السلام عليكم ازيك يا استاذه امل ...

انا مشكلتى بإختصار انى كنت مخطوبة 3 مرات ... اول مره كان ابن عمتى، كنت فى ثانويه عامه و كنت فرحانه بالخطوبة ... لان اهلى كانوا بيخافوا عليا قوى وماكانوش بيرضوا يخرجونى، فوافقت على الخطوبة و قلت لما اتخطبت جايز يخفوا عليا الحصار شوية.

ماعلينا ... دخلت الجامعة قابلت ناس واكتشفت ان خطيبى ده مش فارس احلامى، انفصلت عنه رغم انه كان بيحبنى اوى. وكان تقريبا اكبر منى ب 10 سنوات، بس هو ماكانش ليه شغل معين. فكرت شويه بعقل ووصلت انى ماينفعش اكمل ارتباط به.

دخلت الجامعه قعدت سنه ونص فيها اتعرفت علي شاب حبنى جدا ... وانا كمان حبيته فعلا. خطبنى وانا فى سنه ثانية وهو فى رابعه. اتخطبنا على انه يسافر بعدما يخلص لوالده قد سنه. لكن بعدما خلص الجامعه ماسافرش. استحملته في السنه دى و وقفت أودام اهلى لانه ماكانش بيشتغل ولا اى حاجه بس انا كنت بحبه فعلا ساعتها .. وبالفعل سافر الخليج قعد سنه تقريبا هناك. وانا انفصلت عنه لعده اسباب ...

اولا كان غيوررر جدا، وكان لما بيتعصب كان ممكن يغلط. استحملت كتير وتنازلت عن حاجات كتير. اولا لبسنى الاسدال وماكانش بيخلينى اخرج حتى مع ماما. و لما حد من قرايبى الشباب ييجى ماكانش يخلينى اقعد مع حد فيهم. مقدرتش اتحمل لحد ما حصلت مشكله انا اللى كبرتها وهى اساسا كبيرة وانفصلت عنه.

رجع يكملنى وانا وافقت انى ارجعله ... وبعدين اتخلى عنى لما قلت له كلم اخويا الكبير قوله ان احنا هنرجع لبعض رفض، وقال لى انتى اللى تقولى له مش انا ... انتى اللى كبرتى الموضوع. المهم رفضت وانفصلت عنه رغم انى كنت معرفة اخويا الكبير، بس هو كسفنى جدا أدامه.

المهم بعدها بفتره صغيره اتقدم ليا جارنا وهو بيحبنى من زمان، ووافقت وانا بقول اهو زوج وخلاص هعوز ايه اكتر من ان واحد يحترمنى ويقدرنىن رغم انه ماكانش وسيم بس كان راجل قوى وابن ناس ومحترم. وافقت رغم اعتراض اخواتى انه مش هيملا عينى. المهم عملت فرح وخطوبه وجابلى شبكه كويسه جدا وطلبات الزواج اللى انا كنت عايزاها كانت هتجيلى وفعلا قعدت معاه بعد الخطوبه حوالى شهرين..

ماخرجتش معاه غير مرتين تلاته تقريبا ... واتلككت له بعد فتره علشان انفصل عنه على اساس انه بخيل، بس فعلا انا ظلمته فى النقطه دى. بس كنت عاوزه انفصل عنه علشان هو مش وسيم بس. وعلى فكره بالنسبه لخطيبى التانى انا اكتشفت انه مش حب، لانى لو كان حب ماكنتش قدرت فعلا انى استغنى عنه ... لكن الحمد لله كانت مسألة تعود عليه فى حياتى مش اكتر واكتشف كمان ان انا عمرى ما حبيت..

انا عارفه انى طولت عليكى معلهش، بس خطيبى الاخير عاوز يرجعلى وبيحبنى جدا ... والكل كمان فى البيت وعيلتى بيحبوه وبيقولوا لى عمرك ما هتعرفى تجيبى واحد زيه. وفعلا اتقدم ليا كتير بعد الخطوبه الاخيره عملت مقارنه لاقيته هو فعلا احسن واحد اتقدملى ... لانه محترم وعمره ما زعلنى ولا غلط فيا وكان بيحترمنى جدا.

هو دلوقتى عاوز يرجعلى وانا محتاره، علشان هو مش وسيم. هل ده سبب كافى لحكمى عليه ولا اتكل على الله واوفق ارجعله ؟!

ن. ت.

---------------

العقل بيقول ايييه؟!

عليكم السلام يا "ن" هانم يا مبهدله الرجالة :) كل واحد تتلككى له على حاجة وتسيبيه.

عارفة ليه يا "ن"؟ لانك مش عارفة انتى عايزة ايه؟ ولا عارفة يعنى ايه حب او جواز.. بس واضح ان سنك صغير وممكن يكون ده السبب. ده غير ان السبب الحقيقى اللى انتى بتعوزى تتخطبى علشانه هو حصولك على قدر معقول من الحرية. ودى بصراحة نقطة انتى معذورة فيها، وعادة اى بنت اهلها بيخنقوها بتشوف ان الحل الوحيد لحريتها هو الجواز.

علشان كده انتى اتخنقتى من اللى كان بيغير عليكى وعايز يخنقك لانك مش ناقصة خنقة، فاتلككتى له وسيبتيه، دى نقطة مهمة، وده اللى مخليكى بتشوفى الموضوع من بره وبتتعاملى مع الراجل اللى أدامك بسطحية لانه بالنسبة لك "وسيلة" مش أكتر.

انتى عايزة الوسيلة دى تكون بتحقق لك كل اللى انتى عايزاه وكمان شكلها حلو، وده واضح من وصفك لكل العرسان، انتى مش مركزة غير فى الأمور الملموسة، الحالة المادية والشكل، وده معناه انك ماحبتيش اى حد فيهم ولا حتى استفدتى من العلاقة وعرفتى المواصفات الشخصية لفارس أحلامك، راجعى مشكلة (مش فارس أحلامى).

وده طبعا مش مظبوط وهيخليكى بتدخلى فى تجارب وتخرجى منها بلا اى استفادة، الجواز مش شبكة وخطوبة وفرح وانسان وسيم، الجواز مش غاية فى حد ذاته، الجواز وسيلة مش أكتر. وسيلة بنستخدمها فى رحلة الحياة علشان نحقق التكامل ما بيننا وما بين انسان تانى، مشاركة، تفاهم، حب، هوايات مشتركة، مش مجرد راجل بيجيبلى وبيعمل لى وشكله وسيم..

فيه مقولة دايما بفتكرها، وافتكريها انتى كمان يا "ن" لانها مهمة جدا، المقولة دى بتقول "الناس بتتطلق لأسباب تافهة لانها بتتجوز لأسباب أتفه". اوعى تتجوزى لأسباب تافهة لان انتى اول واحدة هتتخنق ومش هتستحمل. مخنوقة وعايزة هامش اكبر من الحرية، اشتغلى، اقنعى أهلك شوية شوية والعملية هتمشى ... لكن تقولى اهى جوازة والسلام، فده أكبر غلط ممكن تعمليه. خاصة و ان التجربة اثبتت فشل نظريتك لانك فى كل مرة كنتى بتتلككى وماتكمليش.

يبأه لازم تقعدى مع نفسك وتحاولى تفهميها الأول وتشوفى انتى عايزة تتجوزى ليه؟

وتقيمى الانسان ده صح، ومش علشان اهلك بيقولوا لك انه مايتعوضش يبأه هو فعلا كده، الموضوع نسبى، للى مايتعوضش بالنسبة لحد ممكن مايعجبش اصلا حد تانى. وتشوفى كمان ايه موضوع الوسامة ده، يعنى ممكن مايكنش فيه كيمياء ما بينكم وانتى مفسراها غلط على انه مش مالى عينك لانه مش وسيم. لان بغض النظر عن شكله لو انتى مش قادرة تتخيليه كزوج ومش قادرة تتصورى نفسك فى علاقة حميمة معاه يبأه ماينفعش ... لازم تكونى متقبلاه او عندك الحد الأدنى من أى نوع من المشاعر ناحيته.

اما الوسامة فى حد ذاتها فملهاش علاقة لا بالرجولة ولا هى ضمان لعشرة كويسة، طب ايه رأيك ان أنا كنت قاعدة من كام يوم، فى اجتماع وكان معانا شخصية مشهورة ونجم وزى القمر، ومع ذلك هى نص ساعة وماكنتش طايقة نفسى وعمالة أدور على اى حجة أستأذن بيها من الناس اللى معايا من كتر ماهو مغرور ومش بيتكلم غير عن نفسه خنقنا كلنا :)

اعرفى نفسك كويس الأول، واعرفى ان الناس مش بشكلها لكن بأرواحها وشخصياتها وصفاتها الكويسة اللى تخليكى تحبيهم فعلا. وياما رجالة وسيمة وطباعها زى الزفت، ورجالة قبيحة جدا شكلا، لكن اول ماتقعدى وتتكلمى معاهم تشوفيهم زى القمر.

عيدى تقييم امورك ... ولو عايزة ترجعى لخطيبك يبأه لازم ترجعى من أرض صلبة، وتكون نيتك كويسة من ناحيته خاصة انه واضح انه انسان كويس وبيحبك فعلا، والا بصراحة ماكانش فكر يرجع لك تانى بعد اللى انتى عملتيه فيه. يعنى لازم تقربى منه كانسان وتشوفى ايه اللى بيضايقه وايه اللى بيسعده وايه احلامه، وليه عايزك انتى بالذات ... و كمان تعرفى مفهوم الحب من وجهة نظره وتدرسيه كويس. لكن لو هترجعى له من منطلق انه وسيلة، واهه أحسن من غيره، يبأه حرام بتظلميه وبتظلمى نفسك.. والأحسن انك تستنى على نفسك لما تنضجى عاطفيا وتقدرى تقيمى البشر صح وتفهمى انتى عايزة ايه..



أمل محمود

كلمتين ومش بس:
وعشق الروح مالوش اخر لكن عشق الجسد فانى..

Share on Facebook