بصى يا ستى انا حكايتى بدات من 3 سنين ... حبيت واحد من القاهرة وانا من بلد غير القاهرة.

المهم ارتبطنا واتفقنا واتعاهدنا على ان عمرنا ما ح نبعد عن بعض ... بعد كده قلت له لازم اهلى يعرفوا، ولو على الاقل امى تعرف. المهم اتفق ونزل لامى وقعد معاها وقال لها ان شاء الله حجيب اهلى ... وهو كان لسه متخرج مابقلهوش سنة ...

المهم ابوه ثار وقال له لا مفيش جواز ... مع انه مايعرفنيش. ورفض رفضا تاما انه حتى يعرفنى او يشوفنى ... وبدات مشاكل لا تعد ولا تحصى، وكان ياخد منه التليفون علشان يسيطر عليه ويبعده عنى ... وبعد كده دورنا انا وهو على سفر لحد ما لقينا، وقلت له لازم قبل السفر تيجى. ابوه برضه رفض وقال انه مش معاه يروح يخطب ... على اساس ايه تروح تخطب وانت مامعكش فلووس ...

المهم قعدت اضغط عليه علشان احس انه بيحبنى، وفعلا كان بيحبنى جدا، وكان بيشد مع اهله كتير ويجرى عليا علشان يكلمنى. و يتحايل عليا انى مابعدش عنه ابدا ... وده اللى عملته.

المهم قبل السفر والدته كلمت امى واتفقت معاها انى استنى وكده ... واستنيت سنة لحد مانزل. بس كان نازل نهائى لانه حصلت له مشكلة هناك. المهم ابوه قعد يقول له مش حروح للناس غير لما يكون معاك تمن التذكرة وتدفع فلوس المكتب ... وكمان فلوس الشبكة.

المهم طبعا الفلوس اللى كان نازل بيها من قطر استحاله تكفى كل دول، المهم اتصرفت له وقلت له اول ما تسافر ابعتهملى. المهم الحمدلله جه وابوه كان معوج وابويا كمان ... وحددوا ميعاد الخطوبة.

وجه ميعاد الخطوبة. ابويا من النوع المرتبط قوى بامه فماجاش الخطوبة لان امه قالت له ماترحش علشان مش عاوزانى اتجوز فى القاهرة. المهم عدى يوم الخطوبة وقلت له ان جدتى تعبانه على اساس انى احاول احل المشكلة مع بابا، وبعد كده يروح لهم ويقابلهم.

المهم قبل ما يسافر تانى حصل خلافات، قال لى انتى ابوكى اهاننا، وابوكى عمل ... وانا مش قليل ولا اهلى. فاضطريت اقول له ان انا ابويا مش معاه، بس هو اصلا بيعاملنا مش حلو. المهم اخر مازهقت قلت له اتفضل تعالى خد الشبكة وانت عندك حق لانى مش عارفه احل مشكلة بابا.

المهم راح سأل والده قال له لا خلاص، انت مسافر كمان يومين. المهم جالنا وقعد معانا وفهمته الوضع ...  سكت وارتاح ورحنالهم زيارة. والدتى فهمت باباه ومامته الموضوع والموضوع انتهى وسافر هو السعودية. وطول السنة بتاعة السعودية اتغير معايا جدا مابقاش زى الاول. بيقول لى علشان بقيتى ملكى ولازم اركز فى الشغل اللى حيجبلنا الشقه علشان نتجوز ... وبطلى دلع.

وكان بيعامل امى مش قوى على اساس انه بيتذلل لاهل مراته، المهم 24 ساعه مايك وكام كنا مع بعض فى كل حاجه ... حتى شغله كنت قاعده على الكمبيوتر اخلص له شغله. برنامج اتعلمته علشان خاطر اساعده ويكبر ويبقى كبير. ودايما اقول له قرش يبقى معانا زيادة ينفعنا فى الشقه، وطبعا طول السنة ابوه بيقول "فين باباها بيعمل كده ليه". وهو برضه مشاكل فى مشاكل.

لحد ما خطيبى تعب من الغربة وصمم ينزل يكتب الكتاب ونحط فلوسى على فلوسه ونجيب الشقه، ونسافر ونبقى نفرش على مهلنا. جه باباه قبل ما ابنه ينزل بشهر ... قال لنا ابنى مصمم يكتب الكتاب، واحنا تقبلنا الوضع وباباها جه خير وبركة مجاش مش مهم مش حنوقف الجوازه عليه.

المهم عشت شهر واحد كويس جدا، الحمد لله المشكلة اتحلت ومابقاش فى حاجه ... والدتى قالت له "لا لازم باباها يحضر الجواز حتى لو صورة ... ماقدرش لوحدى". المهم نزل خطيبى من السفر وكان مقرر جواز، ودخل على طول جينا فى اخر رمضان جالى زيارة. المهم شد هو وماما، هى كانت خايفه من ان الجواز قرب والموضع دخل فى الجد فقالت لا لازم ابوها وحصل خلافات وقعد يقول لها ماجاش طول السنة حيجى دلوقتى وزعقوا مع بعض.

بعد كده سافرنا ليهم مصر وقعدنا معاهم ... وكلمت والده ان خطيبى بيعامل امى مش حلو ومش بيحاول يديها الامان وفهمته انها خايفه وتعبانه، واحنا لازم نريحها وكده. وانى ماقدرش ابعد عن ابنه. المهم قال لى حاضر وطبطب عليا ونده امى وقعدوا واتكلموا مع بعض.

بس يمكن امى اشتكت لابوه من ان ابنه بيكلمها وحش وباسلوب مش كويس وزعقت لابنه قدامه، فابوه شخط فيه وقال له طبعا عندها حق. اللى ماتقبلهوش علينا ماتقبلهوش عليها ... واتصالح ونزلنا انا وهو.

اما انا فكنت بحبه لدرجة الجنون كنت اموت وهو يعيش وهو عارف كده عمرى ماجيت عليه ... كنت بخاف عليه زى خوف الام على ابنها. حبيته قوى قوى قوى عطيته كل حاجه حلوة، حتى هو كان بيقول لى انتى دافيه وحنينة قوى وطيبة. عمرى ما قسيت عليه مع انه كان بيقسى بعد موضوع والدى.

المهم رتبنا كل ظروفنا انا وهو على اساس الشقه حنجيبها ازاى والفلوس حلينا مشكلتها، يبقى مش فاضل غير موضوع ابويا. المهم بعد مارجعنا كلمت والده وصالحته لو امى قالت حاجه زعلتك ولا حاجه انا اسفه ... وانى بحبه وهو زى ابويا وجميله فوق راسى وقفته معانا وهو غالى عندى وفوق راسى ... الخ.

وكان رد ابوه انتى زى ابنى واهم حاجه تراضى الطرفين وانكوا تبقوا كويسين ومبسوطين، وشيلى الاوهام ديه من دماغك. وسبحان الله. موضوع ابويا اتحل فى يوم وليله، والله كان الموضوع مترتب. واول ما الموضوع اتحل ابوه قال لا مش عاوز الجوازة ... ابوها ماجاش الخطوبة وكمان امها بتقول علاقة ابوها مع خالها مش قوية، يبقى لا مش عاوز.

طب انا اصلا حسكن فى القاهرة يعنى انت مالكش غير ابويا وامى ... وابويا وامى على درجه عاليه من العلم وفى مراكز مرموقه. وقعدنا اسبوع كامل بنحايل فى ابوه وابنه كان متمسك بيا ... وفجاه تبدل الحال وابنه استسلم بعد حب 3 سنين ووعود انه بالموت حيبعد عنى، وانا اللى مت وتعبت مش عارفه اعمل ايه.

هو مقتنع انه ماظلمنيش وان اهلى هما اللى ظلمونى، وانا مقتنعه ان ابويا وامى وابوه وامه ظلمهم ليا كوم وظلم اللى عرفنى كويس وحبنى وبنى وعود معايا كوم تانى. ابوه قطع كل الاتصالات وحلف عليه ما يعرفنى تانى ولو عرفنى حيتبرى منه ليوم الدين.

وادى القصه انا تعبانه قوى قوى قوى طالبه الدعاء ليا ان ربنا يكويلى قلبى علشان حبه يخرج من قلبى ... عمرى ما كنت بسيبه لحظه لوحده، حتى سفره كنت اجيب كروت علشان ماسبهوش فى غربته وعينى ماتشفش النوم غير لما يبقى فى سريره. وكنت اموت لو جراله حاجه واتمنى اموت ولا ابعد عنه. واول ما يروح اصلى ركعتين شكر لله ان ربنا حفظه ولو ابعد عنه يتجنن بس دلوقتى ابوه وامه بقوا الكويسين اعمل ايه؟

م.ك

-----------

العقل بيقول ايييييه ؟!!

ياااااه يا بنتى، ده انا قلبى وجعنى لمجرد القراية، مابالك انتى بأه؟

بجد ربنا يكون فى عونك، ده انتى حاربتى حرب، يانهار ابيض! ياريت تقرى مشكلتك تانى وانتى هتعرفى انه من البداية خالص انتى اللى بتحاربى وانتى اللى شايلة الليلة فوق دماغك. بينما هو ح يالله بينفذ الدور اللى انت بترسميهوله، واضح جدا ان شخصيته ضعيفة جدا وانه مايستهلش كل الحب والتضحية والتحمل ده.

ده ابسط شيئ يديهولك ... لو هو بنى ادم فعلا ... انه يشيل أمك فوق راسه لان هى اللى جابت له الانسانة الجميلة اللى واقفة جنبه وبتحبه بالشكل ده. لكن للأسف ماطلعش بنى ادم أصلا ... وانتى غلطتى كتير بصراحة بتفريطك فى كرامتك وفى كرامة اهلك.

واضح من البداية ان ابوه رافض جوازه، مش شرط يكون منك شخصيا لكن ممكن يكون مش عايزه يتجوز أصلا دلوقتى، شايفه صغير مثلاً. وأرف باباكى علشان يخليه ياخد الموقف ده فيتحجج  ... وانتى نفسك قلتى انه لما جه يخطبك كان سايق العوج. ودى قلة أدب، لان اللى رايح يخطب لابنه مفروض يحط الناس دى فوق دماغه والا ياخد هو فوق دماغه ويتفتح له الباب ويتشاط ع السلم كمان.

ده كان رايح يبوظ الجوازة من الاول، بدليل ان لما باباكى تنازل كشف هو عن وشه الحقيقى واتحجج بكلام فارغ، فالظالم الحقيقى فى الموضوع ده هو أبوه ... لان خطيبك شخصيته تكاد تكون ممسوحة. انتى اللى بتتكلمى وانتى اللى بتراضى الطرفين. يابنتى ده انتى أرجل منه فى القصة دى.

و لو افترضنا ان الرجولة صمود وقوة شخصية وباقى الصفات اللى مش موجودة فيه دى، صدقينى انتى لو كنتى اتجوزتيه كنتى هتبقى متجوزة ابوه. والنوع ده حبه زى قلته. الحب بيعمل المعجزات، حقيقى الموضوع كان فيه نكد وأرف كتير من الاهالى ... لكن صدقينى انا شفت مواضيع اصعب من كده بكتير ومع ذلك الراجل لما بيكون راجل بجد بيستحمل، وهو اللى بيذلل كل الصعاب بعيدا عن حبيبته. مش يقرفها ويستنطع على قفاها (انتى اللى بتشترى الكروت علشان تكلميه؟ يامصيبتى السودا) و يصدرها فى وش المدفع 3 سنين وفى الاخر يخلع!!

وكمان بتقولى لى أعمل ايه؟

"فوقى يا حبيبتى لنفسك" وارمى السناره تانى وركزى المرة دى ان مايطلعلكيش فردة جزمة تانية ... واتعلمى من الموضوع ده انك ماتفرطيش لا فى كرامتك ولا فى كرامة اهلك تانى. وان اهل خطيبك لو ما إحترموكيش انتى واهلك وشالوكى فوق دماغهم، يبأه فى 6000000 سلامة والمركب اللى تودى. الرجالة ماخلصتش من العالم، والبحر مليان سمك يا "ضشينايا"، وانتى ألف مين يتمنى ظفر واحدة زيك. جدعة وجميلة وقوية وانسانة بجد، ربنا يحميكى يا بنتى، وماتديش قلبك الألماظ ده غير لحد يستاهل بصحيح :)

أمل محمود

كلمتين ومش بس:

اذا اكرمت الكريم ملكته ... واذا اكرمت اللئيم تمرد
واذا صبغت القبيح بجمالك ... مع اول قطرة ماء من صبغتك تجرد

Share on Facebook