ارجوكى يا أمل انقذينى انا خلاص على حافه الانتحار ..

الموضوع ان خطيبى بيخنقنى وخلاص هموت .. انا وهو مرتبطين من اربع سنين. احنا اصلا اقارب، وبعدين اتخطبنا من 6 شهور بعد مشاكل وعذاب.

بس هو طول الاربع سنين وهو انسان طيب وحنين، وبيحبنى اوى. بس بعد الخطوبه زى ما يكون اعتبرنى كنبه او كرسى ... مش تفرق، الاتنين مش ليهم لازمه. بعدين بيعاملنى بطريقه غريبه ... اخرجى لا ما تخرجيش بمزاجى كله بمزاجى. ولو لا قدر الله خرجت بيبقى يوم مش معدى ... بيحسبلى من اول ما اخرج ويقولى هى نص ساعه ولو اتاخرتى دقيقه يبقى ما عدش فيه خروج تانى.

بعدت عن صحابى ومش عنت بزور حد ولا بخرج، كأن على حكم. ويقولى اصل انا بخاف عليكى وبقلق لما بتكون بره.

الدنيا مش بقت امان وانا زى الهابله، بقول عندك حق .بيخطط لحياتنا براحته هنقعد فين وهنروح نبات عند اهله بالاسبوع والاسبوعين ... وانا عروسه اروح ابات عند عيله فى بيتهم، ولو قلت حاجه يقولى الا اهلى. وبعدين المكان اللى هبقى فيه انتى هتكونى ولا بياخد برايى فى اى حاجه دى طبعا بعض الحاجات اللى بيعملها.

المهم ان هو لاغى شخصيتى خالص كأننا فى عصر سى السيد ... انا بحبه يا أمل وهو بيحبنى ممكن بطريقته بس انا عايزه اعرف منك طريقه اتعامل بيها معاه عشان اغيره واحسسه انى بنى ادمه. وفى نفس الوقت مش اخسره ارجوكى ردى عليا والا هنتحر لان هو ده الحل الوحيد اللى قدامى

ر.ر

-----------

العقل بيقول ايييه؟!!

أولا يا "ر" أشكرك على ثقتك فيا، ثانيا وده الاهم اوعى تقولى انتحر دى تانى ابدا. مين قال ان الدنيا هتدينا دايما اللى احنا عايزينه على طبق من ذهب؟ مين قال لو احنا غلطنا يبقى ننتحر؟

وفى نفس الوقت وده السؤال الاهم مين قال اننا نستسلم لأى شيئ يوصلنا لمرحلة التفكير فى الانتحار؟ انا هعتبر كلمة انتحار دى مبالغة ادبية مش اكتر علشان انا اللى مانتحرش :)

شوفى يا ستى ... انا شخصيا مؤمنة جدا بالمثل اللى بيقول: "يا فرعون ايش فرعنك قال مش لاقى حد يلمنى" وهتستغربى لما اقول لك انى فى حالة زى حالة خطيبك دى مابلومش على الراجل ابدا. انتى اللى غلطانة يا قطة، اولا لازم تعرفى ان الحقوق لا تمنح فى معظم الاحيان وانما تكتسب و بنحارب كتير علشان نحصل عليها ... خاصة لو كان الطرف الاخر فى العلاقة من نوع خطيبك عنده حب تملك ونقص وعدم ثقة فى النفس. وضيفى عليهم كمان فهم خاطئ للرجولة عادة بيكون ناتج عن التربية.

يعنى انتى اودامك راجل محتاج يتعلم من الاساس يعنى ايه راجل، ويعرف ان الست مش مجرد فردة جزمة يحطها مطرح ما يحب، ويلبسها ويقلعها وقت ما يهفه مزاجه. البنى ادم ده لو اتجوزتيه على الوضع ده يبقى ممكن فعلا لاقدر الله يوصلك للانتحار ... او لانك تعبيه فى اكياس بلاستشيك. والله يخرب بيت الحب لو هيوصل البنى ادمين للحالة دى..

وبصراحة انا مش فاهمة بتحبى ايه فى قفل بيعاملك معاملة الصفر اللى على الشمال؟ وحنية ايه اللى بتتكلمى عنها دى، اذا كان مش بيعاملك على انك بنى ادمة من الاساس؟

لازم تقفى مع نفسة واقفة جامدة وتعيدى حساباتك ... لان واضح من كلامك انك مش حابة تعيشى عيشة فردة الجزمة، وبالتالى الموضوع ده محكوم عليه بالفشل حتى لو تم الجواز. لان اللى تستحمل مخلوق زى ده لازم تكون فردة الجزمة اللى هو بيدور عليها.

انا شخصيا لو مكانك احط قلبى تحت جزمتى، وعملتها قبل كده على فكرة وقدرت وعدت الازمة وحبيت غيره عادى جدا ... والحمد لله ربنا ادانى اللى يقدر قيمتى ويعاملنى كبنى ادمة ويبدى رغباتى على رغباته، وهى دى الحنية اللى بجد.

الحنية مش كلمتين حلوين وشلوت بعدهم ... بنات كتير بيتحطوا فى الموقف ده، واللى بترضى باهدار كرامتها وامتهان انسانيتها بتعيش تعانى طول عمرها وتاخد على دماعها كمان ... وكمان وماتلومش غير نفسها وفشلها فى انها تاخد موقف حاسم. واللى مابترضاش ربنا بيرزقها باللى يقدرها والتجارب اودامى كتير على فكرة..

لكن عموما لو اصريتى عليه يبقى لازم تفرضى شخصيتك بالذوق أو بالعافية، بأى طريقة. ومافيش اودامك غير انك تجربى كل الطرق وتشوفى الطريقة المناسبة له. مافيش قاعدة ثابتة ممكن تطبق على كل البشر، فالمعركة معركتك انتى. جربى الحسم والحزم بس بالذوق ... اتمسكى برأيك ودافعى عنه وماتقبليش شيئ انتى مش قابلاه.

اتناقشى كتير، علميه يعنى ايه بنى ادمين، مانفعش الذوق يبقى ننقل على المرحلة اللى بعدها وهى الخصام والتطنيش. لان طول مانتى يا حبيبتى محسساه انك ماتقدريش تستغنى عنه هيبيع ويشترى فيكى. لكن لو حس انك ممكن تستغنى عنه فى لحظة حفاظا على كرامتك هيعمل لك 1000 حساب. للأسف فيه صنف كده من الرجالة يخاف ولا يختشيش.

مانفعش الاسلوب ده كمان يبقى الخناق اللى بجد ... والزعيق والقرف كله. وتصعيد الموضوع للعيلة وعيلة العيلة. ولو طلع ان هو ده الاسلوب اللى بينفع. هنا لازم تراجعى نفسك تانى وتشوفى ان كنتى هتستحملى انك تتحولى لانسانة شلق وبتاعت فضايح ولا لأ.

لو الاجابة لأ، يبقى انفدى بجلدك يابنت الحلال، وصدقينى اللى خلقه خلق غيره واحسن منه كمان ... واوعى تتنازلى عن حقوقك وانسانيتك تحت اى مسمى من المسميات، لا علشان حب ولا غيره وزى ما قال السيد المسيح "ماذا يفيد الانسان لو ربح العالم وخسر نفسه".

اوعى تخسرى نفسك، الجواز زى ما قال ربنا "سكن ومودة ورحمة" ومن المواقف الصغيرة اللى انتى حكيتيها بتوضح ان لا فيه سكن ولا مودة ولا رحمة. يبقى جواز عتريس من فؤادة باطل. ده واحد عنده نقص عايز فار يحبسه فى قفص..

عيدى حساباتك لانك مازلتى على البر وطريق السعادة اودامك وطريقة التعاسة برضه اودامك.

احسنى الاختيار ابوس ايدك لان التمن بيبقى غالى جدا وبيتدفع من صحة البنى ادم واعصابه ودموعه وولاده، اللى مالهومش اى ذنب غير ان احد والديه لم يحسن الاختيار. خليكى حنينة على ولادك من قبل ما تجيبيهم واختارى لهم الاب الكويس الصالح اللى يسعدك ويسعدهم ... لكن النكدى اللى يتعسهم ويخللى البيت حريقة لو قلتى للبواب صباح الخير، هيدعوا عليكى انك رضيتى به من الاساس..

وربنا يعمل لك اللى فيه الخير يا رب..

أمل محمود

كلمتين ومش بس:

لو انا صفر ع الشمال فى حياة راجلى، يبأه حبه ده خيال أدوس عليه وأجرى..

Share on Facebook