انا مشكلتى ممكن تكون تافهة اوى ... انا مشكلتى انى فى دماغى شكل معين للبنت اللى هحبها.

الشكل ده مش صعب اوى فموجود كتير اوى وبقابله كتير فى حياتى ... علشان كده بحس انى بحب كل بنت بشوفها وبحاول اقرب لها، لحد ما احس بزهق وببعد تانى.

مش عارف دى مشكلة والا ده ايه؟

هو انا اصلا تعبان ومخنوق من نفسى، نفسى الاقى البنت اللى احبها. مش عارف افضل زى ما انا لحد ما اوصل للبنت اللى هقرب لها ومش هبعد  ... والا استنى والبنت هتظهر فى حياتى والا اعمل ايه؟

ياريت تقوليلى رايك واسف لو طولت عليكى

ا. خ

----------

العقل بيقول ايييييه؟!

مشكلتك يا ألف ياخويا مش تافهة ولا حاجة، بالعكس فيه شباب كتير زيك كده عندهم نفس المشكلة. وعلى الرغم من انك ماقلتش سنك الا انه واضح انك لسة فى مقتبل العمر زى ما بيقولوا. لان المشكلة دى عادة بتحصل نتيجة قلة الخبرة. وصدقنى مع الوقت واكتساب خبرة فى البشر بصفة عامة هتلاقيها. مش علشان هى موجودة بالشكل اللى انت عايزه ده، لكن علشان تفكيرك هيتغير وهينضج. وبالتالى هيكون اختيارك على اسس منطقية وعاطفية ناضجة..

يا صديقى العزيز البنت مش مجرد شكل فى دماغك، الشكل ده اخر حاجة تدور عليها لان الجمال الحقيقى هو جمال الروح والعقل والاخلاق والتعامل. وتخيل كده أجمل ممثلة ممكن لو قعدت معاها ماتستحملش خمس دقايق على بعض نتيجة اختلاف طباعها وصفاتها عن طباعك وصفاتك.

وحتى لو كنت تقصد بالشكل، صفات معينة بتدور عليها، فالموضوع برضه مابيتحسبش كده لانك مش بتشترى جهاز كومبيوتر لو فيه عدد رامات معين، وهارد ديسك كذا جيجا وشاشة 16 بوصة وكيبورد، وكيسة اتش بى يبقى انت كده ضمنت جهاز كويس هتعرف تشتغل عليه. لأ ... البنى آدم مختلف ولا يخضع لكل الحسابات دى، وعلشان كده انت بتلاقى الشكل اللى انت عايزه سواء خارجيا او داخليا، وبتمل و مابتستحملش تكمل مع صاحبة الشكل ده. لانه ببساطة ممكن مايكنش فى بينكم كيمياء، او مافيش تآلف فى الارواح، او مافيش اهتمامات مشتركة فمابتلاقوش حاجة تتكلموا فيها، فبتقعدوا ساكتين وبالتالى انت بتطفش..

سيب الموضوع ييجى براحته وماتستعجلش، اكتسب خبرة فى البشر الأول، وخاصة فى البنات، راقب تصرفاتهم، افعالهم، كلامهم، اعرف هما بيحبوا ايه، بيكرهوا ايه، وايه الفرق بين البنت الكويسة الجدعة اللى تعرف تعيش معاها بغض النظر عن شكلها وبين البنت الجامدة جدا ... اللى لو جيت على مستوى الحياة اليومية، تديها ربع جنيه فى ايدها وتحطها جنب الحيطة..

وبعدما تاخد الخبرة دى، سيب مشاعرك تهديك، لكن مع ارشاد من عقلك. دور على حد شبهك، يعنى تكون بتحب الحاجات اللى انت بتحبها، بتكره اللى بتكرهه، بتفكر زيك، جدعة، بتفهمك، بتحس بيك، بتحافظ على نفسها، قريبة من مستواك العلمى، المادى، الدينى. كل الحاجات دى هى اللى بتضمن استمرارية الحب وعدم التناقض والخناقات المستمرة اللى بتخرب البيوت، الحب ساعات بيضيع لاننا بنختار ناس مش شبهنا والنتيجة لما بنتجوز بنتصدم ومابنعرفش نعيش ومابنستحملش خاصة لو معندناش مرونة وقدرة على التأقلم..

فيا صديقى أهم الشيئ فى الموضوع ده هو الصراحة مع النفس، وعدم التعامل مع البنت على انك رايح تشترى عربية .. .دى انسان يعنى عالم بحاله .. مش حتة حديدة وجنوط وشوية اوبشنز :)

غير تفكيرك ونظرتك للبنت وسيب الموضوع ييجى بالصدفة، ماتدورش عليه وعلى رأى أبو فراج "الدنيا مابتديش محتاج" اعمل الكلام ده وانت هتلاقيها بتخبط على باب قلبك بأسرع مما تتخيل!

أمل محمود

Share on Facebook