استاذه امل.. انا خريجه هندسه وعندى21 سنه.. وكنت عايزة اخد رأيك ف موضوع خاص.

كان معايا فى الكليه زميل ... ماكنش فيه بنا كلام ايام الدراسه.. قربنا لبعض بعد التخرج اكتر (يعنى تقريبا من 3 اشهر)..فى ايام البحث عن شغل والانترفيوهات.. بدأت الاحظ من اول يوم اعجابه ثم اهتمامه.. كان دايما بيحاول يقف جنبى و يعرض خدماته.

اشتغل هو ف شركه.. ولما طلبت منه المساعده عمل المستحيل عشان يجيبنى معاه اشتغل فى الشركه دى.. وقد كان.. الى ان حدث ظرف ..خلانى اسيب الشغل فجأه وبدون مقدمات..واتخذت القرار ونفذته ثم ابلغت هذا الزميل بما حدث..واللى حصل ده اربك جميع خططه ودفعه للمبادره السريعه فى نفس اليوم بطلب انه يخطبنى.

انا كان ردى وقتها.. انه يرتب اموره ويدخل البيت من بابه عشان الموضوع يبقى صح اوى ورسمى، لكن فى نفس الوقت انا بفكر فى هذا الامر ومحتاره جدا ... فيه تضارب جوايا بين تأييد هذه العلاقه وبدئها .. ورفض هذا الشخص قبل التورط فى علاقه ودخول الاهل فى الامر وحدوث خطوبه ثم فشل هذه العلاقه!

الانسان ده بكل المواصفات الانسانيه مناسب ليا..من جهة التفاهم الموجود بينا..اعجابه واحترامه لى..اخلاقيا ودينيا جيد من وجهة نظرى. والمخاوف اللى جوايا لفشل هذه العلاقه..هو انه شكليا وظاهريا ..ليس لديه مقومات فارس احلامى المبهره التى طالما حلمت بها..بالاضافه الى انى كثيرا ما اشعر بأن علاقتنا اخويه جدا..و انى احبه مثل اخى.

اخشى ان أبدأ هذه العلاقه وأندم حين اقارنه بأى شاب اخر ..او اشعر مجرد الشعور بالاعجاب بغيره..حينئذ سوف اشعر بأنى اظلمه وانى ظلمت نفسى من البدايه حين وافقت على من لم يملأ عينى كرجل!

اعاتب نفسى احيانا على تلك المخاوف .. واقول انها بطر .. عندما يأتينى الانسان الشارى ابيعه !!.. واركض وراء من لايستحق لمجرد مظاهر.. اعانى من هذا التناقض .. اخشى ان اتخذ القرار الخاطئ بالموافقه فأفشل .. او بالرفض فاندم
ساعدينى ارجوكى بسرعه ارسال الرد!

س.س.

-------------------

العقل بيقول اييييييه؟!

شوفى يا سين يا حبيبتى انتى معذورة فى طريقة تفكيرك دى لان سنك لسة صغير ولسة ما "عتركتيش" الحياة ولا الحياة طحنتك وغنيتى مع منير "والدنيا دى رحايا" ... فطبيعى انك تقلقى وتخافى من خوض تجربة قد تفشل.

لكن معلش تعالى نحسبها صح وبالورقة والقلم، عايزاكى تجيبى ورقة وتقسميها نصين بخط وتكتبى فى ناحية مميزات خوض التجربة وفى الناحية التانية عيوبها. واحسبيها صح حسب المعطيات اللى عندك ... انتى بتقولى الولد جدع وطيب وبيحبك وبيحترمك وحطى لى تحت بيحترمك دى 59098 خط. انتى مش شايفة كم الولاد اللى دماغهم بايظة اليومين دول، واللى مابيحترموش حتى اهاليهم، فكونه بيحترمك فده اول الطريق للسعادة، وكون فى تفاهم ما بينكم فدى الوسيلة اللى بتركبوها علشان توصلوا لاى قرار سليم فى حياتكم ... وكونه اخلاقه وتدينه مناسبين ليكى فدى ميزة تانية. مادام الدين مترجم لأخلاق مش مظاهر وبس يبأه انسان متدين فعلا وهيراعى ربنا فيكى..

ده اللى العقل بيقوله ... ان الواد ده لقطة ومايتفوتش.

لكن تعالى نشوف بأه القلب بيقول ايه وايه أخباره، كونك حاسة انك بتحبيه زى أخوكى قد يكون السبب فى الموضوع ده هو قربه منك من ناحية (ودى ميزة) وعدم اعجابك بشكله من ناحية تانية (ودى مش ميزة) لكن ممكن لو اتغلبنا عليها نشوفه صح ونحبه..

نتغلب عليها ازاى؟ انا هقول لك خلاصة خبرتى، وأنا كنت، وبعترف لك بده، واحدة تنكة جدا ومابيعجبنيش العجب ... وماكانش بيلفت نظرى غير الولاد الحلوة جدا اللى مايختلفش عليها اتنين، ده وانا فى سنك كده برضه. وكنت باشوف ان الراجل لو ماكانش وسيم وشبه نجوم السينما مايملاش عينى، لغاية يا حبيبتى ما عرفت وشفت بعينى ماحدش قال لى ...

اتصدمت واتبهدلت كتير؟ آه بصراحة لغاية ما آمنت بان حقيقى المثل اللى قال "الحلو مايكملش" ماكدبش، واتعلمت ان الراجل مش شكل، وان الرجولة مالهاش علاقة بالشكل خالص ولا بالمواصفات الجسدية. يعنى ممكن ترتبطى بملك جمال وعضلات وبتاع ... وبسبب هيافته وانانيته وطريقة معاملته السخيفة وعدم تحمله المسئولية، تشوفيه أختك مش بس أخوكى. آه والله وماتحسيش ناحيته بأى مشاعر كويسة ولا حتى مشاعر الانثى تجاه الذكر، وممكن ترتبطى بانسان مواصفاته الشكلية والجسدية متواضعة، لكن حبه واحترامه واحتوائه ليكى، ومراعاته لنقط ضعفك، وجدعنته معاكى، واخلاقه الحلوه تخليكى تشوفيه حسين فهمى..فهمانى..

الراجل الوسيم يا حبيبتى بيبقى مدرك ده وشايف نفسه طاووس، وحتى لو كنتى انتى ملكة جمال هيشوف نفسه دايما أحلى منك ويستكتر نفسه عليكى، اوعى توقعى نفسك فى الحفرة دى..

احسبيها صح تعيشيها صح، أنا رأيى انك تديله فرصة لان انا شايفة ان الموضوع مافيهوش خسارة ... ماتخليش الخوف من الفشل يشلك، لو فضلنا واقفين على الشط خايفين ننزل البحر عمرنا ما هنعوم ولا هنوصل للبر التانى. والخطوبة اتعملت علشان كده، علشان نجرب ونشوف هننفع مع بعض والا لأ، يعنى ماهياش تدبيسة، خلى فترة الخطوبة طويلة لغاية ماتتأكدى من مشاعركم انتم الاتنين تجاه بعض.

وماتفترضيش حاجات ممكن ماتكونش صح يا سو سو، يعنى انتى خايفة تظلميه لو ماحبتيهوش، طيب مش يمكن هو اللى مع الوقت يحس ان انتوا مثلا لا قدر الله مش مناسبين لبعض ... وتبقى ساعدتيه لو مافيش نصيب انه ينساكى؟ انا مش بخوفك لكن انا عايزة أقول لك ان بكره ده بتاع ربنا، مانعرفش ايه اللى هيحصل فيه، اه احنا بنعمل اللى علينا النهاردة على امل ان بكره يكون احسن لكن فى النهاية بكره فى علم الغيب..

وفى أسوأ الظروف لو حصل فشل لا قدر الله، هتبقى استفدتى من التجربة وعرفتى حاجات كتير عن نفسك انتى ماكنتيش تعرفيها، خلى بالك اننا ساعات بنكون فاكرين اننا نعرف نفسنا لكن لما بنرتبط بنفاجأ بان الحاجات اللى كنا متخيلين اننا بنحبها، لأ ده احنا طلعنا مابنستحملش عواقبها ... والحاجات اللى كنا متخيلين اننا لا يمكن هنستحملها، نلاقى نفسنا مستغربين هو احنا ليه كنا متخيلين الموضوع بالسوء ده. الطرف التانى فى أى علاقة بيكون مراية مكبرة بتعكس لنا أدق تفاصيلنا اللى ممكن ماشنفهاش لوحدنا أبدا ... وده على الاقل هيخليكى تعرفى انتى عايزة ايه وبالتالى تختارى صح بعد كده..

اتكلى على الله وخوضى التجربة بنية كويسة ورغبة حقيقية فى اكتشاف الانسان ده ومعرفته، وأكيد هتفصلى لنتيجة كويسة جدا. على الاقل لو برضه ماحبتيهوش فانتى مش هتندمى فى يوم من الايام انك ماتديش نفسك ولا اديتيله فرصة، وان كنت متأكدة ان انسان بالمواصفات دى لو قربتى منه اكتر هتحبيه لانه يستاهل انه يتحب..

وخلى بالك ان كل انسان ممكن يطلع منه انسان جميل شكلا لو لبس لبس حلو، وحلق حلقة جديدة، وشال له شوية حديد او حتى مشى كل يوم نص ساعة، يعنى نيولوك وانتى وشطارتك بأه ... ده عادة بيبقى دور الست فى حياة الراجل.. وساعتها حتحبيه أكتر كمان لانك هتحسى ان التغييرات دى انتى السبب فيها، يعنى مانتيش وجودك زى عدمه لان دى حاجة بتقهر اى واحدة فى الدنيا.. اتكلى على الله وربنا يوفقك يا رب..

أمل محمود

كلمتين ومش بس:

ماتدورش ع الشكل يا عبيط، ده الشكل قشرة بتقع مع الوقت ويبانلك الخرتيت

دور ع الروح والجوهر، دول اللى يخلوا أبشعها وش، قمر منور..

Share on Facebook