسبوع ده، سمعت اسمه كتير الفترة اللي فاتت دي ... وشفت الاسم كتير علي النت .. وكنت مقررة إنى اول ما اخلص امتحانات اقرأه ...

أنا اعتبر نفسي أحسنت الإختيار ... قليل جدا لما تلاقي الكتب اللي تزعل لما تخلصها،ونجاح الكتاب بييجي من هنا ...

نتكلم شوية عن الكتاب بقى ونعرف مين كتبه واللي قرأه قال عليه ايه:

الكاتب: محمـــد صادق ...مواليــــد : ٢٤/٤/١٩٨٧ ... اولي مـؤلفاتــــه : رواية " طه الغريـب "وثاني مؤلفاته روايـــــة "بضـــع ساعات في يوم ما" وصـدر له حديثاً روايـــــة "هيبتا "

أراء قراء الكتاب (من موقع goodreads.com):

خلود صلاح امين: فيها مشاعر كتير، وصفت احساسي الداخلى في مراحل معينة من حياتي. بس عامة فيه حاجات كتييير لازم أشيلها من الصندوق بتاعي عشان أبدأ حياة جديدة جميلة مشمولة بالهيبتا.

ياسمين صبري: كتاب أكثر من روعه ، لقيت فيه نفسى :) ، عرفت منه المعنى الحقيقى للعمق

ميار علي: معتقدش هلاقى كتاب يوصف اللى جوايا زى ده ... احلى كتاب قريته فى حياتى .. حالة مش عايزاها تخلص "هيبتا"

محمد عبد الله: لا أقرأ رواية أبداً في 24 ساعة، كما أن عدد الروايات التي قرأتها وتمنيت لو أني قد كتبتها قليل جداً،
ثم انني لا أحب الروايات التي يطغى عليها الحوار وبالذات لو كان الحوار عامياً. محمد صادق دعني أنحني لك احتراماً
فقد غيّرت عاداتي وأتعبتني ولكنه كان تعباً لذيذاً بذلته بمنتهى السعادة.

عمرو جند: رواية مختلفة فى تفاصيلها وفى رؤيتها العميقة والحيادية للأمور .. شعرت بإحساس الكاتب مع كل كلمة .. رواية هيبتا أعتبرها نقلة فى مشوار محمد صادق الأدبى، ورغم عدم ميولي فى القراءات الشخصية للغة العامية إلا أنني لم أترك الرواية قبل إنهائها، وذلك لمحافظة محمد صادق على رتم الأحداث فى استعراض متميز للهيبتا .. محمد صادق أخرجتني خارج أسوار النقد والكتابة وجعلتنى أعشق القراءة مستمتعا وفقط القراءة أمام هيبتا.تحياتى واحترامى بتمنالك مزيد من التوقيق فى مشوارك يا محمد .

أمل محمد: روايه تاخذك الى برنامج اسامة منير على ورق.مش عارفه بعد كل التقييمات و الشهره اللى واخداها الروايه اذا كانت الغلطه منى ولا هى فعلا كده.اسلوب السرد ممل و مفيش فيه حاجة بتشدك علشان تكملها ،، الى جانب اقتباس الكاتب لدور الواعظ.الفكره.. هى سبع مراحل للحب،، بس فى رأيى انها ملهاش علاقه بالرومانسية تماما.شخصيات الروايه.. "مش لاقيه كلمه معبره عنهم"التصوير غلط من وجهه نظرى..

لما يكون فى شخصيه زى "رؤى و علا" بيمثلوا بنات من مصر، الغريب عن البلد هيشوف ان هما دول النموذج الاساسى ليهم،، اكيد فى بنات زيهم فى مصر بس هيبقوا اقلية.بس النهاية حلوه نوعا ما.اول تجربه لى مع محمد صادق اتمنى الجاى يكون افضل.

أسماء بركة: رواية جميلة مختلفة ... أول مره أقرأ وأقابل أسلوب العرض ، الأسلوب لا يشعر بالممل، انتهيت منها فى يوم فقط .. تشوقت كثيراً لمتابعة الأحداث. فيها معلومات جديدة أول مرة أعرفها عن " هيبتا " وماذا تعنى وما مراحلها 
غير ان النهاية مفأجأة. بالتوفيق.

اميرة سامي: يا نهار ابيض ... الواحد بقاله كتير مقراش رواية كدة و حس بالسعادة الصافية بعد مخلصها ... من احسن الروايات فعلا .. خلصتها في يومين وحتى يومين كتير عليها ... مدمنة و تشدك في كل لحظة ... كتاب يغير مودك 180 درجة الى الاحلى.

اسلام شاهين: الحمد لله على نعمة القراءة .. رواية رائعة..رائعة..رائعة..لازم كل الناس تقرأها..اللي لسة محبش واللي بيحب و اللي ناوي يحب و اللي مش ناوي..محاضرة هتعلمك حاجات كتيييير اوي.

محمد الخولي: رواية رائعة كعمل أدبي يعتمد على أسلوب جديد في إيصال الرسالة المطلوبة، وهو أسلوب إلقاء محاضرة تعليمية على لسان أحد الشخصيات.. الرواية مليانة دروس في الحياة وجمل وعبارات تتاقل بالذهب .. اللي يقرا الرواية ويركز فيها هيطلع بحاجات كتير حلوة هتغير نظرته للحياة وطريقة معيشته..

طبعاً صعب الواحد يتغير ويغير من طريقة معاملته للناس (خاصة اللي بيحبهم) بس الموضوع مش مستحيل.. اللي يقرا الرواية هيحس إنه نفسه يعيش قصة حب.. واللي عايش قصة حب هيحب حبيبه أكتر .. أهم درس في الرواية هو كيفية التعامل مع المشاكل السبعة اللي بتقف عائق في طريق السعادة بين أي اتنين في علاقة.. وتاني أهم درس هو كيفية تحقيق الخمس حلول اللي بتحل السبع مشاكل .. الرواية بإختصار بتلمس حاجات وبتحرك مشاعر كتير جوة الواحد وتخليه مقبل على الحياة بصورة أبسط وأقل تعقيداً.

---

ودلوقتي جه دورك انت تقرأها وتقولنا رأيك علي الايميل دا

عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته. عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.

هبه محمد