ازيك يا امل،

معلش انا هطول عليكى بس محتاجة النصيحة فعلا، انا رحت شغل جديد من 6 شهور واتعرفت على شاب بدى لى انه محترم واخلاق ومحبوب من كل الناس. هو مش شغال معانا لكن بيساعد على فترات، لكن ابتدى ييجى كل يوم الشغل لغاية ما اشتغل فعلا معانا، وبقى بيكلمنى على النت كتير، و حسيت انه ابتدى يعاملنى على اننا مرتبطين لكن انا كنت بوقفه عند حده.

مرة سألنى انا بالنسبة ايه فقلت له "حد مهم"، وانا لما سألته نفس السؤال قالى "انتى حد قريب اوى بحس انك قريبتى او زى حد من عيلتى" ... فاتضايقت جدا، و قلت يبأه بيلعب ... والأحسن انى ابعد. فلما بعدت وبقيت بقفش فى الكلام راح متكلم بصراحة، وقال لى انه عايز يتقدم.

و فعلاً جه البيت ورغم ان ظروفه معجبتش اهلى الا انهم قالوا مش مهم، مادمت انا اللى جايباه. وتممنا الموضوع وعملنا خطوبة لبسنى فيها الشبكة. وكان بيتصل والحياة جميلة وعايز يخرج بس مش عايز يطلب من بابا. لكن هما 3 اسابيع و قلب ... ومابقاش بيتصل زى الأول. انا اللى بتكلم ويا يرد يا مايردش، ومش بييجى كتير. و يتعدل يومين وبعدين يرجع يتقلب تانى. بس عايزة اقول لك ان خناقتنا الوحيدة والكبيرة كانت علشان مش عايزنى اعمل حواجبى لانه حرام !! وده كان قبل ما يجيب اهله، وقال لى لو عملتيهم مش هجيب اهلى.

انا عارفة انى مش بعمل حاجة حرام لكن اخدته على عقله وقلت هينسى وعملتهم ... ولما جاب اهله اتخانق معايا وماكانش عايزنى اعملهم كمان فى الخطوبة، بعدها وبعد خناقات كتير سبتهم ... لانه حيرنى. وقلت هستنى لما اسأل شيخ يريحنى كلامه، وعرفت انى ممكن انظفهم. وفضلنا نتناقش كتير ونتخانق كتير  ... وقدمت له دليل على صحة كلامى، فقال لى خلاص اعملى اللى انتى شايفاه صح. وبعدين بقيت بحس انه متغير ... وانا كنت سبت الشغل علشان ح روح شغل تانى فماباقتش عارفة ان كان فيه واحدة تانية والا بطل يحبنى والا ايه.

فى رمضان ماكانش راضى ييجى يفطر معانا ... بس جه بالعافية، وحسيته غريب، وخرجنا بعد كده وكنت منظفة حواجبى زى ما اتفقنا، لكن رجع اتخانق معايا فى التليفون بالليل وقعد يقول لى انتى مش بتسمعى الكلام وبتعملى اللى فى دماغك !! ومش عايز يسمع منى اى حاجة. وانا علشان حمارة كنت عايزة اهدّيه ... ورغم انى ماكنتش مقتنعة و قلت له ان الموضوع ده مش ح يسبب اى مشاكل تانى والمفروض اننا كده اتصالحنا..

بس من هنا بدأت المقاطعة الفعلية لا بيتكلم ولا بيرد ولا بييجى، وبيتحجج بالظروف والفلوس وانا مستحملة. وقال لى بصى احنا نتكلم بس علشان نتطمن على بعض مش اكتر. وهو ده اللى كان بيحصل اصلا، لكن مابنتكلمش فى اى تفاصيل جواز. قلت فترة وهتعدى لكن مابتعديش ... فاتكلمت معاه بصراحة، قال لى استحملينى، وانا زى الهبلة استحملت ... وحتى على العيد ماعيدش عليا غير برسالة على الشات بتاع الفيسبوك.

المهم جه هو ومامته بعد كده فى اليوم التالت وكان عايز يمشى من اول ربع ساعة، وانا كلمته بعد كده اشكره على الحاجات اللى جابها لقيته بيكلمنى بطريقة وحشة ... وبيقول لى اللى عايز يحس، يحس لوحده !! المهم اخيرا كرامتى نقحت عليا ولما سألته ايه الكلام ده؟ قال لى خلاص مابقتش فارقة، انتى بتعملى اللى انتى عايزاه وبتلبسى اللى انتى عايزاه. ومرة قلت له ان النقاب مش فرض ... فقال لى انتى مش مسترجلانى. فقلت مش هكلمه تانى، ومامته كلمت ماما عايزانى اعتذر له، وبتقول لماما: اذا كان انا، أمه، لما بيزعلنى بصالحه. فماما قالت لها اذا كان بيعاملك وحش اومال هيعامل مراته ازاى؟

إحنا مش عارفين دلوقتى نعمل ايه. فى البيت مستنيينه لما هو اللى يتكلم علشان، لما بيكلموه مش بيرد عليهم، والناس بتقول هو بيعمل كده علشان مايخسرش الشبكة..

أقول لك بقى على الغلطات الافظع واللى اتغاضيت عنها وماكنتش باخد بالى منها:
_ مرة قبل ما نرتبط كنا مروحين مع بعض من الشغل، فالمترو بتاعى اتاخر سابنى وركب المينى بص بتاعه..
_ كنا فى رحلة كلنا فى الشغل، واخدت واحدة صاحبتى معايا ... وكنا بنلعب وكلنا قاعدين على الارض، فقالت لى 3 مرات يسند على رجلى، وطبعا لما سألته انكر..
_ واحنا بتلف على الشبكة كان عايز يركبى مواصلات ... قلت له نركب تاكسى وانا اللى ادفع مش مشكلة فمرضيش، لكن ساعة الدفع بحجة الفكة دفعنى حوالى 9 جنيه. وحصلت تانى فى كوك دور بحجة الفكة برضه دفعنى 20 جنيه..
_ ماجابليش حاجة فى عيد ميلادى غير ورد من الرخيص ... بحجة اننا لسة مالبسناش دبلة !!! وفى عيد ميلادى التانى كانت صاحبتى جايبة لى تورتة ومسافة ما مشينا من العربية للمكان ماكانش راضى يشيل التورتة، وكان عايزنى انا او صاحبتى نشيلها..
_ عنده بنات كتير ع الفيسبوك ومايعرفهمش ... ومش مراعى ان انا بتضايق. ولما اتكلمنا قال لى حاضر همسحهم وراح الاكاونت بتاعه ممسوح فعمل واحد تانى، وحطهم كلهم عليه ومارضيش يمسحهم..
_ اكتشفت من حركاته دى انه مش متدين ... هو مدعى ومنافق وعايز يسيطر وخلاص ..
_ فى حاجة مش قادرة اقولها لاى حد ومش عارفة دى صح والا لأ، استلف منى 100 جنيه..

انا عارفة انى كان مفروض اعمل زى ما قلتى فى كتابك وامشى ورا احساسى، بس ايتغبيت ... تقريبا كنت محتاجة لحب فى الوقت ده، عايزة بقى النصيحة الصح بتاعة أمل وأعمل ايه بعد كده لما ارتبط علشان اتخلص من الهبل ده.

واسفة تانى انى طولت عليكى وصدعتك..

س. س.

فى الحقيقة يا سين يا حبيبتى لولا ان انتى من البداية عارفة وشايفة اد ايه انتى كنتى غلطانة انا كنت جيت عضيتك.

انا اختصرت فى المشكلة شوية مع الحفاظ على كل التفاصيل المهمة، واحتفظت كمان بالعنوان اللى انتى اخترتيه لانه شدنى جدا. المهم يا جميلة انه الحمد لله انك وصلتى للحقيقة فى الاخر وقبل فوات الاوان. وطبعا واضح جدا انه لا متدين ولا يعرف شيئ لا عن الدين ولا عن الاخلاق ولا عن حتى التعامل الكويس بين البشر.

النوع ده يا حبيبتى بيكون عنده نقص بيداريه ورا عباية الدين، يعنى الموضوع بيكون ببساطة انه معندوش ثقة فى نفسه ولا فى رجولته ... وبيحاول يمتلك اللى اودامه ويسيطر عليها علشان يحس برجولته، اللى هو فاقدها اصلا.

وعلشان يوجد شرعية لده يقول لك الدين بيقول والدين برئ منه ومن أمثاله. وفيه فعلا منقبات كتير بتتنقب بسبب النوعية دى من الرجالة، اللى مش عارفة ربنا هيتوب علينا منها امتى لانهم فيروس ويمكن اسوأ من انفلوانزا الخنازير اللى احنا مرعوبين منها ... لانه فيروس لما بيتمكن يا حبيبتى بيبأه مرض مستوطن بيقرف فى الواحد طول عمره.

احمدى ربنا انك اكتشفتيه على حقيقته بدرى بدرى، و اعتقد ان الانسان مش بيتعلم ببلاش. واديكى عرفتى انك لما تلاقى النوعية دى من الرجالة ... اللى يقول لك البسى وماتلبسيش وماتعمليش حواجبك وماتحطيش برفيوم واتنقبى والسكة دى، تعرفى على طول انه من الرجالة النص كم ... وتجرى منه بالمشوار.

لان النقاب لا هو فرض ولا فضل زى ما الناس اللى بتلبسه بتدعى، واتفرجى على التليفزيون وشوفى علماء الدين والطب النفسى بيقولوا ايه عليه ... ده غزو ثقافى مش أكتر بسبب برضه رجاله من النوعية دى. مادمتى انسانة محترمة ومتربية، ماتسمحيش لاى واحد مايسواش 3 تعريفه انه يعاملك على انك غير كده. وانه هو اللى جاى يهديكى ويربيكى. كان من باب اولى ربى نفسه وعلم نفسه انه يعامل امه اللى مدلعاه كويس.

وعشان تختارى صح بعد كده، ماتتخدعيش بالمظاهر وبحب الناس، لان ياما ناس بتمثل وبيتقال فيها شعر وهى فى بيتها مع زوجتها من اسوأ ما يكون. وركزى فى كل التفاصيل وماتفوتيش اى تصرف مهما ان كان صغير ... وصدقى احساسك وكلام اصحابك. يعنى بجح وكان بيتحرش بصاحبتك كمان وانتى معاه، اومال وانتى مش معاه كان عمل فيكى ايه؟

وكله كوم وال 100 جنيه دى كوم تانى ... طبعا غلط جدا كمان، ده كان بيستغلك وبيستعبط، الراجل اللى بجد مهما يتزنق لا يمكن يمد ايده لخطيبته ويستلف منها ابدا، ليه اهله واصحابه خلصوا؟

وخليكى دايما عارفة ان الدين معاملة، الانسان المتدين بجد معاملته بتكون زى الفل والا ده يبأه من بتوع المظهر والنفاق والتمثيل، تكسرى وراه 100 زير..

وطبعا هو عايز الشبكة وكان بيطفشك علشان تديهاله، لكن للأسف القانون الجديد بيدى الحق للراجل انه ياخد شبكته حتى لو كان هو اللى سايبها ... لكن واضح انه مايعرفش. خلى اهلك مايتصلوش به ولا انتى تعبريه اصلا غير لما هو يبأه يفوق م الغيبوبة ويدور على شبكته..

روقى يا سوسو وارمى السناره تانى يا حبيبتى :)


أمل محمود

كلمتين ومش بس:

"ناهيتك مانتهيتك والطبع فيك غالب ... وديل الكلب عمره ماينعدل ولو علقه فيه قالب"
ماتخبطوش دماغكوا فى حيطة صلبة وتصروا تكسروها ..

لما تلاقى اللى أودامك عوج ومش بيتعدل، اجرى بدرى و وفرى على نفسك وجع القلب..

Share on Facebook