عزيزتي امل

انا مشكلتي مش كبيرة أوي، ويمكن تكون بتتكرر مع ناس كتير، لكن الغريب اني حكمت عقلي مش قلبي وبدا عقلي يميل قلبي والعملية مشيت شوية ولكن ...

الموضوع بدا لما العيلة اتعرفت علي عيلة تانية ... عادي ... وكان ليهم ابن اصغر مني بخمس سنين. والصراحة انا ماكنش في دماغي حاجة، الولد بدا يتقربلي وبقينا اصحاب ... اصدقاء يعني. بعدين بدات احس انه بيحبني، و أنا بعت لك علي الفيس بوك وسالتك، لانه اولا مش فارس احلامي ثانيا لانه اصغر مني. وانت قولتي لي انه مش لازم انه يكون فيه كل حاجة.

وبعدين قلت ماشي اخد اللي يحبني ومش لازم اللي اتنيل واحبه، وبعدين لما بدات اخد موقف جد بدا يقول لي اني فهمته غلط ... واننا اصحاب وان هي دي طريقته، وانه مايقدرش يستغني عني ولكن مش مستعد للجواز. ولما يستعد عمره ما هايفكر في حد غيري.

المهم قلت يمكن انا فعلا فهمت غلط، ماشي اصحاب ... احنا برضه معرفة عائلات وعمره ماهيلعب بيا. ماطولش عليكي قعدنا فترة نتعامل عادي وبعدين طريقة كلامه بدأت تتغير، كلام حب وود ... قلت لا انا مش وش كده، انا احب اعرف راسي من رجليا ... وخاصة اني بدأت فعلا احبه جدا واتعلق به.

المهم قلت له احنا هنعمل ايه، قال هانعمل ايه في ايه؟ انتى فهمتيني غلط انا قلت لك قبل كده ان دي طريقة كلامي وانتى قبلتي ..

طبعا الرد ده كان كانه حط تلج عليا في عز الشتا، انا مابكلموش بقالي اسبوع ... ماعاتبتوش حتي، و الموضوع انتهي. بس اللي انا مستغرباله انه انسان مؤدب ومحترم وبيخاف عليا جدا وبيحافظ عليا، ودايما بيزورنا ... و مع ماما وصاحب اخويا يعني، انا مش واحدة من الشارع. وبعدين هو اللي سعي ليا مش انا

أنا حزينة وقلبي موجوع ...

اول مرة قلت يمكن مافيش امكانيات و مش قادر يرتبط ... لانه دايما يقول لي انتى غاليه جدا ومش اي حاجة تجيلك. المهم انا اللي مضايقني اوي اني انا مش رخيصة، دا انا قلت ماشي سن ونستحمل مش فارس احلامي ونتنيل، امكانيات السعادة اهم .... ايه بأه هو انا رخصت نفسي أوي كده؟

صدقيني انا عارفة انه بيحبني بس مش فاهمه فيه ايه؟!!

هـ.أ

-----------

العقل بيقول ايه؟!!

خلينى بس اوضح لك نقطة مهمة الاول يا "هـ" يا حبيبتى ... اولا انا لما رديت عليكى قبل كده وقلت لك "مش مهم السن وان مواصفات فارس الاحلام مش بالضرورة تكون موجودة زى ما بنتخيلها" ماكانش قصدى لا انك تتنازلى ولا انك تاخديه كعريس والسلام.

لكن انتى قلتى لى انه بيحبك وبيحاول يعمل كل اللى يسعدك، فأنا كل اللى قلتهولك انك تديله فرصة مش اكتر، وتشوفى مشاعرك انتى ايه. لان فرق السن مش مشكلة 5 فوق 5 تحت مش قضية ... المهم التصرفات. وان كان راجل فعلا والا لأ. ماهو ممكن يكون أكبر منك ب 10 سنين ومع ذلك عيل، والاهم مشاعرك وتطورها..

لكن انا مش شايفة اى كلام عن مشاعرك، انتى يا "هـ" بتتكلمى عن عريس والسلام، وانك تاخدى اللى يحبك وماتتنيليش (على حسب تعبيرك) وتاخدى اللى بتحبيه ... وانا ماقلتش الكلام ده بل بالعكس كمان، انا ضد ان الانسان يتجوز لمجرد الجواز ... ونقول عريس يا اماى وضل حيطة وسكة اجدادنا دى.

بالطبع المشاعر مهمة جدا فى الجواز، والتفاهم اهم، اه صح اننا ندى الانسان اللى اودامنا فرصة ومانتمسكش بصفات جامدة لفتى الاحلام ... لكن فى نفس الوقت لو ماحسناش بمشاعر تجاه الانسان اللى اديناله الفرصة دى يبأه خلاص الموضوع خلص وخيرها فى غيرها..

وطبعا انتى رخصتى نفسك لما رميتى الكورة فى ملعبه/ ورضيتى باللى هو بيقول عليه وبمقاييسه هو. وبان هو اللى يفرض اسلوبه عليكى. يعنى الموضوع واضح وصريح ان الواد بيستعبط وبيشتغلك وبيصيع عليكى كمان ... وانتى بدل ما تقولى له "لأ هوب ستوب عندك ومش اى اى ولا زى زى ولا اى قط يتقال له يا مشمش" ... سيبتيه يقول لك يا مشمش/ ويشتغلك رايح جاى لغاية ما البلوفر كمل، وده طبعا كان غلط جدا..

والغلط الأكبر هو حسن نيتك، يعنى كان لازم تعرفى نظامه من اول مرة قال لك لأ اوعى تفتكرى حاجة، وده اسلوب كلامى العادى ! لكن واضح يا حبيبتى انك لسة ماعندكيش خبرة فى النوعية دى من الرجالة، لان الجملة اللى قالها لك دى أشهر جملة بيقولها اى عيل بيستعبط، والرد الصح عليها هو "لكن انا الاسلوب ده ماينفعش معايا" وتديله الوش الجبس وتسيبيه يخبط راسه فى الحيطة..

احساسك بالامان لان مامته صاحبة مامتك ده فى غير محله برضه، طب ايه رأيك ان فيه قرايب بيشتغلوا بعض. اعرف واحدة ابن خالتها بهدلها اشتغالات بالمنظر ده وفى الاخر راح اتجوز واحدة تانية خالص. وبصراحة الغلط مش عليه لكن على اللى تصدق واحد مش واضح، وبيقضيها كلام حلو و مابياخدش اى خطوة صح تجاهها. و هى تستحمل وتفضل تفكر فيه.

احمدى ربنا انك مش بتحبيه زى ما هو واضح من كلامك، وارميه ورا ظهرك وقولى له زى ما عادل امام قال لأحمد زاهر فى فيلم عريس من جهة امنية "قول لميمى تقول لسوسو تخلى ساسو ماتورنيش وشك تانى" ... اكسرى وراه قلة، واتنصحى بأه لو عدى عليكى تانى مرة واحد بيقول كلام حلو لان اسلوبه كده، يبأه يحصل اخينا ده..

أما اكتر حاجة نقطتنى فى رسالتك وبمنتهى الصراحة هى جملتك الاخيرة، واللى ان دلت على شيئ انما بتدل على طيبة مش فى مكانها الصح، وعلى انه فعلا نجح فى اشتغالك.

اللى يحب مايجرحش ولا يجيله الجرأة ولا القلب انه يقول للانسانة اللى بيحبها جملة زى اللى قالها لك دى، الحب مشاعر وحنان ومسئولية وحاجات كتير اوى ... اهمها ان الانسان ده يكون مستعد انه يدفع عمره كله فى سبيل انه يعيش معاكى. مش شوية تمثيل وحركات معروفة وماسخة وكلمتين حلوين، لكن ساعة الجد: "لأ ماعطلكيش يا قطة، طريقك أخضر احنا اخوات هو انتى فاكرة ايه؟"

وتقولى لى انك واثقة انه بيحبك؟ صباح الخييييييير..

ابوس ايديكم يا بنات افهموا الحب صح، ومش كل واحد بيسبل ويعيش فى دور انه خايف عليكى ويقول كلمتين حلوين يبأه بيحب. الحب أكبر من كده بكتير، الحب رجولة وتصرفات مسئولة.

الراجل بجد لما بيحب بجد ويكون شايف انه ماديا مش هيقدر يرتبط باللى بيحبها بيبعد عنها، لكن يشتغلها ويثبتها وفى الاخر يديها بمبة !! دى اسمها مياصة واستعباط اشباه الرجال ... ما هو اصل مش كل مخلوق بينبت له شنب وصوته خشن يبأه راجل..

أمل محمود

كلمتين ومش بس:

"حب ايه اللى انت جاى تقول عليه، انت عارف قبله معنى الحب ايييه .... لما تتكلم عليه؟ لما تتكلم علييييه.
حب ايه ايه ايه، حب ايه ايه ايه.. حب ايه اللى انت جاى، يا عيل، تقول عليه.

عظمه على عظمه على عظمه ... فينك يا ست؟

Share on Facebook