انا مشكلتي اني للاسف عايش علي اللي كان ..

كنت بحب زميلة ليا اوي، وكنت هخطبها خلاص. و هي كانت بتقول انى الدنيا ومافيها ..

و فجاة قالت لي مش هقدر اكمل معاك، وانا اسفه انت تستحق واحدة احسن مني !!!

المشكله إنى حاولت اكلمها ومافيش فايده،  وهى اتخطبت كمان.

و المشكله إنى مش عارف انساها ... بحبها اوي و بشوفها كل يوم، لانها معايا في الكليه والراوند ... وحتي لو مش بشوفها صوتها علي طول في وداني، ودايما صورتها قدام عيني.

ارجوكي ساعديني بجد انا تعبان ..

انا في بكالريوس ومش عارف اذاكر.

وشكرا لافضالك.

م.أ

-----------

العقل بيقول ايييه؟!!

لأ لأ لأ ...

بكالوريوس يبقى نركز فى مذاكرتنا الأول ... ده مستقبل يا بابا، لان كمان 5 سنين انت مش هتفتكر اسمها اصلا ... لكن هتلعن اليوم اللى شفتها فيه لو أثرت على تقديرك ..

طب البنات لما بتقول لى الكلام ده بقول معلهش ... اصل البنات كائنات عاطفية، وساعات مجنونة ... لكن الرجالة انا بصراحة مابتقبلش ده منهم، لان دورهم فى الحياة بيتطلب انهم يجمدوا ومايخلوش موضوعات وقتية تأثر على مجرى حياتهم بالكامل.

يعنى لما تيجي الانسانة اللى تستاهلك بجد وتستاهل حبك ده تلاقيك بتلملم لسة فى اثار الزلزال .. !!!

و أنت بتحب ايه؟!!

واحدة ماحبتكش وباعتك أودام اول فرصة لجوازة ... الهانم كانت واحداك عريس مناسب، ويتضحك على عقلك بكلمتين حلوين. ولما لقت لها عريس مناسب أكتر منك باعتك على أول ناصية.

اه ما أنا نسيت أقول لك ان زى ما فيه بنات جميلة ورومانسية ورقيقة وبتحب بجد ... فيه برضه بنات مش حلوة من جوه وباردة وبتمثل ... ومصلحجية ومادية.

و دول لو حبيناهم يابنى يبأه العيب علينا احنا ..

ارمى ورا ظهرك، واللى يبيعك بيعه ... وركز فى مستقبلك والبنات الكويسة اللى قلوبها الماظ. دول موجودين وعايزين يحبوا بجد مش يتجوزوا والسلام ... موجودين بس انت فتح عنيك كويس.

مش عارفة ليه يا أخى حاسة انى شايفة لك واحدة منهم قاعدة فى البنش اللى وراك ومابتقدرش تكلمك أصلا لانها بتتكسف.

نفض الاخت دى من على نظارتك علشان تقدر تشوف اللى بتحبك بجد ..

أمل محمود

Share on Facebook