هاى امل:

انا عندى 18 سنة فى تانية جامعة، وانا من اكتر المعجبين بيكى و بارائك فى الحب وفى العلاقات الانسانية ومتابعة مقالاتك والبرامج بتاعتك علشان كده انا عايزة اخد رأيك فى موضوع..

فيه ولد اعرفه من ايام المدرسة من اولى ثانوى، و كنا اصحاب ... وكان بيكلمنى يحكيلى عن حياته وكل حاجة عنه وكنت دايما بنصحه. هو ولد هايل لكن فى الوقت ده كان بيحبط كتير علشان كده كنت بقف جنبه، المهم هو كان عايز يدخل كلية معينة وفضلت واقفة جنبه لغاية ما دخلها. وكان ابتدى يحبنى اوى من قبلها. وكان كل حلمه انه يبأه حد كويس اوى علشان يبأه حد كويس اوى علشان يستحقنى ... وبعدما دخل الكلية شخصيته اتغيرت كتير للأحسن، وابتديت اشوف فيه كل حاجة حلوة و بئيت معجبة به لكن مش بحبه.

وهو ابتدى بكل الطرق يرضينى وحتى الحاجات اللى كانت بتضايقنى فيه كان بيصلحها، وعنده استعداد يعمل اى حاجة علشان يسعدنى، ومع الوقت ابتديت ارتاح له اوى، وساعات بحس انى بحبه وساعات لأ. والاسبوع اللى فات قال لى انا محضر لك مفاجاة وعدى من اودام بيتى بعربيته وكان معلق عليها يافطة كبيرة اوى مكتوب عليها "بحبك".

وتانى يوم قال لى انه عايز يتجوزنى، وانه عايز يتعرف على اهلى حتى لو ماحصلش حاجة جد دلوقتى. وطبعا كنت طايرة م الفرحة انا عمرى مافرحت كده فى حياتى. بس لسة بشك فى حبى له ومش قادرة احدد ان كان هو ده الانسان اللى هيسعدنى والا لأ، ومش عارفة حتى ازاى اقدر اعرف، خايفة اكون مبسوطة بس علشان حد بيعملى كل الحاجات دى لكن مش علشان الانسان ده بالذات. معلش رغيت كتير بس اصلى متلخبطة بجد وشكرا انك سمعتينى ومستنية ردك..

غ. أ.

شوفى يا غين يا حبيبتى ... انا فضلت اقرأ مشكلتك و انا على وشى ابتسامة عريضة جدا وجواية سؤال "الله اومال فين المشكلة؟" لغاية ماوصلت للآخر ففهمت. وانا متاكده ان اى حد هيقرأ مشكلتك هيقول لك "انتى بتهرجى والا ايه؟ اتكلى على الله يا بنتى، الجواب باين من عنوانه والواد بيحبك وشارى، وده بطر والبطران اخرته قطران.."

لكن انا فاهمة احساسك ومقدراه والله، وخاصة ان انتى لسة سنك صغير وساعات الانسان لما بيدخل فى العشرينات كل حاجة فيه بتتشقلب. ومع ذلك انا هقول لك زى كل الناس وارجعى اقرى السطرين اللى فاتوا .. شوفى يا ستى اللى يطمن فى الموضوع انكم أصدقاء بجد، وان الولد بيحبك فعلا وان انتى كنتى الدافع الكويس فى حياته واللى بيساعده على انه يتغير للأحسن ... ودى نعمة تبوسى ايدك وش وظهر عليها لانها مش موجودة عند ناس كتير.

الولد خامة كويسة جدا، المهم ان انتى ماتغيريش اسلوبك معاه اللى شجعه وخرج احسن ما عنده، واللى بالتالى خلاكى تحسى بسعادة عمرك ما حسيتى بيها. وبعدين الولد رومانسى ودى نعمة تانية يا غين نادرة فى الزمان ده. وفيه نقطة تانية مهمة. وهى ان اللى بيخلى الناس مشاعرها تتغير وتبعد عن بعض انهم مايكونش فيه بينهم حوار وحاجات مشتركة وانهم يكونوا مابيكبروش مع بعض، وكل واحد فيهم بيكبر فى اتجاه لوحده. لكن فى حالتك الوضع مختلف، فلازم تحافظى على علاقتكم وقربكم من بعض علشان تكبروا مع بعض وساعتها الحب ح يكون أضعاف..

وطبيعى ان مشاعرك تكون متلخبطة دلوقتى وتكونى خايفة ومبسوطة وقلقانة، لان قرار الجواز قرار مش سهل. لكن لو ماكانش عندك مشاعر ايجابية من ناحيته ماكنتيش فرحتى اصلا الفرحة دى. لأ اكيد فيه مشاعر وحلوة كمان استغليها وكبريها لان الولد يستاهل. واوعى تلعبى معاه لعبة روح تعالى ليطفش منك ... شفتها بعينى كتير والناس بترجع تندم وتعيط بدل الدموع دم الشر بره وبعيد يعنى.

ادى لنفسك فرصة واديله هو كمان فرصة وماتقعديش تفكرى فى تفاصيل مشاعرك، لكن استمتعى بيهم وبحياتك ولما تلاقى نفسك بترتاحى مع الانسان ده وبتتبسطى لما بتشوفيه ... ولما بيغيب بتقلقى عليه وبيوحشك وتحسى انك مستعدة تقفى جنبه حتى وهو فى اسوأ حلالته، وانك عايزاه يكون سعيد على طول يباه انتى اكيد بتحبيه..

اتكلى على الله واديله فرصة، ولما كمان الموضوع هيكون فى النور والاهل عارفين، هتلاقى نفسيتك بترتاح اكتر ومشاعرك بتكبر اكتر ... و ربنا يعمل لك اللى فيه الخير يا عروسة لولولولى ى ى ى :)


أمل محمود
 

كلمتين و مش بس:

قالوا البياض أحلى ولا السمار أحلى ... قلت اللى شارينى جوه العيون يحلى
اكسروا ورا اللى يبيعكم زير، واكيد ربنا ح يعوضكم باللى يشترى بس أنتوا خدوا موقف صح !
اما اللى يشترينا ويعمل اقصى ما فى وسعه علشان يسعدنا فده نشيله فى عينينا ..

Share on Facebook