انا عندى مشكلة ومزعلانى اوى، بجد محتاجة رأيك أوى، أنا كنت مرتبطة بواحد معايا فى نفس الكلية، بس فجأة كده بطل يتصل او يسأل وقال لى انا لسة طريقى طويل وماينفعش، قلت له ماشى براحتك، حسيت انه جرحنى اوى بس بعد كده بأه يكلمنى على النت ويقول لى انا مخنوق ... وطبعا انا قعدت اقول له معلش وكلمته حلو اوى. ماكانش قصدى اننا نرجع لبعض انا قلت اخفف عليه بس، ساعات لما بكون اونلاين واكلمه مش بيرد عليا خالص ولحد دلوقتى انا مارحتش الكلية علشان ماشوفهوش ومش عارفة طريقة التعامل هتبقى ازاى؟ مع العلم انه بدأ يعاملنى وحش زى اى بنت و متجاهلنى خالص، اتعامل معاه ازاى؟ معلش طولت عليكى بس انا بجد مجروحة اوى وحيرانة ونفسى انتقم منه اوى، ويعرف قيمتى كويس، وبجد انا دلوقتى بقول الحمد لله انه عمل كده علشان هو ماكانش يستحقنى، لو سمحتى ردى عليا..

ن. م.

ايه ايه؟ مجروحة وحيرانة؟ ماعاش ولا كان اللى يجرحك ويحيرك ده.

شوفى يا نون يا جميلة، اولا انا مبسوطة ان انتى عرفتى انه مايستاهلكيش، لانه بخلاف اللى انتى حكيتيهولى اكيد عندك اطنان من المواقف السخيفة اللى وصلت للاستنتاج ده. لان موقفه ده مش وليد يوم وليله، وطبعا سكة "انا لسة طريقى طويل و ماينفعش" دى سكة الخلع بالذوق. ودى احدى الاسطوانات الشهيرة جدا للولاد لما بيحبوا يخلعوا.

ومع ذلك انتى كمان لانك اخلاق حاولتى تقفى جنبه وتهونى عليه ولو انه مايستاهلش، لكن لحد كده و هوب ستوب، فرامل.

شوفى يا نون، كلنا لما بيتحلق لنا بالطريقة السخيفة دى بنكون هنموت وننتقم ونشوف الطرف التانى بيتعذب زى ما احنا بنتعذب، وبنقعد نتخيل سيناريوهات يشيب لها الولدان علشان نريح قلبنا المجروح ونشفى غليلنا. لكن نصيحتى خلى السيناريوهات دى ادوية مسكنة مؤقتة مش اكتر.

أما اللى المفروض يحصل انك تروحى كليتك عادى جدا وماتخليهوش يحس انه انتصر عليكى وكسرك يا حرام، وقعدك فى البيت.

احسن انتقام دلوقتى، وصدقينى وعن تجربة، انك تلبسى وتنزلى كليتك وتقابلى اصحابك وتضحكى وتسلمى عليه عادى جدا زيه زى اى حد فى الدنيا. وماتقفيش معاه. استأذنى واتحججى باى حجة وامشى، ده ح يقتله لان الولد حتى ولو كان هو اللى سايب بيحب يحس انه مهم اوى عند البنت اللى سابها. وانها ياحرام مش قادرة تعيش من غيره ونايمة مكتئبة بتعيط ع الأطلال. لكن لما بيلاقى غير كده بيموت ويتجنن وكرامته تنقح عليه ويحس انه كلب وراح.. وهى دى يا قطة الرسالة اللى لازم توصليها.

اقول لك على سر؟

هو ده اللى انا كنت بعمله لما بتجرح ... وكنت بهتم اكتر بدراستى وبمستقبلى، وكنت بقول بكره لما ابقى انسانة ناجحة ومهمة ح يعرف هو خسر ايه. ومع الوقت هو بيقع تماما من حساباتك لكن بتنجحى وبتبقى فعلا الانسانة المهمة دى. واكيد هو بيندم ساعتها.

لكن الأجمل فى الموضوع انك ساعتها مابيفرقش معاكى لا ندمه ولا ندم غيره، وهغنيلك الاغنية اللى بتحمسنى فى حياتى بتاعة النمر الأسود ... "اتقدم اتقدم وكفاية خلاص تتندم".

أمل محمود

Share on Facebook