شوفى يا ستى انا مش هطول عليكى لان الموضوع
طويل ... وحظى مع الرجالة دايما سيئ جدا.
أنا عندى 29 سنة والحمد لله، جميلة بشهادة
الناس، ومحجبة ومتدينة لكن فى نفس الوقت مخى مش مقفل.
ناجحة جدا فى شغلى وعاملة دراسات عليا خارج مصر، ومعتمدة
على نفسى تماما فى كل شىء ... الا انى برضه حاسة انى
محتاجة ارتبط بانسان يكون شريك ليا فى رحلتى.
قابلت واحد معايا فى الشغل وكنت بحس انه معجب
بيا، بس مش بيقول اى حاجة بصراحة ... مش اكتر من نظرات،
وكلام حلو من وقت للتانى لكن مافيش حاجة "تتمسك" عليه.
وكنت راضية وساكته لما اشوف اخرتها ايه.
الكارثة بأه انه راح فرع الشركة فى اسكندرية،
يعنى ماباقاش موجود فى القاهرة أصلا ... لكن اللى اعرفه
انه بينزل على طول مصر، كلمنى مرة يسأل على حاجة وفرحت جدا
... واتقابلنا كذا مرة فى تجمعات الشغل وبرضه نفس الاسلوب.
ده حتى قال لنا انه عايز يتجوز! ... وطلب
مننا ندور له على عروسة. واللى عرفته من بنت زميلتنا انها
فعلا جابت له مرة واحدة صاحبتها وشافها لكن ماعجبوش بعض.
كلمته بعدها أسأله على حاجة فى الشغل ...
تلكيك يعنى. قال لى هشوف وأرد عليكى وبعدين ماردش عليا
أصلا. اتقابلنا بعدها بالصدفة، ولما سألته على الموضوع
اللى قلت له عليه، اتأسف لى وقال لى انه نسى، والكلام جاب
بعضه وطلب منى عروسة ... ولما سألته عن مواصفاتها، قال لى
كل المواصفات اللى فيا ... بس فى الاخر قال لى: بس ماتكونش
محجبة لان أنا ماليش فى المحجبات !!
أنا مافهمتش هو ليه بيقول كده، ومش عارفة
المفروض أعمل ايه؟
و على الرغم من إنه انه من مجتمع مفتوح جدا،
وكل البنات صاحباته بيلبسوا عريان وقصير وكده ... لكن هو
قال لى انه عايز واحدة محترمة ولبسها محترم ... يعنى مش
عايز واحدة من الناس دى !!
قولى لى اعمل ايه؟
ن.ف
-----------
العقل بيقول اييييه؟!
شوفى يا نون يا جميلة، دى مشكلة متكررة جدا،
ويتحصل كتير ... والعكس صحيح برضه. فية واحد بيكون عايز
واحدة محجبة.
بطل قصتنا حالته واضحة ومفهومة، الأخ مش بتاع
مشاعر أوى والذى منه، هو عنده مواصفات عايزها وخلاص،
وهيفضل يدور عليها لغاية مايلاقى حاجة قريبة منها. وانا مش
بلومه على ده، دى دماغه وحياته وهو حر، لكن انا بلومه على
التلوين عليكى.
هو واضح طبعا ان انتى فيكى جزء كبير من
المواصفات اللى بيدور عليها الا انك محجبة، وده عيب فيكى
"بالنسبة له". فهو زى ما تقولى كده حاجزك بصباع رجله
الصغير ... لو لقى اللى فيها مواصفاتك ومش محجبة كان بها،
لو مالاقاهاش أديكى موجودة يبقى يفكر براحته ساعتها فى
موضوع حجابك ده. وفى نفس الوقت هو رماها لك، اذا ربما
تشاورى عقلك وتخلعى الحجاب..
هو ممكن يكون معجب بشخصيتك العملية لكن مش
اكتر من كده ... لان ده مش سلوك واحد معجب او عايز يعمل اى
نوع من اى علاقة. أبسط شىء لما كلمتيه، فدى كانت فرصة
كويسة انه يفتح مجال للحوار معاكى ... لكن هو ماعملش ده،
بالعكس ده نظام "قلت يا واد طنث خالث" ... بطريقة محمد
صبحى. ودى رسالة واضحة وصريحة انه مافيش حاجة من ناحيته،
فكل المجهود هيبأه عليكى علشان تلفتى نظره ...
ونصيحتى ليكى طبعا انك ماتعمليش اى حاجة
اصلا، ولا تاخدى اى خطوة تجاهه لانها مش هتفيد. واضح ان
انتوا الاتنين مختلفين وتفكيركم مختلف، دانتى حتى ماعرفتيش
ايه سر اعتراضه على الحجاب، لكنى خلينى اديكى احتمالات
شفتها قبل كده:
1- فيه راجل بيعترض على الحجاب اصلا ومش
مقتنع انه له علاقة بالدين، ده بيكون واحد عنده وجهة نظر
مبنية على قراءات وقناعات خاصة وبيشوف ان البنت اللى بتحط
طرحة على دماغها هى حاطة طرحة على عقلها، ومغيبة وبتتبع
سياسة القطيع وهو عايز واحدة مختلفة دماغها زيه ...
2- وفيه واحد الموضوع عنده مالوش اى علاقة
بالدين، لكن له علاقة بمجتمعه، يعنى المجتمع اللى انتى
بتتكلمى عنه ده، بيشوف ان الحجاب ده شىء بيئة ... ودول
بواقى بعض الارستوقراطيين بتوع زمان، اللى لو واحدة اتحجبت
عندهم تبقى فضيحة. فبالتالى بيحس انه عايز واحدة ستايل
تتماشى مع الجو ده ... ومش شرط تكون بتلبس عريان. فيه ناس
كتيرة وسطيين ... بتبقى محتشمة لكن بتلبس على الموضة ومش
مغطية شعرها ...
3- وفية واحد الموضوع بالنسبة له مختلف عن
الاتنين دول، ده بأه بيحسبها بطريقة تانية، يقول لك انا
عايز واحدة مش محجبة علشان نعيش حياتنا فى شهر العسل مع
بعض براحتنا. ننزل البحر، البيسين وماتخنقنيش وبعد كده لو
عايزة تتحجب هى حرة ...
وفى كل الاحوال، النوعيات دى من الرجالة فعلا
لو قتلتيها مش هتتجوز واحدة محجبة ... فعلشان كده انا
شايفة انك ماتعلقيش نفسك بحبال دايبة وتشوفى واحد تكون
دماغه زيك. ويكون شايف ان الحجاب ده ميزة مش عيب، وده
موجود وده موجود ... واحنا اللى فى ادينا نختار اللى
يناسبنا ..
begd mash2 allah 3leky w 3la el klam bt3ek 7ekam ya naaaas .ana 3nde 19 sana bs b7es m3aky eny bwsl le 3a2lek w b2et 3la fkra bfkar zyek f 7aga kter .. rbna y5leky lenaa w dyman kda rf3ana foooo2 bel 3a2l bardooo .:D :D:D w 3ndek 7a2 fe kol klma 2olteha bgd w el no3 da byob2a 3yez w7da tfsel 3la mzago w hyl2eha fe wst el 7agt el kter ely b2ena feha now ..bs hya a7san 7aga tsbha mno 5leeeeeeeeeees
w t3esh 7ytha w ht2bel el ensan el mo7traaam ely eo3gb beha w be 7gbha w kol 7aga fehaaa ....thanxxxx for the experience that u give it to us by these problems :D
لوما
Jan 14, 2010
عين العقل
بعد كلام الجميلة امل مفيش كلام وبصراحة بلاش تعلقي نفسك بيه
ايمي
Jan 14, 2010
سيبك منه
طالما واحد بالشكل ده يعلقك علي الفاضي نظرات وحركات وعامل فيها دون جوان يبقي راجل مش تمام وكمان اخد فرصه انه يشوف واحده غيرك وينقي تبقي عايز ايه سيبك منه
مي حمدي
Jan 14, 2010
خلي عند امل
ازيكم كلكم
كالعاده متالقه يا استازة امل
بس انا من رايي لصاحبه المشكله
انك حاولي تستعملي كل الوسائل المباحه للتوقيع بالفريسه
وطالما عاجبك حاولي
بس صلي الاول استخارة وقولي لو خير يقربو منك علشان انتي ممكن تكوني متخيلاه خير وتدعي بيه لنفسك
اما انا شفت بعيني ولد متدين من عيله مقفوله جدااااااااااااااا
كان كل طلبه في فتاه احلامه انها تبقي مش بتختلط حتي بزميل لا في دراسه ولا شغل وتبقي متغلقه وكذا وكذا
لكن صدمت زي اليسا كده بالظبط لما لقيتو اختار عروستو
ههههههههههه
وبالتوفيق لان لسا عندنا امل
Mony
Jan 14, 2010
el wa7id mesh 3aref el welad 3yzeen eh
y3ni el welad y2olo mesh l2yeen banat mo7tarma 3lshan netgawezha...w lama y2blo nas mo7tarma mesh 3agbhomm
!!!!
la2 w kaman eh fe no3 tani mn el welad lama yela2i bent mo7tarma yefteker enaha sazga w momken yede7ek 3leha 3lshan malhas tagareb w y7awel yegra7a !!!
eh r2yek ya Amal.....w leh el bent lama tekon mo7tarma betetbahdel w 3'er kda betakhod eli hya 3yzah w metgaweza a7san gawaza !!!! feen el 3adl fe kda !!!!
w shokran liki ya Amal....
w tb3an r2yy leha enaha tenafadlo khalis wala akeno mawgood aslan !
