مال الدورى داخل كابس علينا كده ؟؟؟ بقى وادى دجله هو متصدر المسابقه !! ...

أه طبعاً وارد إنها تحصل فى الأسبوع الأول بفارق جون ولا حاجه ... بس بفارق 3 اهداف و كمان عن جداره و إستحقاق، لأنه فعلاً كان أحسن فريق قدم كوره فى أول مباريات المسابقه ؟؟؟ ... فدى غريبة قوى.

أنا قلت من بعد كاس العالم الخايبة الأخيرة إن عندنا ماتشات فى الدورى أفضل بكثير من العديد من مباريات هذا المونديال العرّه. و قلت كمان ...

- بس بقى كفاياك قواله يا فادى ... ممكن نشيل عنك حوار تحليل الدورى ده لحد آخر الموسم. إرجع إنت شوف حالك فى باقى أبواب المجله، لكن بالنسبه للكوره فليها ناسها لا مؤاخذه.

مباراة الإفتتاح بين جنوب افريقيا و المكسيك شاهدتها وسط عائلتى و اصدقائى و انا ارتدى تى شيرت منتخب مصر ... قلت برضه يبقى فيه تمثيل لمنتخبنا فى هذه الليلة، و كانت مشاعر الحسره بعدم وصولنا تنقح على خفيف وسط الفرحه العارمة بهذه المناسبه و خالص العرفان لمن سخر لنا الوصلة و القنوات المجانية الإلكترونية ...

و لكن يومها اتذكر إن أبرز تعليق على المباراة كان "إيه الإزعاج ده" و ده لما كلنا جالنا قرحة فى وداننا من صوت الفوفوزيللا.

و مع مرور المباريات إزدادت حسرتى على عدم إشتراك فريقى المفضل فى هذه البطولة الواقعه، و سالت دمعتى على تى شيرت المنتخب و انا ارى خيبة ايطاليا و فرنسا و طبعاً إنجلترا و امريكا و سلوفانيا ... و حتى البرازيل و هى بتتكعبل فى حتة كوريا و الأرجنتين لما بتكسب نيجيريا بالعافية ...